top of page

KEVCAI 4

Mauxes Ntuas Cov Ixayees

1 Cov Ixayees es, nimno nej cia li mloog tej kab ke thiab tej kevcai uas kuv qhia rau nej thiab ua raws nraim, xwv nej thiaj ciaj sia nyob thiab txeem mus tau rau hauv lub teb chaws uas (יחוח)Yahweh uas yog nej tej poj koob yawm txwv Tus Tswv pub rau nej ua nej tug.

2 Nej tsis txhob tsav ntxiv tej lus uas kuv qhia nej thiab tsis txhob muab rho ib qho tseg, tiamsis nej yuav tau tuav (יחוח)Yahweh uas yog nej Tus Tswv tej lus qhia uas kuv muab cob rau nej.

3 Nej lub qhov muag twb pom tej uas (יחוח)Yahweh ua ntawm Npa‑as Pe‑aus lawm. (יחוח)Yahweh uas yog nej Tus Tswv twb ua rau cov uas ua koom tu dab Npa‑as ntawm Pe‑aus puam tsuaj tag hauv nej nruab nrab mus lawm.

4 Tiamsis nej cov uas tuav rawv (יחוח)Yahweh uas yog nej Tus Tswv ruaj ruaj, txhua tus kuj muaj txojsia nyob txog hnub no.

5 Saib maj, kuv twb qhia tej kab ke thiab tej kevcai rau nej raws li (יחוח)Yahweh uas yog kuv Tus Tswv tau hais rau kuv lawm, kom nej thiaj ua raws li ntawd rau hauv lub tebchaws uas nej tab tom yuav txeem mus ua nej tug.

6 Nej yuav tau tuav rawv tej kevcai no thiab ua raws nraim. Qhov uas ua li no yuav qhia nej lub tswvyim thiab nej tej kev txawj ntse rau ib tsoom tibneeg paub. Thaum luag hnov txog tej kab ke huvsi no, luag yuav hais tias, haiv neeg loj no yeej yog haiv neeg uas muaj tswvyim thiab txawj ntse.

7 Puas muaj ib haiv neeg loj twg uas muaj timtswv nyob ze lawv yam li (יחוח)Yahweh uas yog peb Tus Tswv nyob ze peb rau thaum peb thov nws?

8 Puas muaj ib haiv neeg loj twg uas muaj tej kab ke thiab tej kevcai ncaj ncees yam li txoj kevcai no uas hnub no kuv muab cob rau nej?

9 Nej yuav tau ceev faj thiab ua tib zoo tswj nej lub siab, ntshai tsam nej tsis nco qab tej uas nej lub qhov muag twb pom ntawd thiab ntshai tsam tej ntawd ploj tag hauv nej lub siab mus ib sim neej. Nej yuav tau qhia rau nej cov menyuam thiab nej tej xeeb ntxwv paub txog tej no tias,

10 hnub uas nej sawv rau ntawm (יחוח)Yahweh uas yog nej Tus Tswv xub ntiag ntawm Haules, mas (יחוח)Yahweh hais rau kuv tias, cia li sau cov pejxeem tuaj ua ke rau ntawm kuv es kuv yuav cia lawv hnov kuv tej lus xwv lawv thiaj tau kawm txog qhov uas paub ntshai kuv mus tag lawv sim neej uas lawv muaj txojsia nyob hauv ntiajteb, thiab lawv thiaj tau qhia lawv tej menyuam kom ua li ntawd.

11 Nej twb tuaj ze sawv ntawm taw roob thiab lub roob muaj nplaim taws cig nto ntuj, thiab muaj huab tsaus nti laum nkaus.

12 Mas (יחוח)Yahweh hais hauv nplaim taws tuaj rau nej. Nej twb hnov nws lub suab hais lus kom tsis pom nws xyeem qhov muag, tsuas yog hnov lub suab xwb.

13 Nws qhia nws tej lus cog tseg rau nej, yog kaum txoj kevcai uas nws kom nej ua. Thiab nws muab sau rau hauv ob daim txhib zeb.

14 Thaum ntawd, (יחוח)Yahweh hais kom kuv qhia tej kab ke thiab tej kevcai rau nej, xwv nej thiaj coj mus ua raws li ntawd rau hauv lub tebchaws uas nej tabtom hla mus txeeb ua nej tug.

​

Tsis Txhob Pe Dab Mlom

15 Hnub uas (יחוח)Yahweh hais hauv cov nplaim taws tuaj rau nej ntawm Haules, nej tsis pom nws xyeem qhov muag li. Yog li no nej yuav tau ceev faj zoo,

16 tsis txhob yuam kev mus ua dab mlom rau nej, tsis hais tus yam ntxwv zoo li pojniam lossis txivneej,

17 lossis zoo li ib yam tsiaj hauv ntiajteb, lossis zoo li ib yam noog muaj tis ya saum nruab ntug,

18 lossis zoo li ib yam tsiaj uas nkag hauv av, lossis zoo li ib yam ntses uas nyob hauv dej hauv nruab tiv txwv.  

