Cov Ixayees Kov yeej Aus

1 Peb txawm tig hlo taug txojkev uas mus pem Npasas, mas Npasas tus vajntxwv Aus thiab nws cov tub rog sawvdaws kuj tawm tuaj ua rog rau peb ntawm Ede‑is.

2 Tiamsis (יחוח)Yahweh hais rau kuv tias, tsis txhob ntshai nws, rau qhov kuv twb muab nws thiab nws cov tibneeg sawvdaws thiab nws lub tebchaws huvsi rau hauv koj txhais tes, mas koj yuav ua rau nws ib yam nkaus li koj twb ua rau cov Amaulais tus vajntxwv Xihoos uas nyob hauv Hesanpoos lawd.

3 (יחוח)Yahweh uas yog peb Tus Tswv thiaj muab Npasas tus vajntxwv Aus thiab nws cov tibneeg huvsi rau hauv peb txhais tes thiab peb muab lawv ntaus tua mus txog thaum tsis tshuav ib tug nyob li.

4 Thaum ntawd peb txeeb tau nws tej moos huvsi tsis tshuav ib lub uas peb txeeb tsis tau ntawm lawv li. Huvsi yog rau caum lub moos, uas yog tag nrho Akaus tebchaws uas yog lub tebchaws Npasas uas vajntxwv Aus kav.

5 Tej moos no txhua lub muaj ntsa loog xov puag ncig siab siab, muaj rooj loog, muaj las rooj huvsi thiab peb txeeb tau tej zej zog uas tsis muaj ntsa loog ntau heev li.

6 Peb muab lawv ua puam tsuaj tag huvsi ib yam nkaus li peb ua rau Hesanpoos tus vajntxwv Xihoos. Peb muab txhua lub moos tej pojniam txivneej me nyuam ua puam tsuaj tag huvsi.

7 Tiamsis tej tsiaj txhu huvsi thiab tej qhov txhia chaw uas peb txeeb tau hauv tej moos ntawd, peb coj los ua peb tug.

8 Thaum ntawd peb txeeb tau lub tebchaws ntawm cov Amaulais ob tug vajntxwv txhais tes uas nyob ntug dej Yaladees sab hnub tuaj txij ntua ntawm lub hav Anoos mus txog lub roob Hawmoos.

9 (Lub roob Hawmoos ntawd cov tibneeg Xaidoos hu ua Xili-oos thiab cov Amaulais hu ua Xenis).

10 Peb txeeb tau txhua lub moos pem tej nras tiaj toj siab thiab Kile‑as tebchaws thiab Npasas tebchaws huvsi mus txog ntua Xalekhas thiab Ede‑is uas yog tej moos uas Npasas tus vajntxwv Aus kav.

11 (Npasas tus vajntxwv Aus yog tibneeg Lefa‑is uas tshuav nws tib leeg xwb. Nws lub txaj pw yog xuas hlau ua. Nws lub txaj ntawd tseem nyob hauv cov Asmoos lub moos Lanpas. Lub txaj ntawd ntev cuaj tshim dav plaub tshim raws li peb tej tshim nimno).

​

Cov Xeem Uas Nyob Dej Yaladees Sab Hnub Tuaj

12 Lub tebchaws uas lub sijhawm ntawd peb txeeb tau ntawd, txij ntawm Alau‑aws uas nyob ntawm ntug dej Anoos thiab tej toj siab hauv Kile‑as tebchaws ib nrab thiab tej moos uas nyob hauv, kuv muab rau xeem Lunpees thiab xeem Kas.

13 Tebchaws Kile‑as uas tseem tshuav thiab Npasas tebchaws huvsi uas yog vajntxwv Aus kav, yog tag nrho Akaus tebchaws, kuv muab rau ib nrab xeem Manaxes. Tag nrho teb chaws Npasas ntawd yav tag los hu ua cov Lefa‑is li tebchaws.

14 Ya‑is uas yog xeem Manaxes kuj txeeb tau Akaus tebchaws huvsi mus txog ntua cov Kesus thiab cov Ma‑akhas ciam teb, thiab nws hu tebchaws Npasas ntawd hu ua Havauya‑is raws li nws lub npe los txog niaj hnub nimno.

