(יחוח)Yahweh Kaum Txoj Kevcai

(Khiavdim 20:1-17)

1 Mauxes txawm hu ib tsoom Ixayees sawvdaws tuaj ua ke thiab hais rau lawv tias, cov Ixayees es, cia li tig ntsej mloog tej kab ke thiab tej kevcai uas hnub no kuv hais rau nej mloog, mas nej yuav tau cim cia thiab ceev faj ua raws li.

2 (יחוח)Yahweh uas yog peb Tus Tswv tau cog lus rau peb ntawm Haules.

3 Tsis yog (יחוח)Yahweh cog lus rau peb tej poj koob yawm txwv xwb, kuj yog nws cog lus rau peb thiab ntag, yog peb sawv daws uas hnub no tseem ciaj sia nyob ntawm no ntag.

4 (יחוח)Yahweh hais rau nej ntawm lub roob hauv cov nplaim taws tim ntsej tim muag.

5 Mas thaum ntawd kuv nyob hauv nej thiab (יחוח)Yahweh nruab nrab, kuv thiaj qhia (יחוח)Yahweh tej lus rau nej, rau qhov nej ntshai cov nplaim taws thiab tsis nce mus rau saum lub roob. (יחוח)Yahweh hais tias,

6 kuv yog (יחוח)Yahweh uas yog koj Tus Tswv uas coj koj tawm hauv Iziv tebchaws los, tawm hauv txojkev ua qhev los.

7 Koj tsis txhob muaj dua lwm Tus Tswv uas tsis yog kuv.  

8 Koj tsis txhob ua dab mlom los rau koj pe, tsis hais tej uas muaj yam ntxwv zoo li tej uas nyob saum nruab ntug lossis tej uas nyob hauv ntiajteb lossis tej uas nyob hauv dej hauv nruab tiv txwv.

9 Tsis txhob pe thiab tsis txhob ua koom tu tej dab mlom ntawd, rau qhov kuv yog (יחוח)Yahweh uas yog koj Tus Tswv, yog Tus Tswv uas khib xeeb heev, kuv yuav rau txim rau leej txiv uas ntxub kuv thiab poob mus rau nws cov tub ki mus txog peb plaub tiam.

10 Tiamsis kuv yuav ua txojkev hlub uas ruaj khov tshwm rau cov uas npuab kuv thiab ua raws li kuv tej lus cob qhia ntau txhiab tiam tibneeg.

11 Koj tsis txhob lam hais saib tsis taus (יחוח)Yahweh uas yog koj Tus Tswv lub npe, rau qhov tus uas lam hais saib tsis taus nws lub npe, mas (יחוח)Yahweh yuav tsis zam txim.

12 Koj yuav tau hwm hnub Sabbath ua hnub uas dawb huv raws li (יחוח)Yahweh uas yog koj Tus Tswv twb hais rau koj lawd.

13 Koj yuav tau khwv thiab ua koj tej hauj lwm huvsi rau hnub,

14 tiamsis hnub xya yog hnub Sabbath uas caiv rau (יחוח)Yahweh uas yog koj Tus Tswv.  Hnub ntawd tsis txhob ua ib yam hauj lwm abtsi li, tsis hais koj tus kheej thiab koj tej tub tej ntxhais, thiab koj cov tub qhe nkauj qhe, thiab koj tej nyuj tej nees luav, thiab koj tej tsiaj txhu txhua yam, thiab lwm haiv neeg uas tuaj nyob hauv koj lub moos, koj tej tub qhe nkauj qhe thiaj tau so ib yam li koj so.

15 Koj yuav tau nco ntsoov tias koj tau ua qhev hauv Iziv tebchaws mas (יחוח)Yahweh uas yog nej Tus Tswv xuas nws txhais tes uas muaj hwjchim thiab txhais npab uas tsa hlo coj koj tawm qhov ntawd los. Yog li ntawd (יחוח)Yahweh uas yog koj Tus Tswv hais kom koj nco ntsoov caiv hnub Sabbath.

16 Koj yuav tau hwm koj niam koj txiv raws li (יחוח)Yahweh uas yog koj Tus Tswv tau hais rau koj lawd, kom koj thiaj li muaj txojsia nyob ntev mas koj yuav noj qab nyob zoo rau hauv lub tebchaws uas (יחוח)Yahweh uas yog koj Tus Tswv muab pub rau koj.  

