Cov Levis Tej Moos

1 (יחוח)Yahweh hais rau Mauxes ntawm lub tiaj Mau‑as ntawm ntug dej Yaladees uas ncaj lub moos Yelikhaus tias,

2 cia li kom cov Ixayees muab tej qub txeeg qub teg uas lawv tau ua lawv tug lawm rho tej lub moos rau cov Levis nyob thiab pub tshav zaub ib ncig lub moos rau lawv.

3 Cia tej moos ntawd ua lawv tug ua chaw rau lawv nyob thiab pub tshav zaub rau lawv tau yug nyuj, yug yaj, yug tshis, yug tsiaj txhu huvsi. 

4 Tej tshav zaub ntawm lub moos uas nej yuav tu rau cov Levis ntawd mas tseg txij ntua lub ntsa loog mus dav li ib txhiab tshim puag ncig. 

5 Thiab koj yuav tau ntsuas lub moos sab nraud kom dav ob txhiab tshim sab hnub tuaj, ob txhiab tshim sab nrad, ob txhiab tshim sab hnub poob thiab ob txhiab tshim sab ped, cia lub moos nyob hauv nruab nrab. No yog lawv tej moos li tshav zaub uas ua lawv tug. 

6 Tej moos uas koj yuav pub rau cov Levis mas yuav pub rau lub moos ua moos cawm siav uas nej yuav kheev cia tus uas tua tibneeg khiav mus nyob, thiab yuav pub dua plaub caug ob lub moos rau cov Levis.

7 Tej moos uas nej pub rau cov Levis huvsi yog plaub caug yim lub moos thiab muaj tshav zaub. 

8 Tej moos uas nej yuav muab rho hauv cov Ixayees li feem ntawd mas, xeem uas coob nej kuj rho ntau, xeem uas tsawg kuj rho tsawg. Txhua xeem tau qub txeeg qub teg ntau thiab tsawg npaum li cas mas yuav pub tej moos rau cov Levis raws li lawv tau. 

​

Tej Moos Cawm Siav

(Kevcai 19:1-13; Yahsua Noos.  20:1-9)

9 (יחוח)Yahweh hais rau Mauxes tias,

10 cia li hais rau cov Ixayees tias, thaum nej hla tus dej Yaladees mus rau hauv Khana‑as tebchaws,

11 mas nej yuav xaiv tej moos uas cawm siav rau nej, es yog leejtwg tau tua tibneeg tiamsis tsis yog txhob txwm tua ces thiaj li tau khiav mus rau hauv.

12 Tej moos ntawd yuav ua tej moos cawm siav rau tus uas khiav tus rob caub, kom tus uas tua tibneeg ntawd thiaj tsis tuag ua ntej rau thaum uas nws tsis tau sawv tab meeg cov pejxeem rau ntawm lub rooj txiav txim.

13 Tej moos uas nej tu ua moos cawm siav ntawd mas yog rau lub.

14 Nej tu peb lub moos rau sab ntug dej Yaladees hnub tuaj thiab tu peb lub moos rau hauv Khana‑as tebchaws ua moos cawm siav.

15 Rau lub moos ntawd yuav ua moos cawm siav rau cov Ixayees thiab rau lwm haiv neeg thiab rau tej tibneeg uas nrog lawv nyob, es yog leejtwg tau tua tibneeg, tiamsis tsis yog txhob txwm tua ces thiaj li tau khiav mus rau hauv.

16 Yog leejtwg xuas tej twj siv uas yog hlau ntaus luag tuag, yeej yog nws tua tibneeg mas tus ntawd yuav raug muab tua pov tseg. 

17 Yog leejtwg txhais tes xuas ib lub pob zeb loj uas tua tau tibneeg tuag mus ntaus luag tuag, yeej yog nws tua tibneeg mas nws yuav raug muab tua pov tseg.  18 Yog leejtwg txhais tes xuas tej cuab yeej ntoo uas tua tau tibneeg tuag ntaus luag tuag, yeej yog nws tua tibneeg mas tus ntawd yuav raug muab tua pov tseg. 

