Cov Ntseeg Muaj Kev Ywj Pheej

1 Peb tau nyob ywj pheej li ntawd, twb yog vim (יהושע)Yahshua Messiah tso peb dim. Yog li ntawd, cia li nyob ruaj, tsis txhob rov qab mus kwv tus quab uas ua qhev dua li lawm. 2 Nimno kuv yog Sha-ul, hais rau nej tias, yog nej tseem ua kevcai txiav, ces (יהושע)Yahshua Messiah yuav tsis muaj qabhau abtsi rau nej kiag li.  3 Kuv rov qhia dua rau txhua tus uas ua kevcai txiav tias, lawv raug muab khi kom xyaum raws li txoj kevcai huvsi lawm. 4 Nej cov uas xav raug suav tias ncaj ncees, vim qhov uas xyaum raws li txoj kevcai, nej kuj raug muab txiav tu nrho ntawm Messiah thiab poob ntawm Abba (יחוח)Yahweh txojkev hlub lawm. 5 Vim peb muaj Tus Ntsuj Plig Dawbhuv thiab muaj kev ntseeg, peb thiaj tos rawv txojkev ncaj ncees uas peb vam tias yuav tau. 6 Rau qhov nyob hauv (יהושע)Yahshua Messiah qhov, uas ua kevcai txiav thiab tsis ua yeej tsis tseem ceeb abtsi, tsuas yog txojkev ntseeg uas muaj kev sib hlub thiaj tseem ceeb xwb. 7 Nej twb khiav  tau zoo heev. Leejtwg tav tsis pub nej mloog txoj tseeb? 

8 Qhov uas luag haub ntxias li ntawd, tsis yog los ntawm Abba (יחוח)Yahweh uas hu nej los ntseeg. 9 Ib nyuag qhov keeb me me ua rau ib phaj hmoov su tag huvsi. 10 Kuv tso siab rau Abba (יחוח)Yahweh, tias nej yuav tsis xav rau lwm yam. Tus uas ua rau nej ntxhov ntawd, txawm yog leejtwg kuj xij, nws yuav raug txim. 11 Cov kwvtij, yog tias kuv tseem qhia kom ua kevcai txiav, ua cas kuv ho raug tsim txom? Yog li ntawd, tus ntoo ntsia tes yuav tsis ua rau tibneeg dawm lawm. 12 Kuv xav kom cov uas ua rau nej txhawj ntawd, muab lawv tus kheej sam kiag. 13 Cov kwvtij, nej raug hu los nyob ywj pheej. Tiamsis tsis txhob siv txojkev ywj pheej ntawd, ua hauv paus coj nej mus ua raws li lub cev nqaij tawv ntshaw, tiamsis ib leeg cia li zoo siab ua num pub rau ib leeg ntawm txojkev hlub. 14 Rau qhov tag nrho txoj kevcai huvsi, muab sau zog ua ib los hais tias, koj yuav tsum hlub kwvtij zej zog ib yam li koj hlub koj tus kheej. 15 Tiamsis yog nej sib tom, sib ntxo, cia li ceev faj tib zoo tsam ces nej ib leeg yuav ua rau ib leeg puam tsuaj tag huvsi.

​

Ua Lub Neej Raws Li Tus Ntsuj Plig Dawbhuv

16 Kuv hais tias, cia li ua lub neej raws li Tus Ntsuj Plig Dawbhuv, tsis txhob ua raws li lub cev nqaij tawv ntshaw.

17 Rau qhov tej uas lub cev nqaij tawv ntshaw, tawm tsam Tus Ntsuj Plig Dawbhuv, thiab tej uas Tus Ntsuj Plig Dawbhuv ntshaw, kuj tawm tsam cev nqaij tawv. Ob yam no yeej sib tawm tsam ib yam nkaus, nej thiaj ua tsis tau tej uas nej xav ua.18 Tiamsis yog Tus Ntsuj Plig Dawbhuv coj nej, nej kuj tsis nyob hauv txoj qab kevcai.

19 Nqaij tawv li haujlwm pom tseeb li no, yog qhov uas ua nkauj, ua nraug, ua phem, ua qias, ua vuab tsuab, 20 pe dab, pe mlom, ua khaws koob, ua yeeb ncuab, sib cav, sib ceg, sib khib, sib chim, sib txeeb, tawg ua pab ua pawg, 

21 ntshaw luag tug, qaug dej, qaug cawv, ua nqaj, ua nqug thiab dua lwm yam zoo li no, uas kuv twb ntuas nej ua ntej tias, cov uas ua tej no, yuav tsis muaj feem tau Abba (יחוח)Yahweh lub tebchaws kiag li. 

22 Tiamsis Tus Ntsuj Plig Dawbhuv txi txiv li no, yog kev hlub, kev xyiv fab, kev siab tus, kev thev taus, kev khuvleej, kev ua zoo, kev ua ncaj, 23 lub siab mos siab muag, thiab paub tswj tus kheej. Tej no tsis muaj kevcai txwv kiag li.

24 Cov uas yog (יהושע)Yahshua Messiah tug, lawv twb muab lawv lub cev nqaij tawv, thiab tej uas lub cev ntshaw, thiab xav teem ua ke rau saum tus ntoo ntsia tes lawm. 25 Yog peb muaj txojsia nyob hauv Tus Ntsuj Plig Dawbhuv, peb cia li ua lub neej raws li Tus Ntsuj Plig Dawbhuv. 26 Peb tsis txhob khav theeb, ib leeg tsis txhob zes kom ib leeg chim, thiab tsis txhob sib khib.

​