KEVCAI 1

Mauxes Rov Hais Txog (יחוח)Yahweh Tej Kevcai

1 Tej lus no yog tej lus uas Mauxes hais rau ib tsoom Ixayees sawvdaws hauv tebchaws moj sab qhua ntawm dej Yaladees sab hnub tuaj, yog ntawm lub tiaj Alanpas ncaj lub moos Xus thiab nyob hauv nruab nrab cov moos no yog Palas, Thaufees, Lanpas, Haxelaus thiab Dixahas.

2 Txoj kev ntawm Haules uas hla lub roob Xe‑is mus rau Khades Npanias mas yog kaum ib hnub ke.   

3 Lub kaum ib hlis, hnub xiab ib, uas yog xyoo plaub caug, Mauxes hais txhua txoj kevcai uas (יחוח)Yahweh hais rau Mauxes lawd rau cov Ixayees.

4 Yog hais tom qab uas nws twb kov yeej cov Amaulais tus vajntxwv Xihoos uas nyob hauv Hesanpoos thiab Npasas tus vajntxwv Aus uas nyob hauv Athalaus thiab hauv Ede‑is.

5 Mauxes pib qhia txoj kevcai no hauv Mau‑as tebchaws ntawm tus dej Yaladees sab hnub tuaj hais tias,

6 (יחוח)Yahweh uas yog peb Tus Tswv twb hais rau peb ntawm Haules tias, nej so ntawm lub roob no ntev txaus lawm.

7 Nej cia li tig hlo sawv kev mus pem toj siab Amaulais tebchaws thiab mus txog tej tibneeg uas nyob ze hauv Alanpas, yog tej uas nyob pem roob thiab ntawm tej pov roob Sefelas, thiab ntawm Nekes, thiab nyob ntawm ntug hiavtxwv, thiab hauv Khana‑as tebchaws, thiab Lenpanoos tebchaws, mus txog ntua tus dej Yufetis.

8 Saib maj, kuv muab lub tebchaws no tso rau ntawm nej xub ntiag lawm. Nej cia li txeem mus txeeb lub teb chaws uas (יחוח)Yahweh cog lus ruaj khov rau nej tej poj koob yawm txwv, uas yog Anplaham, Ixaj thiab Yakhauj hais tias, yuav muab pub rau lawv thiab lawv caj ces.

​

Tsa Cov Uas Pab Tu Plaub

9 Thaum ntawd kuv twb hais rau nej tias, kuv tib leeg xwb ris tsis taus nej.

10 (יחוח)Yahweh uas yog nej Tus Tswv pub nej huaj vam coob tuaj, mas sim saib, niaj hnub nimno nej coob npaum li tej hnub qub saum nruab ntug.

11 Thov (יחוח)Yahweh uas yog nej tej poj koob yawm txwv Tus Tswv pub kom nej huaj vam ib txhiab npaug ntxiv thiab foom koob hmoov rau nej raws li nws twb cog lus tseg rau nej lawm.

12 Kuv tib leeg yuav ua li cas ris tau nej tej kev ceeblaj, thiab tej nra, thiab tej uas nej sib cav sib ceg?  

13 Cia li xaiv cov uas muaj tswvyim thiab txawj ntse thiab sawvdaws hwm hauv nej txhua xeem los es kuv yuav muab lawv tsa ua thawj coj rau nej.

14 Nej twb teb kuv tias, yam uas koj hais ko zoo lawm, tsim nyog peb ua.

15 Kuv thiaj muab cov thawj hauv nej txhua xeem uas muaj tswvyim thiab sawvdaws hwm tsa ua thawj coj rau nej kom ua tus kav ib txhiab, kav ib puas, kav tsib caug, kav kaum leej thiab ua nom tswv rau hauv nej txhua xeem.

