KEVCAI 2

Nyob Tebchaws Moj Sab Qhua

1 Thaum ntawd peb thiaj li tig rov mus rau hauv tebchaws moj sab qhua, taug txojkev uas mus rau Hiavtxwv Liab raws li (יחוח)Yahweh tau hais rau kuv lawd. Peb thiaj mus lug lub roob Xe‑is ntau hnub.

2 Mas (יחוח)Yahweh thiaj hais rau kuv tias,

3 nej twb lug tebchaws toj siab Xe‑is no ntev txaus lawm. Koj cia li tig hlo mus rau sab ped.

4 Mas koj hais rau cov pejxeem tias, nej twb yuav hla nej cov kwvtij lub tebchaws uas yog Exaus tej tub ki uas nyob hauv Xe‑is. Lawv yuav ntshai nej, vim li no, nej yuav tau ceev faj.

5 Nej tsis txhob ua rog rau lawv, vim kuv tsis pub lawv lub tebchaws rau nej, txawm yog ib nyuag qhov av dav li lub xib taws tsuj los kuv tsis pub rau nej, rau qhov kuv twb muab kiag lub roob Xe‑is ntawd pub rau Exaus yuav ua nws tug lawm.

6 Nej yuav tau muab nyiaj yuav lawv li mov noj thiaj tau noj, thiab muab nyiaj yuav lawv li dej thiaj tau dej haus.

7 (יחוח)Yahweh uas yog nej Tus Tswv twb foom koob hmoov rau txhua yam hauj lwm uas nej txhais tes tau ua. Nws tsom kwm nej rau thaum nej taug kev mus hauv lub niag tuam tebchaws moj sab qhua no. Tau plaub caug xyoo, (יחוח)Yahweh uas yog nej Tus Tswv twb nrog nej nyob mas nej twb tsis tu ncua ib yam abtsi li.

8 Mas peb cia li sawv kev mus lug kiag peb cov kwvtij uas yog Exaus tej tub ki uas nyob hauv Xe‑is. Peb tawm ntawm txojkev Alanpas uas mus ntawm Elab thiab Exi‑oos Kenpaws, thiab peb lug taug txoj kev uas mus rau tebchaws moj sab qhua Mau‑as.

9 Mas (יחוח)Yahweh hais rau kuv tias, koj tsis txhob zes cov Mau‑as, tsis txhob ua rog rau lawv, rau qhov kuv yeej yuav tsis muab lawv lub tebchaws ib nyuag qhov rau koj yuav ua koj tug, vim kuv twb muab teb chaws As ntawd rau Lauj caj ces yuav ua lawv tug lawm.

10 (Lub tebchaws ntawd thaum ub cov tibneeg Emis nyob. Lawv yog cov tibneeg uas loj thiab coob heev, thiab siab ib yam nkaus li cov tibneeg Anaj.

11 Cov tibneeg no muaj dua ib lub npe hu ua Lefa‑is, ib yam li hu cov Anaj, tiamsis cov Mau‑as hu lawv cov no ua Emis.

12 Thaum ub cov Haulis kuj nyob hauv Xe‑is, tiamsis Exaus caj ces ntiab lawv khiav thiab muab lawv ua puam tsuaj tag, thiab los nyob lawv lub chaw, ib yam nkaus li cov Ixayees ua rau lub tebchaws uas (יחוח)Yahweh pub rau lawv yuav ua lawv tug.)  

13 Nimno koj cia li sawv kev hla lub hav dej Xelej. Peb thiaj hla lub hav dej Xelej.

14 Suav txij thaum peb tawm ntawm Khades Npanias los txog thaum peb hla lub hav dej Xelej ntawd, yog peb caug yim xyoo mus txog thaum cov txivneej uas ua tau rog hauv tiam tibneeg ntawd tuag tag huvsi rau hauv zos lawm, raws li (יחוח)Yahweh tau twv rau lawv lawm.

15 Yeej yog (יחוח)Yahweh txhais tes tawm tsam lawv ua rau lawv puam tsuaj hauv zos tag mus txog thaum ua rau lawv ploj tag huvsi lawm.

16 Thaum cov txivneej uas ua tau rog ntawd tuag ploj tag hauv cov pejxeem lawd,

17 (יחוח)Yahweh thiaj hais rau kuv tias,

18 hnub no koj yuav hla Mau‑as lub tebchaws ntawm As mus.

19 Mas thaum koj mus txog cov Asmoos ciam teb, tsis txhob zes lawv, tsis txhob ua rog rau lawv, rau qhov kuv yeej yuav tsis muab cov Asmoos lub tebchaws ib nyuag qhov rau koj yuav ua koj tug, vim yog kuv twb muab lub tebchaws no rau Lauj caj ces yuav ua lawv tug lawm.

20 (Luag suav tias lub teb chaws ntawd yog cov Lefa‑is li tebchaws. Yav thaum ub cov tibneeg Lefa‑is nyob qhov ntawd, tiamsis cov Asmoos hu cov Lefa‑is ua Xaxumis.

