Yakhauj Ntsib Exaus

1 Yakhauj tsa muag saib mas pom Exaus tuaj thiab muaj plaub puas leej nrog nws tuaj. Yakhauj thiaj muab cov menyuam faib nrog Le-as, thiab Lachees, thiab ob tug nkauj qhe.  

2 Nws tso ob tug nkauj qhe thiab nkawv cov menyuam mus ua ntej, tso Le-as thiab nws cov menyuam mus ua nruab nrab, cia Lachees thiab Yahxej mus tom qab kawg.

3 Nws ua lawv ntej mus, khoov ntshis hauv av, pe xya pes, mus ti nkaus nws tus tijlaug.

4 Exaus khiav loo mus tos nws thiab puag nkaus khawm caj qwb nwj, mas nyias taus nyias quaj.  

5 Thaum Exaus tsa muag saib pom cov pojniam menyuam, nws thiaj nug tias, cov tibneeg uas nrog koj ua ke no yog leejtwg? Yakhauj teb tias, yog cov menyuam uas (יחוח)Yahweh zoo siab pub rau kuv, uas yog koj tus tub qhe.  

6 Ob tug nkauj qhe thiab nkawv cov menyuam thiaj txav los ze thiab pe. 

7 Le-as thiab nws cov menyuam kuj txav los ze thiab pe. Thaum kawg, Yahxej thiab Lachees txav los ze thiab pe.  

8 Exaus hais tias, cov tsiaj txhu huvsi, uas kuv ntsib ntawd yog muab ua abtsi? Yakhauj teb tias, yog muab pub rau koj, kom koj txaus siab rau kuv.  

9 Exaus hais tias, tus kwv, kuv muaj txaus lawm, khaws koj li cia rau koj.

10 Yakhauj hais tias, tsis tau, yog koj txaus siab rau kuv, thov koj txais tej tshav ntuj ntawm kuv txhais tes, rau qhov kuv pom koj ntsej muag, mas ib yam li kuv pom (יחוח)Yahweh ntsej muag ntag, vim koj hlub kuv thiab koj txais kuv zoo kawg.

11 Kuv thov koj txais tej tshav ntuj uas kuv coj los rau koj, rau qhov (יחוח)Yahweh hlub thiab ua zoo rau kuv, thiab kuv muaj txaus lawm. Nws thov thov li no, Exaus thiaj txais lawm.  

12 Exaus hais tias, peb cia li ua ke mus, kuv yuav coj koj kev.  

13 Yakhauj teb nws tias, yawg hlob, koj yeej paub tias, kuv cov menyuam tsis muaj zog, thiab kuv tseem txhawj txog kuv tej pab yaj, pab tshis, thiab tej nyuj, cov menyuam uas tseem noj mis. Yog tseem raws ceev nrooj mus ib hnub thiab, tej tsiaj yuav tuag tag.

14 Thov yawg hlob ua koj tus tub qhe ntej mus, mas kuv maj mam raws koj qab los, raws li tej tsiaj lub zog uas nyob ntawm kuv hauv ntej thiab raws li kuv cov me­nyuam lub zog, mus txog thaum kuv los cuag yawg hlob ntawm Xe‑is.

15 Exaus thiaj hais tias, cia kuv tso kuv cov tibneeg nrog koj ua ke. Tiamsis Yakhauj hais tias, tsis txog ua li ntawd. Thov koj txaus siab rau kuv xwb ces txaus lawm.

16 Mas hnub ntawd, Exaus kuj taug kev rov mus rau Xe‑is.

17 Tiamsis Yakhauj mus txog ntawm Xukhaus ces txawm ua vaj tse nyob ntawd, thiab ua tsev pheeb suab rau nws tej tsiaj txhu. Vim li ntawd, thiaj hu qhov chaw ntawd ua Xukhaus.

18 Yakhauj taug kev ntawm Padas Alas los txog lub moos Sekhees hauv Khana‑as tebchaws, tsis raug ceeblaj abtsi li.  Nws thiaj tsa tsev ntaub, ze ntawm lub moos Sekhees.

19 Yakhauj yuav thaj av uas nws tsa tsev ntaub ntawm Hamaus cov tub ib puas npib nyiaj. Hamaus uas yog Sekhees txiv.

20 Yakhauj tib ib lub thaj xyeem rau qhov ntawd, hu lub thaj ntawd ua Ee-Elohes Ixayees.