19 Cia tus uas rob caub tua tus ntawd ntag.  Tus rob caub ntsib tus ntawd thaum twg mas yuav muab tua kiag pov tseg. 

20 Yog leejtwg ntxub luag es lam muab luag thawb lossis tos kev muab ib yam abtsi laim raug kom tuag,

21 lossis ua tshawj chim es xuas nrig muab ntaus tuag, mas tus uas ntaus ntawd yuav raug muab tua pov tseg, yeej yog nws tua tibneeg. Thaum tus rob caub ntsib nws, cia li muab nws tua kiag pov tseg. 

22 Tiamsis yog nws tsis tau nrog luag ua tshawj chim es cia li thawb luag tamsid, lossis muab abtsi laim raug luag tiamsis tsis yog txhob txwm tos kev,

23 lossis xuas tej lub pob zeb uas tua tau tibneeg tuag tso mus raug luag tuag lawm vim yog nws tsis pom uas luag tuag lawm, tiamsis yeej tsis nrog tus ntawd ua yeeb ncuab thiab tsis yog nws txhob txwm xav ua phem,

24 mas cov pejxeem yuav tau tu plaub rau tus uas tua tibneeg thiab tus rob caub raws li txoj kevcai no.

25 Cov pejxeem yuav pab tus uas tua ntawd kom dim ntawm tus rob caub txhais tes thiab yuav coj tus uas tua ntawd rov qab mus nyob hauv lub moos cawm siav uas nws tau khiav mus nyob ntawd. Cia nws nyob hauv mus txog thaum tus tuam pov thawj hlob uas raug muab cov roj dawb huv hliv tsa lawm tuag tso. 

26 Yog tus uas tua tibneeg ntawd tawm mus dhau lub moos cawm siav li kav xyuam uas nws khiav mus nyob hauv,

27 es yog tus rob caub ntsib nws dhau lub moos cawm siav li kav xyuam lawm ces tus rob caub muab nws tua pov tseg los tus rob caub tsis txhaum rau qhov uas tua ntawd. 

28 Rau qhov tus yawg ntawd yuav tau nyob hauv lub moos cawm siav mus txog thaum tus tuam pov thawj hlob tuag. Thaum tus tuam pov thawj hlob tuag lawd tus uas tua tibneeg ntawd thiaj tau rov qab mus rau hauv nws teb nws chaw uas yog nws tug.

29 Tej no yog tej kab ke thiab tej kevcai uas nej yuav tau coj ib tiam dhau ib tiam ib txhis li rau hauv txhua lub chaw uas nej nyob.

30 Yog leejtwg tua lwm tus tuag mas tus uas tua ntawd yuav raug muab tua pov tseg raws li muaj timkhawv pom, tiamsis yog muaj tib leeg ua timkhawv xwb mas tsis txhob muab tus ntawd tua pov tseg. 

31 Dua li ntawd nej tsis txhob yuav tej nqi uas txhiv tus uas tua tibneeg uas ua txhaum txaus tuag li txojsia, nws yeej yuav raug muab tua xwb. 

32 Thiab nej tsis txhob yuav tej nqi txhiv tus uas khiav mus nyob hauv lub moos cawm siav, tiamsis nws tau rov los nyob nws teb nws chaw ua ntej uas tus tuam pov thawj hlob tsis tau tuag. 

33 Ua li no nej thiaj tsis ua rau lub tebchaws uas nej nyob qias tsis huv, vim yog ntshav ua rau tebchaws qias tsis huv thiab tsis muaj ib yam abtsi uas yuav ntxuav tau lub tebchaws uas ntshav los rau hauv lawd, tsuas yog tus uas tua ntawd cov ntshav thiaj ntxuav tau xwb.

34 Nej tsis txhob ua rau lub tebchaws uas nej nyob qias puas tsuas, yog lub chaw uas kuv nyob hauv nruab nrab rau qhov Kuv Yog (יחוח)Yahweh, kuv nyob hauv nruab nrab cov Ixayees.