21 Cov tibneeg ntawd loj thiab coob heev, thiab siab ib yam nkaus li cov Anaj, tiamsis (יחוח)Yahweh tau muab lawv ua puam tsuaj tag rau ntawm cov Asmoos xub ntiag mas cov Asmoos thiaj txeeb tau lawv lub tebchaws thiab los nyob lawv lub chaw,

22 ib yam nkaus li (יחוח)Yahweh twb pab Exaus caj ces uas nyob Xe‑is thaum (יחוח)Yahweh ua rau cov Haulis puam tsuaj tag ntawm lawv hauv ntej, mas Exaus caj ces thiaj li txeeb tau cov Haulis tebchaws thiab los nyob lawv lub chaw los txog niaj hnub nimno.

23 Cov tibneeg Avis uas nyob tej zej zog mus txog ntua Kaxas, mas cov tibneeg Khathaulis uas tuaj Khathaus tuaj, kuj muab lawv ua puam tsuaj tag thiab los nyob lawv lub chaw.)

24 Koj cia li sawv kev mus hla tus dej Anoos. saib maj, kuv twb muab Hesanpoos tus vaj ntxwv Xihoos uas yog tibneeg Amaulais thiab nws lub tebchaws rau hauv koj txhais tes lawm. Koj cia li pib txeeb lub tebchaws ntawd thiab ua rog rau nws.

25 Hnub no kuv yuav pib ua rau ib tsoom tibneeg hauv qab ntuj no ras thiab ntshai nej. Lawv yuav hnov xov txog nej mas yuav ntshai tshee nyho thiab txhawj kawg li.

​

Cov Ixayees Kov Yeej Xihoos

 26 Mas kuv thiaj li txib tibneeg xa xov hauv tebchaws moj sab qhua Khedemaus mus cuag Hesanpoos tus vajntxwv Xihoos mus hais ib lo lus tshav ntuj rau nws tias,

27 thov cia kuv hla koj lub tebchaws. Kuv yuav taug txoj niag kev hlob xwb tsis tig mus rau sab xis lossis sab laug li.

28 Thov koj muag zaub mov rau kuv thiab yuav kuv tej nyiaj xwv kuv thiaj tau mov noj. Thov koj muag dej rau kuv thiab yuav kuv tej nyiaj xwv kuv thiaj tau dej haus. Thov koj cia kuv xuas kotaw hla koj lub teb chaws mus xwb,

29 ib yam li Exaus caj ces uas nyob hauv Xe‑is thiab ib yam li cov Mau‑as uas nyob hauv As tebchaws tau cia kuv hla lawv tebchaws lawm, mus txog thaum kuv hla tus dej Yaladees mus rau hauv lub tebchaws uas (יחוח)Yahweh uas yog peb Tus Tswv pub rau peb.

30 Tiamsis Hesanpoos tus vajntxwv Xihoos tsis kheev cia peb hla nws lub teb chaws, rau qhov nej Tus Tswv (יחוח)Yahweh tau ua rau nws siab loj siab tawv, kom thiaj muab tau nws rau hauv nej txhais tes yam li niaj hnub nimno.

31 Mas (יחוח)Yahweh hais rau kuv tias, saib maj, kuv twb pib muab Xihoos thiab nws lub tebchaws rau koj lawm. Cia li nqes tes kiag mus txeeb lub tebchaws ntawd los nyob ua nej tug.

32 Mas Xihoos thiab nws cov tub rog sawv daws txawm tuaj ua rog rau peb ntawm Yahaj.

33 Mas (יחוח)Yahweh uas yog peb Tus Tswv muab nws rau peb mas peb thiaj ntaus yeej nws thiab nws cov tub thiab nws cov tibneeg huvsi.

34 Thaum ntawd peb thiaj txeeb tau nws tej moos huvsi thiab peb muab txhua lub moos ntawd ua kom puam tsuaj tag, muab cov txiv neej, cov pojniam, cov menyuam, ua puam tsuaj tag huvsi tsis tseg ib tug li.   

35 Tiamsis tej tsiaj txhu thiab tej qhov txhia chaw hauv tej moos uas peb ntaus tau ntawd, peb coj los ua peb tug.

36 Txij ntua lub moos Alau‑aws uas nyob ntug hav Anoos thiab txij ntua ntawm lub moos uas nyob hauv lub hav ntawd mus txog ntua lub moos Kile‑as, mas tsis muaj ib lub moos ruaj khov uas tiv tau peb. (יחוח)Yahweh uas yog peb Tus Tswv twb muab huvsi rau hauv peb txhais tes lawm.

37 Tiamsis nej tsis tau mus ze cov Asmoos lub tebchaws, nej tsis mus ze ntug dej Yanpos thiab tsis mus ze tej moos uas nyob pem toj siab, thiab tsis mus rau tej chaw uas (יחוח)Yahweh uas yog peb Tus Tswv txwv tsis pub peb mus.