Ntuas Kom Ceev Faj Lub Siab Nkhaus

(Mattithyah 10:26-27)

1 Thaum ntawd muaj tibneeg ntau txhiab leej tuaj txoos ua ke, sib txiv qev, lawv ib leeg tsuj ib leeg kotaw. (יהושע)Yahshua hais rau nws cov thwjtim hais tias, nej yuav tsum ceev faj cov Falixais cov keeb. Kuv hais li no yog kuv hais txog cov Falixais lub siab phem. 2 Tsis muaj ib yam twg uas muab npog cia lawm yuav tsis muaj tus muab los nthuav rau sawvdaws saib. Thiab tsis muaj ib yam twg uas muab zais lawm yuav tsis muaj tus muab los qhia rau sawvdaws paub.

3 Yog li ntawd, tej uas nej hais hmo ntuj, thaum kajntuj, yeej yuav muaj tus qhia rau sawvdaws. Thiab txhua zaj uas nej sib ntxhi hauv tsev, yeej yuav muaj tus muab coj mus qhia nrov nrov nraum zoov. 4 Kuv cov kwvluag, kuv hais rau nej hais tias, tsis txhob ntshai cov uas tua tau lub cev xwb, dhau ntawd ua tsis tau abtsi ntxiv lawm. 5 Kuv qhia rau nej hais tias nej yuav tsum ntshai leejtwg. Yuav tsum ntshai tus uas tua tag lawm tseem muaj hwjchim muab pov tau rau hauv ntuj tawg. Kuv hais tseeb rau nej hais tias, cia li ntshai tus ntawd. 6 Tsib tug noog tsev luag muag ob npiv los tsis yog? Tsis muaj ib tug noog uas Abba (יחוח)Yahweh yuav tsis nco qab li. 7 Nej cov plaubhau los kuj raug muab suav txhua txoj lawm. Tsis txhob ntshai. Nej tsim txiaj dua ntau tus noog tsev.

​

Lees (יהושע)Yahshua Tab Meeg Tibneeg

(Mattithyah 10:32-33,12:32,10:19-20)

8 Kuv hais rau nej hais tias, txhua tus uas lees yuav kuv tab meeg tibneeg, Neeg Leej Tub yuav lees yuav tus ntawd tab meeg Abba (יחוח)Yahweh cov tubtxib saum ntuj. 9 Tiamsis tus uas tsis lees yuav kuv tab meeg tibneeg, tus ntawd yuav raug tsis lees tab meeg Abba    (יחוח)Yahweh cov tubtxib saum ntuj. 10 Txhua tus uas hais lus tawm tsam Neeg Leej Tub yuav zam tau tus ntawd lub txim, tiamsis tus uas hais lus tuam mom Tus Ntsuj Plig uas dawb huv yuav zam tsis tau kiag li. 11 Thaum luag coj nej mus cob rau hauv tej tsev sablaj thiab coj mus rau cov thawj kav thiab cov nom tswv, nej tsis txhob txhawj hais tias nej yuav hais daws nej tus kheej li cas lossis nej yuav teb li cas, 12 rau qhov thaum txog lub sijhawm ntawd Tus Ntsuj Plig dawb huv yuav qhia tej uas nej yuav tsum hais.

​

Paj Lug Tus Nplua Nuj Ruam

13 Muaj ib tug hauv cov tibneeg ntawd hais rau (יהושע)Yahshua hais tias, Xibhwb, thov koj hais kuv tus tijlaug faib qub txeeg qub teg rau kuv thiab.

14 Tiamsis (יהושע)Yahshua hais rau nws hais tias, koj yawg, leejtwg tsa kuv ua tus tu plaub lossis ua tus faib qub txeeg qub teg rau neb? 15 (יהושע)Yahshua hais rau lawv hais tias, ceev faj tib zoo tsis txhob ua siab hlob rau txhua yam, rau qhov tibneeg txojsia tsis yog nyob ntawm qhov uas muaj nplua mias. 16 Ces nws txawm hais ib zaj paj lug rau lawv mloog hais tias, muaj ib tug nplua nuj nws daim teb muaj qoob loo ntau kawg. 17 Nws txawm xav hauv lub siab hais tias, kuv yuav ua li cas thiaj zoo nev, vim hais tias kuv tsis muaj chaw rau kuv tej qoob loo?

