Teem Txim Rau Cov Ixayees

1 Cov pov thawj es, cia li mloog tej no. Cov Ixayees es, cia li tig ntsej mloog. Vajntxwv caj ces es, cia li mloog. Nej yuav raug teem txim, vim nej ua rooj ntxiab caws rau ntawm lub moos Mixapas, thiab ua rooj hlua cuab ntawm lub moos Thanpaus.

2 Lawv khawb qhov taub tob tob rau ntawm lub moos Sithis, tiamsis kuv yuav nplawm qhuab qhia lawv cov ntawd sawvdaws.

3 Kuv paub Efa-is, thiab Ixayees nkaum tsis dhau kuv, Efa‑is es, koj mus deev hluas nraug Ixayees kuj qias puas tsuas.

4 Tej uas lawv ua tsis kheev lawv rov los cuag lawv Tus Tswv, vim lub siab uas nyiam deev luag nyob hauv lawv, thiab lawv tsis paub (יחוח)Yahweh.

5 Ixayees txojkev khav theeb kuj rov ua timkhawv kom lawv lawm, Ixayees thiab Efa-is yuav dawm ntog vim nkawv tej kev txhaum, Yahdah kuj yuav dawm ntog nrog nkawv ua ke.

6 Lawv yuav coj yaj, coj tshis, coj nyuj, mus nrhiav (יחוח)Yahweh, los kuj nrhiav tsis ntsib nws twb ncaim lawv lawm.

7 Lawv tau fav xeeb rau (יחוח)Yahweh, rau qhov lawv yug menyuam tsaub xwb. Tej kevcai hnub hli xiab yuav muab lawv thiab lawv tej teb rhuav tshem tag.

8 Cia li tshuab raj kub yaj rau hauv lub moos Kinpe‑as, cia li tshuab raj xyu rau hauv lub moos Lamas, cia li qw suab ceeb toom rau ntawm lub moos Npe‑avees. Npeeyamee es, cia li coj lawv mus.

9 Hnub uas teem txim, Efa-is yuav raug nyob do cuas. Kuv tshaj tawm txog tej uas muaj tseeb rau hauv Ixayees tej xeem. 10 Yahdah cov thawj ntxeev ua zoo li cov uas txav luag ciam teb, kuv yuav nchuav kuv txojkev npau taws rau saum lawv ib yam li nchuav dej.

11 Efa-is raug quab yuam thiab raug muab tsuj txiav txim, vim yog nws npaj siab mus raws kua tej uas qhuav qhawv xwb. 12 Vim li no kuv zoo yam nkaus li tus kab noj Efa-is, thiab zoo yam li qhov lwj kas rau Yahdah caj ces.

13 Thaum Efa-is pom nws qhov mob thiab Yahdah pom nws lub qhov txhab, Efa-is kuj mus nrhiav cov Axilias thiab txib tibneeg mus thov lawv tus vajntxwv loj. Tiamsis nws kho tsis tau nej thiab kho tsis tau nej lub qhov txhab zoo.

14 Kuv yuav zoo yam li tus tsov ntxhuav rau Efa-is, kuv yuav zoo yam li tus thav tsov ntxhuav rau Yahdah caj ces. Kuv, yog kuv ntag, yuav muab dua tag li khiav mus, kuv yuav muab cab mus thiab tsis muaj leejtwg yuav cawm tau.

15 Kuv yuav rov mus rau kuv lub chaw, mus txog thaum lawv lees paub lawv tej kev txhaum thiab nrhiav kuv lub xubntiag. Thaum lawv raug kev txom nyem nyuaj siab lawv yuav los nrhiav kuv.