17 Tsis txhob tua tibneeg,

18 thiab tsis txhob deev luag poj luag txiv,

19 thiab tsis txhob ua tub sab,

20 thiab tsis txhob ua cuav timkhawv iab liam luag lwm tus,

21 thiab tsis txhob ua siab hlob xav tau luag tus pojniam, tsis txhob xav tau luag vaj luag tsev, luag tej liaj tej teb thiab luag tej tub qhe nkauj qhe, luag tej nyuj tej nees luav lossis ib yam abtsi uas yog luag li.

22 Tej lus no (יחוח)Yahweh twb hais nrov nrov rau nej sawvdaws ntawm lub roob, yog hais hauv cov nplaim taws thiab hauv tauv huab thiab hauv qhov tsaus ntuj tuaj. Mas nws tsis tsav ib lo lus ntxiv li. Nws muab sau rau hauv ob daim txhib zeb thiab muab pub rau kuv.

​

Cov Pejxeem Ntshai

23 Thaum nej hnov lub suab nrov hauv qhov tsaus ntuj tuaj thiab thaum lub roob tabtom cig plaws, nej txhua xeem tus thawj huvsi thiab cov kev txwj laug tuaj cuag kuv,

24 mas nej hais rau kuv tias, saib maj, (יחוח)Yahweh uas yog peb Tus Tswv tau ua nws lub hwjchim ci ntsa iab thiab nws tej haujlwm loj tshwm los rau peb pom, thiab peb tau hnov nws lub suab hauv cov nplaim taws. Hnub no peb tau pom (יחוח)Yahweh nrog tibneeg hais lus los tib neeg tseem ciaj sia nyob tau.  

25 Yog li ntawd nimno peb tseem yuav tuag ua abtsi? Cov nplaim taws loj no yuav hlawv peb. Yog peb tseem hnov (יחוח)Yahweh uas yog peb Tus Tswv lub suab ib zaug ntxiv, peb yeej yuav tuag,

26 rau qhov ib tsoom tibneeg puas muaj leejtwg tau hnov (יחוח)Yahweh uas muaj txojsia nyob lub suab hauv nplaim taws yam li uas peb tau hnov es tseem ciaj sia nyob tau?

27 Koj cia li txav mus ze mloog txhua yam uas (יחוח)Yahweh uas yog peb Tus Tswv yuav hais. Txhua yam uas (יחוח)Yahweh uas yog peb Tus Tswv hais rau koj mas koj qhia rau peb mas peb yuav mloog thiab ua raws li ntawd.

28 Thaum nej hais li ntawd rau kuv, (יחוח)Yahweh kuj hnov nej tej lus, mas

(יחוח)Yahweh hais rau kuv tias, kuv twb hnov cov tibneeg no tej lus uas lawv hais rau koj lawm. Txhua yam uas lawv hais ntawd kuj zoo.

29 Kuv xav kom lawv muaj lub siab zoo li no mus li, yog qhov uas hwm thiab paub ntshai kuv thiab tuav rawv kuv tej lus cob qhia huvsi, mas lawv thiab lawv tej tub ki yuav noj qab nyob zoo ib txhiab ib txhis li.

30 Cia li rov mus hais rau lawv tias, nej cia li rov mus rau hauv nej tej tsev ntaub. 31 Tiamsis koj cia li sawv ntsug ze kuv ntawm no es kuv yuav qhia tej lus cob qhia thiab tej kab ke thiab tej kev cai huvsi rau koj, mas koj yuav qhia rau lawv kom lawv ua raws li tej kevcai ntawd rau hauv lub tebchaws uas kuv pub rau lawv yuav ua lawv tug.

32 Nej yuav tau ceev faj zoo ua raws nraim li (יחוח)Yahweh uas yog nej Tus Tswv hais cia lawd, nej tsis txhob tig mus rau sab xis los sab laug li.

33 Nej yuav ua nej lub neej raws nraim li txhua txojkev uas (יחוח)Yahweh uas yog nej Tus Tswv tau hais kom nej ua xwv nej thiaj muaj txojsia nyob thiab nej thiaj noj qab nyob zoo thiab muaj txoj siav loj siav ntev nyob rau hauv lub tebchaws uas nej yuav tau ua nej tug ntawd.