16 Thaum ntawd kuv twb hais rau cov uas tu nej tej plaub tias, nej yuav tau tshuaj saib tej plaub ntug uas cov kwvtij muaj thiab tu tej plaub kom ncaj rau ob tog, tsis hais kwvtij lossis lwm haiv neeg uas nrog nej nyob.

17 Nej tsis txhob tuaj ib tog tu plaub, nej yuav tau mloog tus yau thiab tus hlob hais ib yam nkaus. Nej tsis txhob ntshai tibneeg, rau qhov tej kev tu plaub ntawd yog (יחוח)Yahweh li. Tej plaub uas ceeblaj, nej tu tsis tau ces cia li coj tuaj rau kuv, kuv mam li tshuaj saib.

18 Thaum ntawd kuv twb hais rau nej txog txhua yam uas nej yuav tau ua lawm.

​

Xa Cov Uas Tshuaj Tebchaws Ntawm Khades Npanias Mus

19 Peb thiaj tawm ntawm Haules mus dhau plaws lub niag tebchaws moj sab qhua dav heev uas txaus ntshai kawg uas nej twb pom ntawd, taug txoj kev pem toj siab Amaulais tebchaws raws li uas (יחוח)Yahweh uas yog peb Tus Tswv hais rau peb lawd, thiab peb los txog Khades Npanias.

20 Kuv twb hais rau nej tias, nej los txog toj siab Amaulais tebchaws lawm uas (יחוח)Yahweh uas yog peb Tus Tswv pub rau peb.

21 Saib maj, (יחוח)Yahweh uas yog nej Tus Tswv twb muab lub tebchaws ntawd rau nej lawm. Cia li txeem mus txeeb ua nej tug raws li (יחוח)Yahweh uas yog nej tej poj koob yawm txwv Tus Tswv hais cia lawd. Tsis txhob ntshai, tsis txhob poob siab li.

22 Nej sawvdaws txawm tuaj hais rau kuv tias, cia peb tso tibneeg ua peb ntej mus tshuaj lub tebchaws ntawd, es lawv li rov los qhia peb paub tej kev uas peb yuav mus thiab paub tej moos uas peb yuav mus ntawd.

23 Tej uas nej hais ntawd, kuv kuj pom zoo, kuv thiaj xaiv kaum ob leeg hauv nej ib xeem ib leeg.

24 Mas lawv cov ntawd thiaj sawv kev mus txog pem toj siab mus txog lub hav Ekhaus mus tshuaj qhov ntawd.

25 Lawv thiaj de tej txiv hmab txiv ntoo coj los rau peb thiab coj xov los rau peb hais tias, tej uas (יחוח)Yahweh uas yog peb Tus Tswv pub rau peb mas yog ib lub tebchaws zoo heev.

26 Txawm yog li ntawd los nej tsis yeem txeem mus li. Tiamsis nej tseem tawv nyom (יחוח)Yahweh uas yog nej Tus Tswv tej lus.

27 Thiab nej tseem yws hauv nej tej tsev ntaub hais tias, yog vim (יחוח)Yahweh ntxub peb, (יחוח)Yahweh thiaj coj peb tawm hauv Iziv tebchaws los yuav muab peb cob rau hauv cov Amaulais txhais tes thiab muab peb ua kom puam tsuaj.

28 Peb yuav txeem mus rau qhov twg? Peb cov kwvtij ua rau peb siab ntsws yaj tag. Lawv hais tias, cov tibneeg ntawd muaj zog dua peb, siab dua peb. Lawv tej moos kuj loj muaj ntsa loog siab nto ntuj, thiab peb tseem pom cov tibneeg Anaj nyob qhov ntawd thiab.  

29 Kuv txawm hais rau nej tias, tsis txhob ras tsis txhob ntshai lawv li.

30 (יחוח)Yahweh uas yog nej Tus Tswv ua nej ntej mus mas nws yuav ua rog pab nej ib yam li nws twb pab nej hauv Iziv tebchaws tab meeg nej lub qhov muag.  