15 Kuv muab Kile‑as rau Makhis,

16 mas kuv muab tej tebchaws no rau xeem Lunpees thiab xeem Kas, yog txij ntua Kile‑as mus txog lub hav Anoos, muab lub plawv hav Anoos ua ciam teb, mus txog ntua tus dej Yanpos uas yog cov Asmoos ciam teb.

17 Thiab tag nrho Alanpas uas muaj tus dej Yaladees ua ciam teb thiab txij ntua ntawm Khineles mus txog ntua hiavtxwv Alanpas uas yog Hiavtxwv Ntsev, ntawm taw roob Pixakas uas nyob sab hnub tuaj.

18 Thaum ntawd kuv twb hais rau nej tias, (יחוח)Yahweh uas yog nej Tus Tswv tau pub lub tebchaws no rau nej yuav ua nej tug. Nej cov txivneej txhua tus uas txawj ua rog yuav tau nqa cuab yeej hla ua nej cov kwvtij Ixayees ntej mus.

19 Tiamsis nej cov pojniam, cov menyuam yaus thiab nej tej tsiaj txhu, uas kuv paub tias nej muaj tsiaj txhu coob, mas yuav nyob rau hauv tej moos uas kuv twb muab rau nej lawd,

20 mus txog thaum uas (יחוח)Yahweh pub kom nej tej kwvtij tau so ib yam li nws twb pub rau nej tau so lawm, mus txog thaum lawv txeeb tau lub tebchaws uas (יחוח)Yahweh uas yog nej Tus Tswv pub rau lawv sab dej Yaladees tim ub lawd, mas nej li rov qab los rau hauv nyias teb nyias chaw uas kuv twb muab rau nej lawd.  

21 Thaum ntawd kuv twb hais rau Yahshua tias, koj lub qhov muag twb pom txhua yam uas (יחוח)Yahweh uas yog nej Tus Tswv tau ua rau ob tug vajntxwv no lawd. (יחוח)Yahweh yuav ua ib yam nkaus li ntawd rau txhua lub tebchaws uas nej yuav mus rau hauv.  

22 Nej tsis txhob ntshai lawv li rau qhov nej Tus Tswv (יחוח)Yahweh yog tus uas yuav ua rog pab nej.

​

Tsis Kheev Mauxes Mus Khana‑as

23 Thaum ntawd kuv thov thov (יחוח)Yahweh hais tias,

24 Au (יחוח)Yahweh, koj nyuam qhuav pib ua koj lub hwjchim loj thiab koj txhais tes uas muaj zog tshwm rau koj tus tub qhe pom. Muaj ib tug timtswv twg uas nyob saum ntuj lossis hauv ntiajteb no yuav ua tau tej haujlwm thiab tej txujci tseem ceeb uas koj ua tau?

25 Thov koj pub kuv hla mus saib lub tebchaws zoo uas nyob sab dej Yaladees tim ub, saib tej toj siab uas zoo zoo thiab Lenpanoos.

26 Tiamsis (יחוח)Yahweh chim rau kuv vim yog tim nej, nws thiaj li tsis mloog kuv tej lus thov. Nws hais rau kuv tias, txaus lawm lauj! Koj tsis txhob hais txog tej no rau kuv dua li lawm.

27 Koj cia li nce mus rau saum lub ncov roob Pixakas es tsa qhov muag saib rau sab hnub poob, sab ped, sab nrad, sab hnub tuaj, tsa qhov muag saib lub tebchaws ntawd xwb, rau qhov koj yuav hla tsis tau tus dej Yaladees no rau sab tid li.

28 Koj cia li hais rau Yahshua thiab txhawb nws lub zog thiab txhawb nws lub siab kom ruaj khov, rau qhov nws yuav coj haiv neeg no hla mus thiab yuav coj lawv mus tuav lub tebchaws uas koj pom no ua lawv teej lawv tug.

29 Ces peb thiaj tsuam hauv lub hav uas ncaj lub moos Npepe‑aus.