19 Thaum nej tsa muag saib saum ntuj nej pom lub hnub lub hli thiab cov hnub qub thiab txhua yam saum nruab ntug, tsis txhob cia nej raug ntxias mus pe thiab ua koom tu tej ntawd, yog yam uas (יחוח)Yahweh uas yog nej Tus Tswv pub rau ib tsoom tibneeg hauv qab ntuj no huvsi.

20 Tiamsis (יחוח)Yahweh coj nej tawm hauv cub thee hlawv hlau, yog tawm hauv Iziv tebchaws los ua haiv neeg uas yog nws teej nws tug ib yam li niaj hnub nimno.

21 Tsis tag li ntawd, vim yog tim nej, (יחוח)Yahweh thiaj li chim siab rau kuv thiab cog lus tawv tias kuv yuav tsis tau hla tus dej Yaladees thiab kuv yuav tsis tau nkag mus rau hauv lub teb chaws zoo uas (יחוח)Yahweh uas yog nej Tus Tswv pub ua qub txeeg qub teg rau nej.  

22 Kuv yuav tuag rau hauv lub tebchaws no. Kuv yuav tsis tau hla tus dej Yaladees, tiamsis nej yuav tau hla mus thiab txeeb lub tebchaws zoo ntawd ua nej tug.  

23 Nej yuav tau ceev faj, nej tsis txhob hnov qab (יחוח)Yahweh uas yog nej Tus Tswv tej lus cog tseg uas nws cog rau nej thiab tsis txhob ua dab mlom uas zoo li ib yam abtsi uas (יחוח)Yahweh uas yog nej Tus Tswv txwv tsis pub nej ua.

24 Rau qhov (יחוח)Yahweh uas yog nej Tus Tswv yog nplaim taws kub ceev, nws yog Tus Tswv uas khib xeeb.

25 Thaum nej muaj tub ki muaj xeeb ntxwv thiab tau nyob hauv lub tebchaws ntawd ntev, yog nej yuam kev mus ua tej dab mlom uas muaj yam ntxwv zoo li ib yam abtsi, thiab ua tej uas (יחוח)Yahweh uas yog nej Tus Tswv pom tias phem thiaj zes ua rau nws chim,

26 mas hnub no kuv thov lub ntuj lub teb ua timkhawv rau nej tias nej yuav puam tsuaj ploj tag sai sai hauv lub tebchaws uas nej tab tom yuav hla dej Yala-dees mus txeeb ua nej tug ntawd. Nej yuav tsis tau nyob ntev rau hauv, nej yuav raug puam tsuaj tag huvsi.

27 (יחוח)Yahweh yuav ua rau nej khiav ri sua mus rau hauv ib tsoom tib neeg, mas nej yuav tshuav tsawg tsawg rau hauv tej teb chaws uas (יחוח)Yahweh ntiab nej mus nyob ntawd.

28 Mas nej yuav ua koom tu tej dab mlom uas yog ntoo, yog pob zeb qhov ntawd, yog tej uas tibneeg txhais tes ua uas tsis txawj pom kev, tsis txawj hnov lus, tsis txawj noj, tsis txawj hnia ntxhiab.  

29 Thaum nyob qhov ntawd nej yuav nrhiav (יחוח)Yahweh uas yog nej Tus Tswv, yog nej rau siab nrhiav nws kawg siab kawg ntsws mas nej yuav ntsib nws. 30 Thaum nej raug kev txom nyem lwj siab thiab tej xwm txheej no huvsi los raug nej rau yav tom hauv ntej, ces nej yuav rov los cuag (יחוח)Yahweh uas yog nej Tus Tswv thiab yuav mloog nws lus.

31 Rau qhov (יחוח)Yahweh uas yog nej Tus Tswv yog Tus Tswv uas muaj lub siab hlub thiab yuav tsis muab nej tso tseg thiab tsis muab nej ua kom puam tsuaj. Nws yuav tsis hnov qab tej lus cog tseg uas nws tau cog ruaj khov rau nej tej poj koob yawm txwv.

32 Cia li nug txog yav thaum ub uas nyob ua ntej nej, txij thaum uas (יחוח)Yahweh tsim tibneeg rau saum lub ntiajteb, thiab nug sab ntuj no mus txog sab ntuj tim ub, saib puas tau muaj tej xwm txheej loj li no tshwm los, los tsis tau muaj thiab puas tau hnov dua los tsis tau hnov.

