XWM TXHEEJ TAUG KEV 36

Cov Ntxhais Qub Txeeg Qub Teg

(Xwm Txheej Taug Kev 27:1-11)

1 Cov thawj hauv tej tsev tibneeg hauv Kile‑as cum tuaj cuag Mau-xes. Kile‑as txiv yog Makhis, Makhis txiv yog Manaxes uas yog Yahxej caj ces. Lawv hais rau Mauxes thiab cov uas ua hlob, yog cov uas ua thawj hauv txhua xeem Ixayees hais tias, 

2 (יחוח)Yahweh tau kom koj uas yog peb Tus Tswv muab lub tebchaws rho ntawv faib ua qub txeeg qub teg rau cov Ixayees. Thiab (יחוח)Yahweh kom koj uas yog peb Tus Tswv muab Xelaufehas uas yog peb kwvtij li qub txeeg qub teg pub rau nws tej ntxhais. 

3 Tiamsis yog tej ntxhais ntawd yuav cov Ixayees lwm xeem tej tub mas lawv tej qub txeeg qub teg ntawd yuav raug muab rho tawm hauv peb tej poj koob yawm txwv qub txeeg qub teg mus tsav ntxiv rau lwm xeem li qub txeeg qub teg uas tej ntxhais mus yuav ntawd, mas thiaj yuav coj qub txeeg qub teg uas peb rho ntawv tau tawm hauv peb mus. 

4 Mas txog xyoo Zoo Siab uas thim txhua yam rov qab rau cov Ixayees, ces cov ntxhais ntawd tej qub txeeg qub teg yuav raug muab tsav rau hauv lwm xeem uas cov ntxhais mus yuav. Ces cov ntxhais ntawd li qub txeeg qub teg yuav raug muab rho tawm hauv peb xeem li qub txeeg qub teg mus lawm. 

5 Mauxes thiaj hais rau cov Ixayees raws li (יחוח)Yahweh kom nws hais tias, Yahxej cov tub xeem hais raug lawm. 

6 No yog tej uas (יחוח)Yahweh hais txog Xelaufehas tej ntxhais. Cia lawv yuav tus uas lawv txaus siab, tiamsis yuav tau yuav cov uas yog lawv txiv xeem. 

7 Mas cov Ixayees qub txeeg qub teg thiaj yuav tsis raug muab rho hauv ib xeem mus rau lwm xeem, vim cov Ixayees txhua tus yuav tau tuav rawv tej poj koob yawm txwv qub txeeg qub teg rau hauv nws xeem.

8 Thiab tej ntxhais txhua tus hauv cov xeem Ixayees uas tau qub txeeg qub teg ua nws tug mas yuav tau yuav txiv rau hauv nws txiv xeem xwb, xwv cov Ixayees txhua tus thiaj tuav tau nws tej poj koob yawm txwv qub txeeg qub teg cia ua nws tug. 

9 Ua li no thiaj tsis raug muab qub txeeg qub teg rho hauv ib xeem mus rau lwm xeem, rau qhov cov Ixayees txhua xeem nyias yuav tuav nyias qub txeeg qub teg cia.

10 Xelaufehas cov ntxhais ua raws li (יחוח)Yahweh hais rau Mauxes.

11 Mas Malas, Thilaxas, Haulas, Meekhas thiab Nau‑as uas yog Xelaufehas cov ntxhais, lawv yuav lawv txiv tej kwvtij cov tub ua txiv xwb.

12 Lawv yuav txiv hauv lawv xeem Manaxes uas yog Yahxej tus tub, mas lawv qub txeeg qub teg thiaj nyob hauv lawv txiv xeem mus li. 

13 Tej no yog tej lus cob qhia thiab tej kab ke uas (יחוח)Yahweh hais kom Mauxes hais rau cov Ixayees ntawm lub tiaj Mau‑as ntawm ntug dej Yaladees uas ncaj lub moos Yelikhaus.