1 (יחוח)Yahweh hais rau Mauxes tias,

2 cia li hais rau cov Ixayees tias, thaum nej txeem mus rau hauv Khana‑as tebchaws (yog lub tebchaws uas yuav poob ua nej qub txeeg qub teg, yog tag nrho Khana‑as tebchaws huvsi),

3 nej lub tebchaws sab nrad yog txij ntawm tebchaws moj sab qhua Xees raws Edoos ciam teb, thiab nej ciam teb sab nrad yog txij ntua Hiavtxwv Ntsev uas nyob sab hnub tuaj. 

4 Thiab nej ciam teb yuav lug lub dawm roob Akhanpis hla mus rau teb chaws moj sab qhua Xees mus txog ntua Khades Npanias sab nrad, thiab mus txog Haxa‑adas hla mus txog Axamoos,

5 thiab ciam teb yuav lug ntawm Axamoos mus txog tus dej Iziv mus kawg rau ntawm Hiav txwv. 

6 Nej ciam teb sab hnub poob yuav tau ntawm Hiavtxwv Loj thiab raws ntug hiav txwv ntawd.  No yog nej li ciam teb sab hnub poob.

7 No yog nej ciam teb sab ped, yog txij ntua Hiavtxwv Loj yuav ntsuas kom ncaj mus txog lub roob Haus. 

8 Txij ntawm lub roob Haus mas nej ntsuas kom ncaj mus txog txojkev uas mus rau lub moos Hamas, thiab tus ciam teb sab no mus kawg rau ntawm Xentes,

9 thiab mus txog ntua Xifoos thiab mus kawg rau ntawm Haxa‑Enas.  No yog nej li ciam teb sab ped.

10 Nej yuav ntsuas ciam teb sab hnub tuaj txij ntua lub moos Haxa‑Enas mus txog lub moos Sefas.

11 Ciam teb ntawm Sefas nqis mus txog lub moos Linplas ntawm lub moos Aiv sab hnub tuaj, yuav nqis mus txog kaum Hiavtxwv Khineles thiab raws ntug hiavtxwv sab hnub tuaj,

12 thiab taug tus dej Yaladees mus kawg rau ntawm Hiavtxwv Ntsev. No yog nej lub teb chaws thiab tus ciam teb uas vij puag ncig. 

13 Mauxes hais rau cov Ixayees tias, no yog lub tebchaws uas nej yuav tau rho ntawv los ua qub txeeg qub teg uas (יחוח)Yahweh hais kom muab rau cuaj xeem thiab ib nrab xeem,

14 rau qhov xeem Lunpees thiab lawv tej cum thiab xeem Nkas thiab lawv tej cum twb tau lawv qub txeeg qub teg lawm, thiab xeem Manaxes ib nrab los kuj tau lawm thiab. 

15 Ob xeem thiab ib nrab xeem ntawd twb tau lawv qub txeeg qub teg sab ntug dej Yaladees tim ub uas ncaj lub moos Yelikhaus sab hnub tuaj. 

16 (יחוח)Yahweh hais rau Mauxes tias,

17 no yog cov uas yuav faib lub tebchaws ua qub txeeg qub teg rau nej, tej npe yog pov thawj Ele‑axas thiab Noos tus tub Yahshua.

18 Koj yuav tsa ib xeem ib tug uas ua hlob faib lub tebchaws ua qub txeeg qub teg.

19 No yog cov uas ua hlob ntawd tej npe, xeem Yahdah yog Yefunes tus tub Khalej,

20 xeem Xime‑oos yog Amihus tus tub Semu‑ees,

21 xeem Npeeyamees yog Khiloos tus tub Elidas.

22 Tus uas ua hlob hauv xeem Daj yog Yaulis tus tub Npukhis. 

23 Yahxej caj ces mas tus uas ua hlob hauv xeem Manaxes yog Efaus tus tub Hani‑ees,

24 thiab tus uas ua hlob hauv xeem Efas‑is yog Sithas tus tub Khemu‑ees. 

25 Xeem Xenpuloos tus uas ua hlob yog Panas tus tub Elixafas,

26 xeem Ixakhas tus uas ua hlob yog Asxas tus tub Pati‑ees,

27 xeem Asaws tus uas ua hlob yog Selaumis tus tub Ahihus,

28 xeem Nathalis tus uas ua hlob yog Amihus tus tub Pedahees.

29 Cov tibneeg no yog cov uas (יחוח)Yahweh hais kom faib qub txeeg qub teg rau cov Ixayees hauv Khana‑as tebchaws.