Dinas Thiab Cov Neeg Sekhees

1 Yakhauj tus ntxhais Dinas uas Le-as yug tawm mus cuag cov pojniam uas nyob hauv tebchaws ntawd.

2 Thaum Hamaus uas yog tibneeg Hivais uas kav tebchaws ntawd tus tub Sekhees pom Dinas, ces nws txawm muab tus ntxhais yuam coj mus pw ua ke.  

3 Sekhees kuj tag siab kiag rau Yakhauj tus ntxhais Dinas, nws nyiam heev thiab hais lus zoo kawg li rau Dinas.  

4 Sekhees txawm hais rau nws txiv Hamaus tias, thov pab yuav tus ntxhais ntawd ua kuv pojniam lauj.

5 Yakhauj hnov hais tias, Sekhees muab nws tus ntxhais lub cev kov puas lawm, tiamsis nws cov tub tseem yug tsiaj tom tshav zaub. Yakhauj thiaj nyob twjywm tos cia cov tub los tso.

6 Hamaus uas yog Sekhees txiv thiaj mus cuag Yakhauj, mus nrog nws tham.

7 Thaum Yakhauj cov tub hnov tej xov ntawd, lawv txawm rov tom tshav zaub los. Lawv mob siab kawg thiab chim kawg li, rau qhov uas Sekhees saib tsis taus cov Ixayees thiaj muab Yakhauj tus ntxhais yuam li ntawd, yeej tsis tsim nyog yuav ua li ntawd.

8 Hamaus txawm hais rau lawv tias, kuv tus tub Sekhees lub siab yeej dai vias rau koj tus ntxhais li. Thov muab tus ntxhais rau kuv tus tub yuav ua pojniam.

9 Nej nrog peb ua tshoob ua kos, muab nej tej ntxhais qua rau peb cov tub thiab yuav peb tej ntxhais rau nej cov tub.

10 Nej nrog peb nyob, peb yuav qheb tebchaws kom dav fo rau nej nyob. Cia li nyob ntawm no ua lag ua luam, yuav liaj yuav teb ua vaj ua tsev.

11 Sekhees txawm hais rau Dinas txiv thiab nws cov nus tias, tsa muag hlo saib kuv lauj. Nej yuav pes tsawg los kuv yeej yuav them xwb.  

12 Nej yuav hu nqi mis, nqi hno li cas thiab tshav ntuj li cas los, kuv yeej yuav muab rau nej raws li nej hais. Thov muab tus ntxhais qua rau kuv yuav xwb.

13 Vim yog Sekhees muab lawv tus muam Dinas lub cev kov puas lawm, Yakhauj cov tub thiaj dag Sekhees thiab nws txiv Hamaus. 

14 Lawv teb tias, tsis tau li lauj! Peb qua tsis nyog tus muam rau tus tibneeg uas tsis tau ua kevcai txiav. Ua li mas yuav rhuav peb ntsej muag heev.

15 Tsuav yog nej kam ua li uas peb hais es cia txhua tus txivneej ua kevcai txiav ib yam li peb thiab, ces peb yuav yeem muab qua rau koj.

16 Peb thiaj yeem muab peb tej ntxhais qua rau nej thiab yuav nej tej ntxhais los rau peb mas peb yuav nrog nej nyob ua kiag ib haiv neeg.

17 Tiamsis yog nej tsis mloog peb hais, tsis kam ua kevcai txiav ces peb yuav coj peb tus muam khiav mus.

18 Lawv cov lus ntawd mas haum Hamaus thiab nws tus tub Sekhees nkawv siab kawg.

19 Tus hluas ntawd tsis tos li, nws maj nroos ua kiag li lawv hais, vim nws tag siab nrho rau Yakhauj tus ntxhais. Sekhees yog tus uas muaj meej mom dua txhua tus hauv nws txiv tsev neeg.

20 Hamaus thiab nws tus tub Sekhees thiaj tawm mus rau ntawm rooj loog hais rau cov txivneej hauv lub moos ntawd tias,

21 cov txivneej no nrog peb sib raug zoo lawm. Cia lawv nyob hauv lub tebchaws no ua lag ua luam, rau qhov lub tebchaws no dav txaus lawv nyob. Peb cia li yuav kiag lawv tej ntxhais los ua peb cov tub pojniam thiab muab peb tej ntxhais qua rau lawv yuav.  

22 Qhov uas lawv yuav kam nrog peb nyob ua kiag ib haiv neeg, mas yuav tau ua li no xwb. Peb cov txivneej txhua tus yuav tau ua kevcai txiav ib yam li lawv.

23 Lawv tej niag pab tsiaj txhu thiab ib puas tsav yam uas lawv muaj thiab tej tsiaj uas siv ua haujlwm, puav leej yuav yog peb li los sas. Cia peb ua raws li uas lawv hais no, lawv thiaj li kam nrog peb nyob.

24 Cov txivneej sawvdaws uas nyob hauv lub moos kuj pom zoo ua raws li Hamaus thiab nws tus tub Sekhees hais. Mas cov txivneej hauv lub moos ntawd txhua tus txawm ua kevcai txiav.

25 Lawv ua kevcai txiav tau peb hnub, thaum lawv tseem tab tom mob mob, Yakhauj ob tug tub Xime‑oos thiab Levis uas yog Dinas ob tug nus hlob, txawm coj ntaj nyas mus rau hauv moos muab cov txivneej hauv moos txhua tus tua pov tseg.

26 Nkawv xuas ntaj tua Hamaus thiab nws tus tub Sekhees tuag, mas coj Dinas tawm hauv Sekhees lub tsev mus.

27 Yakhauj cov tub pom cov txivneej uas tuag ntawd, mas lawv cia li lws tej qhov txhia chaw hauv lub moos, vim cov tibneeg hauv lub moos ntawd muab lawv tus muam lub cev kov puas lawm.

28 Lawv txeeb kiag tej tshis, tej yaj, tej nyuj, tej nees luav, thiab ib puas tsav yam, tsis hais hauv lub moos, nruab liaj, nruab teb, coj huvsi mus.

29 Coj kiag nyiaj, cuab txhiaj, cuab tam, thiab ntes pojniam, menyuam, coj mus. Lawv sau ib puas tsav yam hauv vaj, hauv tsev, du lug li.

30 Yakhauj txawm hais rau Xime‑oos thiab Levis tias, neb ua rau kuv tau kev kub ntxhov heev, neb ua rau cov tibneeg Khana‑as thiab cov tibneeg Pelixais, uas nyob lub tebchaws no ntxub kuv.  Peb tsawg tsawg li, yog lawv sau nthwv tuaj ntaus kuv, ces kuv thiab kuv tsev neeg yeej yuav puam tsuaj tag xwb.

31 Tiamsis nkawv teb hais tias, luag muab peb tus muam ua cuag nkaus li tus poj

muag cev tau thiab lov?