(יחוח)Yahweh Nplij Yeluxalees

1 (יחוח)Yahweh hais tias, cia li nplij, cia li nplij kuv haiv neeg lub siab. 2 Cia li hais lus mos lus muag rau Yeluxalees, cia li tshaj tawm rau nws paub tias qhov uas nws raug txom nyem twb txaus lawm, thiab twb zam nws tej kev txhaum lawm, nws tau txais kev rau txim ntawm (יחוח)Yahweh txhais tes ob npaug lawm. 3 Muaj ib lub suab qw hais tias, cia li npaj kev hauv tebchaws moj sab qhua rau (יחוח)Yahweh cia li ua txoj niag kev ncaj rau hauv ntuj nrag teb do rau peb Tus Tswv. 4 Txhua lub hav yuav raug muab txhub kom puv, txhua lub roob thiab tej pov roob yuav muab txo kom qes, tej kev uas ib qho siab ib qho qes yuav tiaj, tej qhov zawj yuav sib txig.

5 Mas (יחוח)Yahweh lub hwjchim ci ntsa iab yuav tshwm los, thiab ib tsoom tibneeg sawvdaws yuav pom, vim (יחוח)Yahweh lub qhov ncauj tau hais cia lawm. 6 Muaj ib lub suab hu tias, cia li qw. Mas kuv hais tias, kuv yuav qw li cas? Qw tias, Ib tsoom tibneeg yog nroj tsuag, thiab qhov uas zoo nkauj tsuas zoo li tej paj hauv daim teb xwb. 7 Tej nroj tsuag tuag tshav qhuav, tej paj kuj zeeg, rau thaum (יחוח)Yahweh tshuab pa tuaj raug. Ib tsoom tibneeg yeej yog tej nroj tsuag xwb. 8 Tej nroj tsuag tuag tshav qhuav, tej paj kuj zeeg, tiamsis (יחוח)Yahweh tej lus yuav nyob ruaj mus ib txhis. 9 Au Xi‑oo uas tshaj tawm xov zoo es, koj cia li nce mus rau saum lub roob siab. Au Yeluxalees uas tshaj tawm xov zoo es, koj cia li tsa koj lub suab kawg zog nkaus, cia li tsa suab los maj, tsis txhob ntshai li. Cia li hais rau Yahdah tej moos hais tias, no yog nej Tus Tswv.

10 Saib maj, (יחוח)Yahweh nrog nws lub hwjchim los, thiab siv nws txhais npab kav. Saib maj, nws tej tshav ntuj kuj nrog nraim nws, thiab nws tej nqe zog kuj nyob ntawm nws xubntiag. 11 Nws yuav yug nws pab yaj ib yam li tus tswv yug yaj, nws yuav qaws cov menyuam yaj los rau ntawm nws txhais npab, nws yuav muab puag rau hauv nws lub xubntiag, thiab yuav coj cov yaj uas muaj menyuam mos maj mam mus.

​

Tsis Muaj Ib Tug Zoo Cuag Li (יחוח)Yahweh

12 Leejtwg ua phoov tes luj tau tej dej tag nrho huvsi, thiab ua ib dos ntsuas tau lub ntuj, thiab ntim tej hmoov av hauv ntiajteb rau hauv ib thoob, thiab muab tej roob luj tau hauv rab teev, thiab muab tej pov roob luj hauv rab tsi?

13 Leejtwg txawj qhia (יחוח)Yahweh tus ntsuj plig, lossis ua nws lub chaw sablaj taw qhia nws? 14 Nws tau sablaj rau leejtwg es nws thiaj li nkag siab? Thiab leejtwg qhia txojkev ua ncaj thiab kev txawj ntse rau nws, thiab qhia rau nws to taub? 15 Saib maj, ib tsoom tebchaws zoo li ib teev dej hauv lub thoob xwb, thiab suav zoo li cov pluas plav saum rab teev. Nws khaws nkaus tej koog povtxwv los yam li tej hmoov av xwb. 16 Lenpanoo tsis txaus ua taws rauv, thiab tej tsiaj qus qhov ntawd tsis txaus muab ua kevcai hlawv xyeem. 17 Ib tsoom tebchaws huvsi zoo li twb tsis muaj abtsi rau ntawm nws xubntiag, nws suav tias lawv tsawg dhau thiab tsis muaj nqes kiag li. 18 Nej yuav muab (יחוח)Yahweh piv rau leejtwg, thiab muab nws tus yam ntxwv piv rau yam twg?19 Dab mlom mas yog tus Kws nchuav los, tus Kws kub muab kub luam, thiab nchuav saw nyiaj rau. 20 Tus uas pluag mas xaiv tej ntoo uas tsis txawj lwj los xyeem, nws nrhiav tus Kws txawj ua tuaj ua ib tug dab mlom uas tsis txawj ua zog. 21 Nej tsis paub lov? Nej tsis tau hnov lov? Thaum chiv thawj los tsis muaj leejtwg qhia rau nej lov? Txij thaum tsim lub ntiajteb nej tsis tau nkag siab lov?

22 (יחוח)Yahweh yog tus uas nyob thoob plaws siab saum lub ntiajteb, tej tibneeg ntiajteb tsuas zoo yam li tej kooj xwb. Nws nthuav lub ntuj ib yam li nthuav daim ntaub, thiab muab nthuav yam li lub tsev ntaub los nyob. 23 Nws muab cov thawj uas ua hlob hle nyob do cuas, thiab ua rau cov uas kav lub ntiajteb nyob qhuav qhawv.

24 Thaum muab lawv cog tsis ntev, thiab muab lawv tseb tsis ntev lawm, thiab lawv nrhau cag rau hauv av tsis ntev lawm, nws tshuab pa rau saum lawv, lawv kuj tuag tshav qhuav tag, thiab cua daj cua dub muab ntsawj ya mus yam li tej quav nyab. 25 Tus uas Dawbhuv hais tias, nej yuav muab kuv piv rau leejtwg, uas zoo thooj li kuv? 26 Cia li tsa muag saib saum ntuj, leejtwg tsim tej no? Yog tus uas coj tej hnub qub huvsi los suav thiab hu txhua lub los raws li tej npe. Vim nws muaj hwjchim loj kawg nkaus thiab muaj zog heev, thiaj tsis tu ncua ib lub li.

27 Yakhauj es, ua cas koj hais, Ixayees es, ua cas koj hais tias, (יחוח)Yahweh tsis pom kuv txojkev lawm, kuv Tus Tswv tsis tuav kuv txojcai lawm? 28 Koj tsis paub lov? Koj tsis tau hnov lov? (יחוח)Yahweh yog Tus Tswv uas nyob mus ib txhis, yog tus uas tsim thoob plaws qab ntuj kawg. Nws tsis tsaug leeg, nws tsis txog siav, nws txojkev txawj ntse tsis muaj leejtwg paub tag. 29 Nws pub zog rau tus uas tsaug leeg, thiab txhab zog rau tus uas tsis muaj zog. 30 Txawm yog cov hluas los yuav tsaug leeg thiab txog siav, thiab cov txivneej hluas kuj yuav dawm ntog tag. 31 Tiamsis cov uas tos rawv (יחוח)Yahweh yuav tau zog tshiab tuaj, lawv yuav muaj tis ya siab yam li tej dav, lawv yuav dhia tsis txawj txog siav, lawv yuav mus kev tsis txawj tsaug leeg.