Nqe Kevcai Uas Loj

1 Ntawm no mus yog tej lus cob qhia thiab tej kab ke thiab tej kevcai uas

(יחוח)Yahweh uas yog nej Tus Tswv hais kom kuv qhia nej, xwv nej thiaj tau ua raws li ntawd rau hauv lub tebchaws uas nej yuav hla mus txeeb ua nej tug,

2 mas nej thiab nej tej menyuam xeeb ntxwv thiaj yuav hwm thiab paub ntshai (יחוח)Yahweh uas yog nej Tus Tswv mus tag nej sim neej, yog qhov uas tuav rawv nws tej kab ke thiab tej lus cob qhia uas kuv muab cob rau nej, kom nej thiaj muaj txojsia nyob ntev dhawv.

3 Ixayees es, vim li no nej cia li tig ntsej mloog thiab ceev faj ua raws li ntawd, kom nej thiaj tau noj qab nyob zoo thiab huaj vam coob coob rau hauv lub teb chaws uas muaj kua mis thiab zib ntab ntws nto, raws li (יחוח)Yahweh uas yog nej tej poj koob yawm txwv Tus Tswv tau cog lus rau nej.

4 Cov Ixayees es, cia li tig ntsej mloog (יחוח)Yahweh uas yog peb Tus Tswv, yog tib tug (יחוח)Yahweh xwb.

5 Koj yuav tau hlub (יחוח)Yahweh uas yog koj Tus Tswv kawg siab kawg ntsws, thiab kawg koj lub zog.  

6 Koj yuav khaws tej lus uas hnub no kuv qhia koj rau hauv koj lub siab,

7 thiab koj yuav ua tib zoo qhia tej lus no rau koj tej menyuam, thiab hais txog tej lus no rau thaum koj nyob hauv tsev, thaum koj taug kev, thaum koj pw thiab thaum koj sawv.

8 Muab tej lus no khi rau ntawm koj txhais tes ua lub chaw nco, thiab muab pav rau ntawm koj hauv pliaj,

9 thiab muab sau rau ntawm tej npuab rooj hauv tsev thiab ntawm rooj loog.

​

Ntuas Kom Mloog Lus

10 Thaum (יחוח)Yahweh uas yog koj Tus Tswv coj koj mus txog lub tebchaws uas nws cog lus tseg ruaj khov rau koj tej poj koob yawm txwv, uas yog Anplaham, Ixaj thiab Yakhauj, tias yuav pub rau koj, muaj tej moos loj thiab zoo uas koj tsis tau tsim li,

11 muaj vaj tse, muaj cuab txhiaj cuab tam zoo puv nkaus uas koj tsis tau npaj cia, thiab muaj tej pas dej uas koj tsis tau khawb, thiab muaj tej vaj txiv hmab thiab tej vaj txiv ntoo aulib uas koj tsis tau cog, mas thaum koj tau noj tsau npo, 12 koj yuav tau ceev faj tsis txhob hnov qab (יחוח)Yahweh uas coj koj tawm hauv Iziv tebchaws hauv txojkev ua qhev los.

13 Koj yuav tau hwm thiab paub ntshai (יחוח)Yahweh uas yog koj Tus Tswv. Koj yuav ua koom tu nws thiab tsuas tuav nws lub npe twv xwb.

14 Nej tsis txhob raws ncuj nciav luag tej dab, yog lwm haiv neeg uas nyob ib ncig nej tej dab.  

15 Rau qhov nej Tus Tswv uas nrog nraim nej nyob, yog Tus Tswv uas khib xeeb, ntshai tsam (יחוח)Yahweh uas yog nej Tus Tswv yuav npau taws rau nej thiab muab nej ua puam tsuaj ploj tag hauv ntiajteb.  

16 Nej tsis txhob sim (יחוח)Yahweh uas yog nej Tus Tswv, ib yam li nej sim nws ntawm Maxas.

17 Nej yuav tau ua tib zoo tuav rawv (יחוח)Yahweh uas yog nej Tus Tswv tej lus cob qhia thiab nws tej lus qhia thiab nws tej kab ke uas nws hais rau nej lawm.

18 Koj yuav tau ua tej uas (יחוח)Yahweh pom tias raug cai thiab zoo kom koj thiaj noj qab nyob zoo thiab txeem mus tau rau hauv lub tebchaws zoo uas (יחוח)Yahweh cog lus ruaj khov yuav muab pub rau koj tej poj koob yawm txwv,

19 thiab ntiab koj tej yeeb ncuab huvsi khiav ntawm koj xub ntiag mus, raws li (יחוח)Yahweh tau cog lus cia lawd.  

20 Yav tom hauv ntej, thaum koj tus tub nug tias, tej lus thiab tej kab ke thiab tej kevcai uas (יחוח)Yahweh uas yog peb Tus Tswv hais rau koj lub ntsiab yog li cas?

21 Mas koj yuav teb koj tus tub tias, peb ua Falaus qhev hauv Iziv tebchaws, mas (יחוח)Yahweh siv nws txhais tes uas muaj hwjchim coj peb tawm hauv Iziv tebchaws los.

22 (יחוח)Yahweh ua txujci tseem ceeb thiab txujci uas loj thiab txaus ntshai kawg tshwm los raug Iziv tebchaws thiab Falaus thiab nws tsev neeg sawvdaws tab meeg peb.

23 Mas (יחוח)Yahweh coj peb tawm qhov ntawd los, xwv nws thiaj coj peb los rau hauv lub tebchaws no thiab muab pub rau peb raws li nws twb cog lus ruaj khov tias yuav pub rau peb tej poj koob yawm txwv lawm.

24 (יחוח)Yahweh hais kom peb ua raws li tej kab ke no huvsi, yog hwm thiab paub ntshai (יחוח)Yahweh uas yog peb Tus Tswv, kom peb thiaj noj qab nyob zoo mus ib txhis thiab nws thiaj tsom kwm peb txojsia nyob yam li niaj hnub nimno.  

25 Yog peb ceev faj ua raws li tej lus cob qhia no huvsi rau ntawm (יחוח)Yahweh uas yog peb Tus Tswv xub ntiag raws li nws twb muab cob rau peb lawm, kuj yog txojkev ncaj ncees rau peb.