HOSHEYAH 10

1 Ixayees yog tsob txiv hmab uas hlob zoo thiab txi txiv ncw. Yimhuab txi txiv ntau kuj yimhuab ua thaj teev dab ntau. Thaum lawv lub tebchaws vam meej tuaj, lawv yimhuab ua tej ncej teev dab zoo nkauj tuaj.

2 Lawv lub siab dag, nimno lawv thiaj yuav tsum ris lawv lub txim. (יחוח)Yahweh yuav tsoo lawv tej thaj pov tseg, thiab muab lawv tej ncej teev dab ua kom puam tsuaj.

3 Thaum ntawd lawv yuav hais tias, peb tsis muaj vajntxwv, vim peb tsis paub ntshai (יחוח)Yahweh. Yog peb muaj vajntxwv nws yuav pab tau peb li cas?

4 Lawv hais lus do do xwb, lawv lam cog lus twv qhuav qhuav xwb. Vim li no kev ua plaub ua ntug yuav hlav tuaj yam nkaus li tej nroj tsuag muaj taug tuaj raws kwj hniav khais hauv daim teb.

5 Cov Xamalis tshee hnyo vim txhawj txog tus dab mlom thav nyuj ntawm Npe‑avees. Lawv yuav quaj ntsuag thiab cov pov thawj uas teev dab yuav quaj nyiav tus dab mlom, vim tus dab mlom ntawd lub koob meej ploj lawm.

6 Tus dab mlom ntawd yuav raug coj mus rau Axilias tebchaws pub ua tshav ntuj rau tus vajntxwv uas loj kawg. Efa-is yuav raug poob ntsej muag, Ixayees yuav txaj muag vim yog qhov uas ua dab mlom.

7 Xamalis tus vajntxwv yuav puam tsuaj, yam nkaus li tej nplais ntoo ntab saum nplaim dej mus.

8 Tej chaw siab teev dab hauv lub moos Avees, uas yog Ixayees lub txim, yuav raug puam tsuaj tag. Tej pos thiab nroj tsuag yuav tuaj rau saum lawv tej thaj xyeem. Lawv yuav hais rau tej roob tias, cia li txhub kiag peb lauj, thiab hais rau tej pov roob tias, cia li nphau los tsuam peb.

9 Cov Ixayees es, nej yeej ua txhaum txij thaum ua hauv lub moos Kinpe‑as. Lawv tseem ua quj qees ntawm lub chaw ntawd los li. Kev ua rog tseem yuav tsis los raug lawv ntawm Kinpe‑as lov?

10 Kuv yuav tuaj rau txim rau cov tibneeg tawv ncauj ntawd. Ib tsoom tebchaws yuav sau zog tuaj ua ke tawm tsam lawv, mas lawv yuav raug khi vim muaj ob npaug kev txhaum.

11 Efa-is yog tus xyuas nyuj uas cob tau, nws nyiam tsuj qoob hauv lub tshav, kuv tsis tau yuam nws lub cej dab zoo nkauj ua haujlwm hnyav. Tiamsis kuv yuav muab Efa-is hai tus quab, Yahdah yuav tsum laij, Yakhauj yuav tsum muab lob phuaj sua.

12 Cia li tseb txojkev ncaj ncees rau nej tus kheej, cia li sau tej uas tau ntawm qhov uas hlub kuv, cia li laij daim teb uas muab tso tseg lawm, rau qhov txog sijhawm uas yuav mus nrhiav (יחוח)Yahweh, xwv nws thiaj los tso txojkev dim rau nej.

13 Nej twb cog txojkev limhiam lawm, nej twb sau txojkev phem, nej twb saws tej uas nej dag tau los noj. Vim nej tso siab rau nej tej tsheb nees ua rog thiab tso siab rau nej cov tub rog uas coob coob, 14 lub suab ua rog thiaj yuav nrov tshwm rau hauv nej haiv neeg, nej tej chaw ruaj khov huvsi yuav raug muab ua puam tsuaj, ib yam li Samas muab lub moos Npes Anpees ua puam tsuaj rau hnub uas ua rog. Leej niam raug muab ntsawm ntuag ua tej dwb daim nrog nws cov menyuam ua ke.

15 Cov tibneeg hauv Npe‑ees es, nej yuav raug li no ntag lauj, rau qhov nej txojkev limhiam loj kawg li. Thaum kaj ntug Ixayees tus vajntxwv yuav raug muab txiav tu nrho.