33 Puas tau muaj ib haiv neeg twg tau hnov lawv tej timtswv lub suab ib yam li nej tau hnov (יחוח)Yahweh lub suab uas hais hauv nplaim taws tuaj es tseem muaj txojsia nyob los tsis muaj?

34 Puas tau muaj tus timtswv twg tau sim coj ib haiv neeg tawm hauv lwm haiv neeg los ua nws tug los tsis muaj? Nws sim tibneeg siab thiab ua tej txujci tseem ceeb thiab tej txujci loj thiab ua rog thiab siv nws txhais tes uas muaj hwjchim thiab nws txhais npab uas tsa hlo, thiab ua kom muaj kev ntshai kawg, ib yam li (יחוח)Yahweh uas yog nej Tus Tswv tau ua rau nej hauv Iziv tebchaws tab meeg nej.  35 Qhov uas ua tej no tshwm rau nej pom ntawd twb yog ua rau kom nej paub tias (יחוח)Yahweh yog Tus Tswv uas muaj hwj chim loj dua ntais, dhau nws lawm yeej tsis muaj dua lwm Tus Tswv li.

36 Nws pub nej tau hnov nws lub suab saum ntuj tuaj, kom nws thiaj qhuab qhia tau nej. Nws pub nej pom nws cov nplaim taws loj heev hauv lub ntiaj teb thiab nej hnov nws tej lus hauv cov nplaim taws tuaj.

37 Vim yog nws hlub nej tej poj koob yawm txwv thiab xaiv lawv tej caj ces, nws nrog nraim nej nyob thiab siv nws lub hwj chim loj coj nej tawm hauv Iziv tebchaws los.

38 Thiab ntiab tej haiv neeg uas loj dua thiab muaj zog heev dua nej khiav ntawm nej xub ntiag mus, thiab coj nej nkag los thiab pub lawv lub tebchaws ua qub txeeg qub teg rau nej yam li niaj hnub nimno.

39 Vim li no hnub no cia li paub thiab khaws cia hauv lub siab tias, (יחוח)Yahweh yog Tus Tswv uas nyob saum ntuj thiab nyob hauv ntiajteb, tsis muaj dua lwm tus li lawm.

40 Yog li ntawd nej yuav tau tuav rawv nws tej kab ke thiab nws tej lus cob qhia uas hnub no kuv muab cob rau nej xwv nej tej tub ki uas yug los tom qab thiaj noj qab nyob zoo thiab muaj txojsia ntev rau hauv lub tebchaws uas (יחוח)Yahweh uas yog nej Tus Tswv pub rau nej mus ib txhis.

​

Tej Moos Cawm Siav Sab Dej Yaladees Hnub Tuaj

41 Mauxes tu peb lub moos cia rau sab dej Yaladees hnub tuaj,

42 es yog leejtwg tua tib neeg thiaj li tau khiav mus rau hauv, yog tus uas tua kwvtij zej zog tiamsis tsis yog txhob txwm tua thiab tsis tau ua yeeb ncuab dua li. Thaum uas khiav mus nyob rau hauv cov moos no lub twg lawm ces yuav dim txojsia.

43 Xeem Lunpees lub moos cawm siav yog lub moos Npexaws uas nyob saum tej nras tiaj toj siab hauv tebchaws moj sab qhua, xeem Nkas lub moos cawm siav yog lub moos Lamaus hauv Kile‑as, thiab xeem Manaxes lub moos cawm siav yog Kaulas hauv Npasas.

​

Taw Qhia Txog Tej Kevcai

44 Ntawm no mus yog txoj kevcai uas Mau-xes muab cob rau cov Ixayees coj.

45 No yog tej lus cog tseg thiab tej kab ke thiab tej kevcai uas thaum cov Ixayees tawm hauv Iziv tebchaws los lawd, Mauxes qhia rau lawv,

46 ntawm tus dej Yaladees sab hnub tuaj hauv lub hav uas ncaj lub moos Npepe‑aus, yog cov Amaulais tus vajntxwv Xihoos hauv Hesa-npoos lub tebchaws. Xihoos yog tus uas Mauxes thiab cov Ixayees ntaus yeej thaum lawv tawm hauv Iziv tebchaws los.    

47 Cov Ixayees txeeb tau nws lub tebchaws thiab txeeb tau Npasas tus vajntxwv Aus lub teb chaws, yog cov Amaulais ob tug vajntxwv uas nyob sab dej Yaladees hnub tuaj,

48 txij ntua lub moos Alau‑aws uas nyob ntug hav Anoos mus txog lub roob Xili‑oos (uas yog Hawmoos),

49 thiab tag nrho Alanpas uas nyob ntawm dej Yaladees sab hnub tuaj mus txog ntua Hiavtxwv Alanpas, ntawm taw roob Pixakas.

Yahshua Tug

Follow

  • Facebook Social Icon
bottom of page