Haiv neeg Uas (יחוח)Yahweh Xaiv

1 Thaum (יחוח)Yahweh uas yog nej Tus Tswv coj nej mus rau hauv lub tebchaws uas nej tab tom mus txeeb ua nej tug thiab ntiab ntau haiv neeg khiav ntawm nej hauv ntej mus, yog cov Hithais, cov Kawkasis, cov Amaulais, cov Khana‑as, cov Pelixais, cov Hivais thiab cov Yenpus, yog xya haiv neeg uas loj dua thiab muaj zog dua nej,

2 thiab thaum (יחוח)Yahweh uas yog nej Tus Tswv muab lawv rau hauv nej txhais tes, thiab nej ntaus yeej lawv, mas nej yuav tau ua kom lawv puam tsuaj tag nrho huvsi. Tsis txhob nrog lawv sib cog lus abtsi kiag li, tsis txhob hlub lawv li.

3 Tsis txhob nrog lawv ua tshoob ua kos, tsis txhob muab nej tej ntxhais qua rau lawv tej tub thiab tsis txhob yuav lawv tej ntxhais rau nej tej tub.

4 Rau qhov lawv yuav ua rau nej tej tub tso kuv tseg mus ua koom tu luag tej dab. Mas (יחוח)Yahweh yuav npau taws rau nej thiab ua kom nej puam tsuaj sai sai.

5 Tiamsis nej yuav tau ua li no rau lawv. Nej yuav tau rhuav lawv tej thaj teev dab thiab tsoo lawv tej ncej zeb thiab ntov lawv tej ncej dab Aselas thiab muab lawv tej dab mlom hlawv pov tseg huvsi. 

6 Rau qhov nej yog haiv neeg uas dawb huv rau (יחוח)Yahweh uas yog nej Tus Tswv. (יחוח)Yahweh uas yog nej Tus Tswv xaiv nej tawm hauv ib tsoom tibneeg uas nyob hauv ntiajteb los ua haiv neeg uas yog nws teej nws tug.

7 Qhov uas (יחוח)Yahweh hlub nej thiab xaiv nej ntawd tsis yog vim nej muaj coob dua lwm haiv neeg. Hauv txhua haiv neeg, nej yog haiv uas tsawg tshaj plaws.

8 Tiamsis twb yog vim (יחוח)Yahweh hlub nej thiab nws tuav rawv tej lus uas nws cog tseg ruaj khov rau nej tej poj koob yawm txwv, nws thiaj siv nws txhais tes uas muaj hwj chim coj nej tawm los thiab txhiv nej dim hauv txojkev ua qhev, yog dim hauv Iziv tus vajntxwv Falaus txhais tes.

9 Vim li no, cia li paub tseeb tias (יחוח)Yahweh yog nej Tus Tswv, yog tus uas muaj hwj chim loj nkawg nkaus. Nws yog Tus Tswv uas tso siab tau thiab tuav rawv nws tej lus cog tseg, thiab nws txojkev hlub ruaj khov rau cov uas npuab nws thiab tuav rawv nws tej lus cob qhia mus txog ib txhiab tiam,

10 thiab tsom ntsoov ua pauj rau cov uas ntxub nws thiab ua kom lawv puam tsuaj. Nws yuav tsis sej qhov uas rau txim rau cov uas ntxub nws, nws yuav tsom ntsoov ua pauj rau lawv.

11 Vim li no, nej yuav tau ceev faj ua raws li tej lus cob qhia thiab tej kab ke thiab tej kevcai uas hnub no kuv hais rau nej.

​

Mloog Lus Tau Koob Hmoov

12 Vim yog nej mloog tej kevcai no thiab tuav rawv thiab ua raws li, (יחוח)Yahweh uas yog nej Tus Tswv yuav tuav rawv nws tej lus cog tseg thiab txojkev hlub ruaj khov rau nej raws li nws cog lus tseg ruaj khov rau nej tej poj koob yawm txwv.

