Lub Tuam Tsev Tshiab

Hnub tim nees nkaum ib, lub xya hli,  (יחוח)Yahweh  hais lus tuaj rau Chagyah uas ua xibhwb cev lus tias, 2 cia li hais rau Se‑athi‑ees tus tub Xelunpanpees uas ua thawj kav Yahdah tebchaws thiab Yehauxadas tus tub Yahshua uas ua tus tuam pov thawj hlob, thiab cov peejxeem uas tseem tshuav nyob hais tias, 3 tshuav leejtwg nyob hauv nej txeev pom lub tuam tsev qub thaum ub zoo nkauj li cas? Nimno nej ho pom lub tuam tsev zoo li cas lawm? Saib mas tsis tseem ceeb li lov?

4 (יחוח)Yahweh  hais tias, Xelunpanpees es, cia li ua siab tuab. Yehauxadas tus tub Yahshua uas ua tus tuam pov thawj hlob es, cia li ua siab tuab. (יחוח)Yahweh  hais tias, nej cov pejxeem thoob tebchaws cia li ua siab tuab. (יחוח)Yahweh  uas muaj hwjchim loj kawg nkaus hais tias, cia li ua mus, vim kuv nrog nraim nej nyob, 5 ib yam li thaum kuv coj nej tawm hauv Iziv tebchaws los kuv tau cog lus rau nej. Kuv Tus Ntsuj Plig Dawbhuv yeej nrog nraim nej nyob, tsis txhob ntshai li.

6 (יחוח)Yahweh  uas muaj hwjchim loj kawg nkaus hais li no tias, tshuav tsis ntev kuv yuav co lub ntuj thiab lub ntiajteb, thiab dej hiav-txwv, thiab nruab nqhuab dua ib zaug. 7 Kuv yuav co ib tsoom tebchaws sawvdaws ua kom ib tsoom tebchaws sawvdaws tej nyiaj txiag ntws los rau nej, thiab kuv yuav muab lub koob meej ci ntsa iab ntim puv nkaus lub tuam tsev no. (יחוח)Yahweh  uas muaj hwjchim loj kawg nkaus hais li no ntag. 8 Nyiaj yog kuv li, kub yog kuv li. (יחוח)Yahweh  uas muaj hwj chim loj kawg nkaus hais li no ntag.

9 (יחוח)Yahweh  uas muaj hwjchim loj kawg nkaus hais tias, lub tuam tsev no yuav muaj lub koob meej ci ntsa iab loj dua lub qub thaum ub. Kuv yuav pub lub chaw no vam meej, noj qab nyob zoo. (יחוח)Yahweh  uas muaj hwjchim loj kawg nkaus hais li no ntag.

Cov Pejxeem Qias Tsis Huv

10 Hnub tim nees nkaum plaub, lub cuaj hlis xyoo ob uas Dali‑as ua vajntxwv, (יחוח)Yahweh hais lus tuaj rau Chagyah uas cev lus tias,

11 (יחוח)Yahweh  uas muaj hwjchim loj kawg nkaus hais li no tias, cia li nug cov pov thawj saib txoj kevcai hais li cas. 12 Yog leejtwg qaws lub qab tsho ntev qhwv ib qho nqaij dawb huv coj mus, es yog lub qab tsho ntawd mus nphav tej ncuav lossis zaub siav, lossis cawv txiv hmab, lossis roj, lossis ib yam zaub mov twg, mas tej ntawd yuav dawb huv thiab lov? Cov pov thawj teb tias, tsis dawb huv. 13 Mas Chagyah hais tias, yog leejtwg tau mus kov tej cev tuag ua rau nws qias tsis huv es nws ho los kov tej no, mas tej no yuav qias tsis huv thiab lov? Cov pov thawj teb tias, tej no yuav qias tsis huv thiab. 14 Chagyah thiaj hais tias, (יחוח)Yahweh  hais tias, kuv pom kuv cov neeg no thiab lub tebchaws no zoo ib yam li ntawd. Txhua yam uas lawv txhais tes ua kuj zoo li ntawd thiab tej uas lawv muab xyeem kuj qias tsis huv. 15 Nimno cia li tshuaj saib txij hnub no mus yuav muaj abtsi tshwm los.  Ua ntej uas nej tsis tau muab tej pob zeb los tib sib tshooj ua (יחוח)Yahweh  lub tuam tsev 16 nej lub neej zoo li cas? Thaum ib tug mus rau ntawm pawg qoob, xav tias yuav luj tau nees nkaum thoob tiamsis tsuas muaj kaum thoob xwb. Thaum ib tug mus txog ntawm lub rhawv kua txiv hmab, yuav ntaus tsib caug thoob tiamsis tsuas muaj nees nkaum thoob xwb. 17 Kuv twb nplawm nej thiab ua rau nej tej qoob loo huvsi nce hmob thiab tuaj pwm, thiab raug lawg ntaus los nej tsis rov los cuag kuv. (יחוח)Yahweh  hais li no ntag. 18 Cia li tshuaj saib txij hnub no mus, yog hnub tim nees nkaum plaub, lub cuaj hlis, yog hnub uas tiag tej taw ua (יחוח)Yahweh  lub tuam tsev. Cia li ua tib zoo xav saib, 19 tseem tshuav qoob hauv txhab lov? Tej txiv hmab, txiv cev, txiv ntsiav kws, thiab tej txiv aulib, tsis txi txiv lov? Txij hnub no mus kuv yuav foom koob hmoov rau nej.

(יחוח)Yahweh  Cog Lus Rau Xelunpanpees

20 Hnub tim nees nkaum plaub, lub hli ntawd (יחוח)Yahweh  hais lus zaum ob tuaj rau Chagyah tias, 21 cia li hais rau Xelunpanpees uas ua tus thawj kav lub xeev Yahdah hais tias, kuv tabtom yuav co lub ntuj thiab lub ntiajteb, 22 thiab yuav muab tej tebchaws lub zwm txwv ntxeev pov tseg. Kuv tabtom yuav rhuav tshem ib tsoom tebchaws li hwjchim thiab muab tej tsheb nees ua rog, thiab tus uas tsav tsheb ntxeev pov tseg. Tej nees thiab tus caij nees yuav ntog tuag, txhua tus yuav tuag rau nws tus phoojywg tej hniav ntaj.

23 (יחוח)Yahweh  uas muaj hwjchim loj kawg nkaus hais tias, se‑athi‑ees tus tub Xelunpanpees uas yog kuv tus qhev, hnub ntawd kuv yuav qaws koj. (יחוח)Yahweh  hais tias, kuv yuav muab koj ua zoo li lub nplhaib txam txwm, vim kuv twb xaiv koj lawm. (יחוח)Yahweh  uas muaj hwjchim loj kawg nkaus hais li no ntag.