Hexekhiyas Txais Tos Npanpiloos Cov Tim Xyoob

1 Thaum ntawd Npaladas tus tub Melaudanpaladas uas ua vajntxwv hauv Npanpiloos txib cov tim xyoob coj tsab ntawv thiab tshav ntuj mus pub rau Hexekhiyas vim yog nws hnov xov tias Hexekhiyas mob thiab nquag lawm.

2 Mas Hexekhiyas zoo siab txais tos lawv thiab coj lawv mus saib nws tej txhab nyiaj, saib tej nyiaj, tej kub, tej txuj lom, tej roj tsim txiaj, thiab saib lub txhab uas rau cuab yeej ua rog, yog txhua yam uas nyob hauv nws tej txhab. Tsis tshuav ib yam hauv nws lub tsev thiab thoob plaws hauv nws lub tebchaws uas nws tsis muab qhia rau lawv saib.

3 Mas Isayah uas yog xibhwb cev (יחוח)Yahweh lus tuaj cuag vajntxwv Hexekhiyas, thiab hais rau nws tias, cov tibneeg no tuaj hais abtsi? Thiab lawv tuaj qhovtwg tuaj cuag koj? Hexekhiyas teb tias, lawv tuaj deb deb li tuaj, yog tuaj Npanpiloos tebchaws tuaj.

4 Isayah nug tias, lawv pom abtsi hauv koj lub vaj lub tsev? Hexekhiyas teb tias, lawv pom txhua yam hauv kuv lub vaj lub tsev, tsis tshuav ib yam hauv kuv tej txhab uas kuv tsis tau muab qhia rau lawv saib li.

5 Ces Isayah txawm hais rau Hexekhiyas tias, cia li mloog (יחוח)Yahweh uas muaj hwjchim loj kawg nkaus tej lus.

6 Saib maj, lub caij lub nyoog tabtom los txog uas txhua tsav txhua yam hauv koj lub vaj lub tsev thiab tej uas koj tej poj koob yawm txwv khaws tau cia los txog hnub no yuav raug muab coj mus rau Npanpiloos, tsis tshuav ib yam abtsi kiag li.

(יחוח)Yahweh hais li no ntag.

7 Thiab koj tej tub uas koj yug muaj qee leej yuav raug muab coj mus thiab lawv yuav ua nraug sam rau hauv vajntxwv Npanpiloos lub tsev.

8 Mas Hexekhiyas hais rau Isayah tias, (יחוח)Yahweh tej lus uas koj hais no kuj zoo. Rau qhov nws xav hauv lub siab tias, Yuav muaj kev thaj yeeb thiab nyob kaj siab lug mus tag kuv sim neej.