(יחוח)Yahweh Ua Plaub Rau Cov Ixayees

1 Cov Ixayees es, cia li mloog (יחוח)Yahweh tej lus, rau qhov (יחוח)Yahweh muaj plaub rau cov uas nyob hauv lub tebchaws no. Tsis muaj kev ua ncaj, tsis muaj kev khuvleej, tsis muaj kev paub (יחוח)Yahweh hauv lub tebchaws no.

2 Tsuas yog muaj kev twv tsawm, kev dag, kev sib tua, thiab ua tub sab, ua nkauj ua nraug xwb. Lawv tsis tswj lawv tus kheej kiag li, tua tibneeg tag los tua thiab. 3 Vim li no lub tebchaws thiaj quaj ntsuag, txhua tus uas nyob hauv lub tebchaws poob siab qaug zog tag, tej tsiaj qus thiab tej noog saum nruab ntug thiab tej ntses hauv hiavtxwv raug muab rhuav tshem tag. 4 Tsis txhob cia leejtwg ua plaub, tsis txhob cia leejtwg tshum, rau qhov kuv ua plaub rau koj nawj, pov thawj es. 5 Nruab hnub koj yuav dawm, thiab hmo ntuj tus xibhwb cev lus yuav nrog koj dawm, thiab kuv yuav ua rau koj niam puam tsuaj. 6 Kuv haiv neeg raug puam tsuaj vim tsis muaj kev paub. Vim koj tsis yuav kev paub, kuv kuj tsis yuav koj ua kuv li pov thawj.

Vim koj tsis nco qab (יחוח)Yahweh, uas yog koj Tus Tswv, txoj kevcai, mas kuv yuav tsis nco qab koj cov tub ki thiab. 7 Lawv yim huaj vam coob, lawv yim ua txhaum. Mas kuv yuav muab lawv lub koob meej ntxeev ua kev txaj muag rau lawv. 8 Lawv muab kuv haiv neeg lub txim yug lawv, lawv ntshaw noj cov tibneeg ntawd tej kev txhaum. 9 Cov pejxeem raug li cas cov pov thawj yuav raug ib yam li ntawd, kuv yuav rau txim rau lawv raws li lawv txojkev txhaum, kuv yuav ua pauj rau lawv raws li lawv tau ua. 10 Lawv yuav noj tiamsis tsis txawj tsau, lawv yuav deev luag tiamsis yuav tsis huaj vam, rau qhov lawv tso (יחוח)Yahweh tseg, 11 txhob txwm mus deev lwm tus. Tej cawv txiv hmab thiab cawv txiv hmab tshiab, txeeb tej kev nkag siab lawm.

12 Kuv haiv neeg mus ua nug rau yam uas muab ntoo ua, thiab ib tug nyuag pas qhia tej uas lawv xav paub. Lub siab uas nyiam deev luag, coj lawv mus yuam kev lawm thiab lawv tso (יחוח)Yahweh, uas yog lawv Tus Tswv tseg mus deev luag. 13 Lawv muab tsiaj xyeem rau saum tej ncov roob, thiab lawv muab qhov txhia chaw hlawv xyeem rau saum tej pov roob hauv tej qab ntoo qheb, tej ntoo txiv cev thiab tej ntoo thuv, vim tias hauv tej qab ntoo ntawd muaj duab ntxoov ntxoo zoo. Vim li ntawd koj tej ntxhais thiaj li ua nkauj ua nraug, koj tej nkauj nyab kuj mus deev lwm tus. 14 Thaum koj tej ntxhais ua nkauj ua nraug thiab koj tej nkauj nyab deev lwm tus, kuv yuav tsis rau txim, rau qhov cov txivneej kuj mus tham cov poj muag cev thiab deev cov poj muag cev xyeem rau dab, mas cov tibneeg uas tsis paub qabhau ntawd yuav raug kev puam tsuaj. 15 Ixayees es, txawm yog koj mus deev hluas nraug, los tsis txhob cia Yahdah ua txhaum li koj. Tsis txhob mus rau hauv lub moos Kilakas, lossis nce mus rau lub moos Npe‑avees, thiab tsis txhob twv tsawm hais tias, muaj (יחוח)Yahweh uas muaj txojsia nyob pom. 16 Ixayees tawv ncauj ib yam li tus xyuas nyuj tawv ncauj. (יחוח)Yahweh yuav yug lawv ib yam li yug menyuam yaj hauv lub tshav zaub dav tau lov? 17 Efa-is kuj koom nrog dab mlom lawm, cia li tso nws nyob nws. 18 Thaum lawv haus cawv tag lawm lawv kuj mus ua poj muag cev, lawv nyiam qhov uas poob ntsej muag heev dua li nyiam tau koob meej. 19 Cua daj cua dub nthuav tis qhwv nkaus lawv, lawv yuav raug txaj muag rau lawv tej kevcai xyeem dab.