13 Nws yuav hlub nej thiab foom koob hmoov rau nej thiab ua rau nej huaj vam coob tuaj. Nws yuav foom koob hmoov rau nej tej noob uas xeeb menyuam thiab nej tej qoob loo hauv liaj teb, nej tej cawv txiv hmab, nej tej roj, thiab tej noob yaj noob tshis, noob nyuj kom huaj vam coob rau hauv lub tebchaws uas nws cog lus ruaj khov rau nej tej poj koob yawm txwv tias yuav pub rau nej.

14 Nej yuav tau koob hmoov ntau dua txhua haiv neeg. Yuav tsis muaj ib tug txiv neej lossis pojniam uas xeeb tsis taus me nyuam lossis ib tug tsiaj txhu mooj li.

15 Thiab (יחוח)Yahweh yuav tshem tej mob nkeeg huvsi tawm ntawm nej. Thiab tej mob phem hauv Iziv tebchaws uas nej paub ntawd, nws yuav tsis tso rau saum nej, tiamsis nws yuav tso rau saum txhua tus uas ntxub nej.

16 Nej yuav tau muab txhua haiv neeg uas (יחוח)Yahweh uas yog nej Tus Tswv muab

cob rau nej ua kom puam tsuaj. Nej lub qhov muag tsis txhob hlub lawv li. Nej tsis txhob ua koom tu lawv tej dab, vim qhov uas ua li ntawd yuav ua voj hlua cuab nej.

17 Yog nej xav hauv nej lub siab tias, tej haiv neeg ntawd loj dua peb, peb yuav txeeb tau lawv lub teb chaws li cas?  

18 Nej tsis txhob ntshai lawv li, nej cia li nco txog tej uas (יחוח)Yahweh uas yog nej Tus Tswv ua rau Falaus thiab cov Iziv huvsi lawd.

19 Nej qhov muag twb pom qhov uas sim lawv loj kawg, yog qhov uas (יחוח)Yahweh uas yog nej Tus Tswv tau siv tej txujci loj tseem ceeb thiab nws txhais tes uas muaj hwj chim thiab nws txhais npab uas tsa hlo coj nej tawm los. (יחוח)Yahweh uas yog nej Tus Tswv yuav ua ib yam li ntawd rau txhua haiv neeg uas nej ntshai ntawd ntag.

20 Tsis tag li ntawd, (יחוח)Yahweh  uas yog nej Tus Tswv yuav tso nkawj tso daiv los rau hauv lawv nruab nrab mus txog thaum cov uas tseem tshuav thiab mus khiav nkaum nej raug puam tsuaj tag huvsi.

21 Nej tsis txhob ua siab puas tsus ntshai lawv, rau qhov (יחוח)Yahweh uas yog nej Tus Tswv nrog nraim nej, nws yog Tus Tswv uas loj kawg thiab txaus ntshai.

22 (יחוח)Yahweh uas yog nej Tus Tswv yuav rhuav tshem tej haiv neeg no ib zaug mentsis, ib zaug mentsis ntawm nej hauv ntej mus, tiamsis nws tsis pub nej ua tib zaug rhuav tshem lawv, ntshai tsam tsiaj qus yuav huaj vam coob rau nej.

23 (יחוח)Yahweh uas yog nej Tus Tswv yuav muab lawv rau nej thiab ua rau lawv ntxhov nyho mus txog thaum puam tsuaj tag.  

24 Thiab nws yuav muab lawv tej vajntxwv cob rau hauv nej txhais tes, thiab nej yuav ua kom lawv tej npe ploj tag hauv lub qab ntuj. Yuav tsis muaj leejtwg tiv tau nej mus txog thaum nej ua rau lawv puam tsuaj tag.

25 Nej yuav muab lawv tej dab mlom hlawv pov tseg. Nej tsis txhob ntshaw tej nyiaj tej kub uas luam tej dab mlom ntawd lossis coj mus ua nej tug tsam ces nej mag tej ntawd. Rau qhov tej ntawd yog tej uas qias vuab tsuab rau (יחוח)Yahweh uas yog nej Tus Tswv.

26 Nej tsis txhob coj tej uas qias vuab tsuab ntawd mus rau hauv nej lub tsev, ntshai tsam nej yuav raug muab cais ua kom puam tsuaj yam li tej ntawd. Nej yuav tau ntxub tej ntawd kawg nkaus, vim yog tej uas muab cais ua kom puam tsuaj.