18 Nws txawm hais tias, kuv yuav ua li no, kuv yuav muab kuv tej txhab rhuav thiab ua tshiab kom loj dua, mas kuv yuav sau kuv tej qoob thiab kuv tej qhov txhia chaw huvsi ntim rau hauv. 19 Mas kuv yuav hais rau kuv lub siab hais tias, Lub siab es, koj muaj ib puas tsav yam ntau heev khaws cia txaus ntau xyoo, cia li nyob zoo zoo noj haus thiab xyiv fab nawj. 20 Tiamsis Abba (יחוח)Yahweh hais rau nws hais tias, tus niag tibneeg ruam es, hmo no koj tus ntsuj plig yuav raug hu tawm ntawm koj mus, mas tej qhov txhia chaw uas koj npaj cia ntawd yuav yog leejtwg li? 21 Tus uas khaws nyiaj txiag cia rau nws xwb, tsis nplua nuj rau Abba (יחוח)Yahweh kuj zoo ib yam li ntawd ntag.

​

Tsis Txhob Txhawj

(Mattithyah  6:25-34,19-21)

22 (יהושע)Yahshua hais rau nws cov thwjtim hais tias, Vim li no, kuv hais rau nej hais tias, tsis txhob txhawj txog nej txojsia hais tias yuav muab abtsi los noj, thiab tsis txhob txhawj txog nej lub cev hais tias yuav muab abtsi los hnav,

23 rau qhov txojsia tseem ceeb dua mov noj thiab lub cev tseem ceeb dua tej tsoos tsho. 24 Cia li saib tej uab lag, twb tsis tseb tsis hlais thiab tsis muaj txhab tsis muaj phawv los Abba (יחוח)Yahweh tseem yug tej uab lag ntawd. Nej yimhuab tsim txiaj dua tej noog ntawd. 25 Nej cov muaj leejtwg txojkev txhawj yuav txuas tau nws txojsia ntev ib tshim ntxiv?

26 Yam nyuag me me no nej twb ua tsis tau, es nej tseem yuav txhawj txog lwm yam ua abtsi? 27 Cia li tshawb saib tej paj lilij saib tuaj hlob li cas, twb tsis ua haujlwm thiab tsis ntos ntaub. Tiamsis kuv hais rau nej hais tias, txawm yog Xalaumoo hnav nws tej tsoos tsho meej mom huvsi los twb zoo tsis cuag ib lub nyuag paj ntawd.

28 Tej nroj tsuag uas nyob tom teb hnub no xwb, tagkis twb yuav muab pov rau hauv cub hluavtaws,yog Abba  (יחוח)Yahweh twb pub rau hnav li ntawd, nej cov uas kev ntseeg yau es, nws yimhuab yuav pub rau nej hnav thiab.

29 Tsis txhob nrhiav yuav noj abtsi yuav haus abtsi, tsis txhob txhawj, 30 rau qhov ib tsoom tebchaws hauv ntiajteb yeej nrhiav tej no. Nej Leej Txiv yeej paub lawm hais tias nej cheem tsum tej no. 31 Tiamsis nej yuav tsum nrhiav Abba (יחוח)Yahweh lub tebchaws, mas yuav muab tej no tsav ntxiv rau nej. 32 Pab nyuag yaj me me, nej tsis txhob ntshai, vim hais tias nej Leej Txiv txaus siab pub lub tebchaws ntawd rau nej. 33 Cia li muab tej uas nej muaj muag thiab pub rau cov pluag. Cia li ua lub hnab nyiaj uas tsis txawj qub rau nej, yog tej nyiaj txiag saum ntuj uas tsis txawj tag li. Qhov ntawd tub sab tuaj tsis tau ze thiab kab ntsaum ua tsis tau kom puam tsuaj. 34 Rau qhov nej tej nyiaj txiag nyob qhovtwg, nej lub siab yeej nyob qhov ntawd.

​

Cov Tub Qhe Uas Zov Tos

35 Nej cia li sia siv khov kho thiab taws nej lub teeb cia, 36 thiab ua zoo li cov uas tos rawv lawv tus lospav mus ua tshoob rov los, mas thaum nws los khob qhov rooj lawv thiaj qheb kiag tamsid rau nws. 37 Cov qhev uas tus lospav los pom tseem tos rawv kuj tau nyob kaj siab lug. Kuv hais tseeb rau nej hais tias, tus lospav yuav sia siv khov kho thiab cia cov tub qhe nyob ntawm rooj mov mas nws yuav los tu lawv. 38 Yog tus lospav los thaum ib tag hmo lossis qaib qua nws pom hais tias cov tub qhe tseem tos rawv, cov tub qhe ntawd yuav nyob kaj siab lug. 39 Cia li paub hais tias, yog Tus Tswv tsev xub paub hais tias tub sab yuav tuaj thaum twg, nws yuav tsis kheev kom tho tau nws lub tsev. 40 Yog li no nej yuav tsum npaj txhij rau qhov Neeg Leej Tub yuav los rau teev uas nej tsis nco xav txog.