31 Thiab hauv tebchaws moj sab qhua, uas nej twb pom (יחוח)Yahweh uas yog nej Tus Tswv muab nej puag ib yam li leej txiv puag nws tus menyuam tub, mus thoob txojkev uas nej mus ntawd, mus txog thaum uas nej los txog ntawm no.

32 Txawm li cas los xij, los nej pheej tsis ntseeg (יחוח)Yahweh uas yog nej Tus Tswv,

33 uas ua nej ntej mus nrhiav chaw rau nej tsuam chaw nyob, hmo ntuj ua nplaim taws, nruab hnub ua tauv huab qhia nej paub txojkev uas nej yuav tau mus.

​

(יחוח)Yahweh Rau Txim Rau Cov Ixayees

34 (יחוח)Yahweh twb hnov nej tej lus mas nws thiaj npau taws thiab twv kiag tias,

35 tiam tibneeg phem no yuav tsis muaj ib tug tau pom lub tebchaws zoo uas kuv cog lus ruaj khov tias yuav muab pub rau nej tej poj koob yawm txwv.

36 Tsuas yog Yefunes tus tub Khalej thiaj pom xwb. Thiab kuv yuav pub lub tebchaws uas nws tau tsuj ntawd rau nws thiab nws tej tub ki, rau qhov nws ua raws li (יחוח)Yahweh lub siab nyiam kawg siab kawg ntsws.  

37 Vim yog tim nej, (יחוח)Yahweh thiaj chim rau kuv thiab thiaj hais tias, koj yuav tsis tau mus rau hauv lub tebchaws ntawd thiab.  

38 Noos tus tub Yahshua uas sawv koj chaw yuav tau mus rau hauv. Cia li txhawb nws lub zog, rau qhov nws yuav coj cov Ixayees mus tuav tau lub tebchaws ntawd ua qub txeeg qub teg.

39 Thiab nej tej menyuam yaus uas nej hais tias, yuav raug luag ntes coj mus thiab nej tej menyuam uas hnub no tsis paub qhov zoo qhov phem, yuav tau txeem mus rau hauv. Kuv yuav pub lub tebchaws ntawd rau lawv mas lawv yuav tau los ua lawv tug.

40 Tiamsis nej mas, nej cia li tig hlo mus rau hauv teb chaws moj sab qhua taug txojkev uas mus rau Hiavtxwv Liab.

41 Ces nej txawm teb kuv tias, peb tau ua txhaum rau (יחוח)Yahweh lawm, peb yuav nce mus ua rog raws li (יחוח)Yahweh uas yog peb Tus Tswv hais rau peb. Nej cov txivneej sawvdaws thiaj li coj kiag cuab yeej ua rog thiab xav tias yuav yooj yim nce mus rau pem tebchaws toj siab.

42 (יחוח)Yahweh hais rau kuv tias, cia li hais rau lawv tias, tsis txhob nce mus ua rog, vim kuv tsis nyob hauv nej nruab nrab lawm, tsam ces nej swb yeeb ncuab.

43 Kuv thiaj hais li ntawd rau nej tiamsis nej tsis mloog thiab nej tawv nyom tej uas (יחוח)Yahweh hais kom nej ua. Nej lub siab khav theeb, khav txiv, mas nej nce mus pem toj siab.

44 Mas cov Amaulais uas nyob pem toj siab ntawd, tawm tuaj ntaus nej, caum nej yam nkaus li xub ntab caum, thiab ntaus nej swb kiag ntawm Xe‑is mus txog ntua Haumas.

45 Ces nej ho los quaj rau ntawm (יחוח)Yahweh xub ntiag, tiamsis (יחוח)Yahweh kuj tsis quav ntsej nej lub suab quaj thiab tsis tig ntsej mloog nej.

46 Nej thiaj li nyob ntawm Khades tau ntau hnub, ntev li uas nej nyob ntawd.