​

Tus Tub Qhe Tsis Ncaj

(Mattithyah  24:45-51)

41 Kepha hais tias, Tus Tswv, koj hais zaj paj lug no rau peb xwb los hais rau sawvdaws thiab? 42 (יהושע)Yahshua hais tias, Leejtwg yog tus tub qhe saib tsev uas ncaj thiab ntse uas tus lospav yuav tsa saib xyuas cov tub qhe thiab faib mov rau lawv noj raws sijhawm?

43 Thaum tus lospav los pom nws ua haujlwm li ntawd, tus tub qhe ntawd yuav tau nyob kaj siab lug. 44 Kuv hais tseeb rau nej hais tias, tus lospav yuav tsa nws ua tus saib xyuas tag nrho lospav tej cuab txhiaj cuab tam huvsi. 45 Tiamsis yog tus tub qhe ntawd xav hauv lub siab hais tias, kuv tus lospav los qeeb, ces nws txawm pib muab cov tub qhe nkauj qhe ntaus thiab noj tsau haus qaug, 46 mas nws tus lospav yuav los rau hnub uas nws tsis nco xav txog thiab teev uas nws tsis paub, mas tus lospav yuav muab nws tsuav ua tej dwb daim thiab tu chaw rau nws nrog cov uas tsis ntseeg nyob ua ke.

47 Mas tus tub qhe ntawd uas twb paub tus lospav lub siab tiamsis tsis npaj thiab tsis ua raws nraim yuav raug nplawm hnyav heev. 48 Tiamsis tus uas tsis paub es ua yam uas tsim nyog raug nplawm, los nws yuav raug nplawm mentsis xwb. Txhua tus uas tau txais ntau yuav raug tsob ntawm nws ntau. Thiab tus uas luag muab ntau rau nws, luag yuav thov thim ntawm nws ntau dua.

​

(יהושע)Yahshua Coj Kev Tsis Sib Haum Xeeb Los

(Mattithyah  10:3-36)

49 Kuv los yog coj hluavtaws los rau hauv lub ntiajteb. Kuv xav kom cub hluavtaws twb cig plaws lawm. 50 Kuv tseem yuav tsum ua dua ib yam kevcai raus dej. Kuv yuav nyuaj siab kawg mus txog thaum ua tiav lawd. 51 Nej xav hais tias kuv los yog coj kev sib haum xeeb los rau lub ntiajteb no lov? Kuv hais rau nej hais tias, tsis yog. Kuv los yog coj kev tawg sib faib los. 52 Txij no mus tsib leeg nyob ua ib tse los yuav tawg peb leeg tawm tsam rau ob leeg, ob leeg tawm tsam rau peb leeg. 53 Lawv yuav sib faib, txiv tawm tsam tub, tub tawm tsam txiv, niam tawm tsam ntxhais, ntxhais tawm tsam niam, niam pog tawm tsam nyab thiab nyab tawm tsam niam pog.

​

Paub Tej Xwm Txheej Uas Yuav Los

(Mattithyah  16:2-3)

54 (יהושע)Yahshua hais rau cov tibneeg coob coob ntawd hais tias, thaum nej pom huab laum nkaus sab hnub poob nej hais tamsim ntawd hais tias, nag yuav los, ces txawm muaj li ntawd. 55 Thaum nej pom cua ntsawj sab nrad tuaj, nej kuj hais tias, Yuav kub heev, ces txawm muaj li ntawd. 56 Cov niag tibneeg ncauj lus zoo siab phem, nej txawj saib lub ntiajteb thiab lub ntuj, thiaj paub hais tias yuav muaj abtsi tshwm los. Vim li cas nej ho tsis txawj saib tiam no yuav muaj li cas?

​

Nrog Tus Yeej Kom Rov Sib Haum

(Mattithyah  5:25-26)

57 Ua cas nej tsis txiav txim siab hais tias yam twg raug cai? 58 Thaum koj nrog tus yeej kom ua ke mus tom tus tu plaub, ua tiag nrhiav kev nrog tus yeej kom hais haum ntawm tog kev, tsam ces nws coj koj mus cuag tus uas txiav txim, mas tus txiav txim yuav muab koj cob rau tus ceev xwm, thiab tus ceev xwm muab koj kaw rau hauv tsev lojfaj. 59 Kuv hais rau koj hais tias, koj yuav tawm tsis tau mus txog thaum them tag txhua npiv huvsi.