Ntxeev Dua Siab Tshiab

1 Lub sijhawm ntawd muaj qee leej piav rau (יהושע)Yahshua mloog txog cov tibneeg Kalilais uas Philaj tau muab lawv cov ntshav xyaw ua ke nrog cov ntshav tsiaj uas lawv tua xyeem. 2 (יהושע)Yahshua txawm hais rau lawv hais tias, nej xav hais tias cov Kalilais ntawd yog tibneeg muaj txim heev dua cov Kalilais sawvdaws rau qhov lawv raug li ntawd no lov?

3 Kuv hais rau nej hais tias, tsis yog li ntawd. Yog nej tsis ntxeev dua siab tshiab nej txhua tus kuj yuav puam tsuaj ib yam li lawv. 4 Lossis kaum yim leej uas lub chaw tsom faj hauv Xilau as pob los tais tuag ntawd, nej xav hais tias lawv ua txhaum loj dua sawvdaws uas nyob hauv Yeluxalees no lov? 5 Kuv hais rau nej hais tias, tsis yog li ntawd. Yog nej tsis ntxeev dua siab tshiab nej txhua tus kuj yuav puam tsuaj ib yam li ntawd.

​

Paj Lug Tsob Txiv Cev

6 (יהושע)Yahshua hais ib zaj paj lug hais tias, muaj ib tug yawg cog ib tsob txiv cev rau hauv nws lub vaj txiv hmab, nws tuaj xyuas los tsis muaj txiv. 7 Nws txawm hais rau tus uas tu txiv hmab hais tias, kuv tuaj xyuas tsob txiv cev no peb xyoos lawm los tsis pom muaj txiv li. Cia li muab ntov pov tseg, yuav cia ntxoov av do do ua abtsi? 8 Tus tu txiv hmab teb nws hais tias, Yawg hlob, thov tseg cia ib xyoos thiab, es kuv npoog av thiab rau chiv rau. 9 Yog lwm xyoo txi txiv kuj zoo. Yog tsis txi txiv koj li muab ntov pov tseg kuj tau.

​

Kho Ib Tug Pojniam Khoov Duav Hnub Sabbath

10 Muaj ib hnub Sabbath (יהושע)Yahshua tabtom qhuab qhia hauv ib lub tsev sablaj.

11 Muaj ib tug pojniam raug dab ua rau nws muaj mob tau kaum yim xyoo, nws khoov duav sawv tsis tau ntseg li.

12 Thaum (יהושע)Yahshua pom nws, (יהושע)Yahshua txawm hu tus pojniam ntawd los hais rau nws hais tias, tus ntxhais es, koj dim koj tus mob lawm lauj!

13 Thaum (יהושע)Yahshua muab tes npuab nws, tamsim ntawd nws txawm sawv tau ntses, thiab nws qhuas Abba (יחוח)Yahweh.

14 Tiamsis tus thawj uas saib xyuas lub tsev sablaj chim rau qhov uas (יהושע)Yahshua kho mob rau hnub Sabbath, nws txawm hais rau cov tibneeg hais tias, muaj rau hnub uas tsim nyog ua haujlwm, nej cia li tuaj kho mob rau rau hnub ntawd, tsis txhob tuaj kho rau hnub Sabbath. 15 Tus Tswv txawm teb nws hais tias, cov niag tibneeg ncauj lus zoo siab phem, hnub Sabbath nej txhua tus twb daws nyuj daws nees luav ntawm lub dab zaub cab mus haus dej los tsis yog?  

16 Tus pojniam no yog Abraham li ib tug ntxhais uas raug Xatas muab khi tau kaum yim xyoo lawm, tsis tsim nyog muab nws daws kom dim txoj hlua khi no rau hnub Sabbath lov?

17 Thaum (יהושע)Yahshua hais li ntawd lawd, cov uas tawm tsam nws kuj raug txaj muag, mas cov tibneeg sawvdaws zoo siab xyiv fab rau tej yam zoo uas (יהושע)Yahshua ua.

​

Lub Noob Me Me Thiab Keeb Ncuav

(Mattithyah 13:31-33; Yahchanan Mark 4:30-32)

18 (יהושע)Yahshua txawm hais tias, Abba (יחוח)Yahweh lub tebchaws zoo li cas? Kuv yuav muab piv rau abtsi? 19 Muab piv ib yam li lub noob me me uas ib tug coj mus tseb rau hauv nws lub vaj. Thaum tuaj hlob ua ib tsob ntoo, thiab tej nas noog saum nruab ntug los ua zes rau saum tej ceg. 20 (יהושע)Yahshua hais dua ib zaug hais tias, kuv yuav muab Abba (יחוח)Yahweh lub tebchaws piv rau abtsi? 21 Yuav piv ib yam li cov keeb uas ib tug pojniam coj mus xyaw peb xe a hmoov mog tos txog thaum cov hmoov mog ntawd su tag huvsi.

​

Lub Qhov Rooj Nqaim

(Mattithyah  7:13-14,21-23)

22 (יהושע)Yahshua mus hauv tej moos thiab tej zej zog qhuab qhia taug kev mus rau Yeluxalees. 23 Muaj ib tug hais rau nws hais tias, Tus Tswv, cov tibneeg uas dim muaj tsawg tsawg xwb lov? (יהושע)Yahshua hais rau lawv hais tias, 24 Yuav tsum siv zog nkag lub qhov rooj nqaim mus, rau qhov kuv hais rau nej hais tias, muaj tibneeg coob coob yooj xeeb nkag mus tiamsis nkag tsis tau. 25 Thaum Tus Tswv tsev twb sawv los kaw qhov rooj lawm, nej yuav pib mus nyob sab nraud khob qhov rooj hais tias, Tus Tswv, qheb rau peb thiab. Nws yuav teb nej hais tias, kuv tsis paub nej tuaj qhovtwg tuaj.

26 Thaum ntawd nej yuav pib hais tias, Peb txeev nrog koj noj haus ua ke thiab koj tau qhia hauv peb tej kev.

27 Tiamsis nws yuav hais rau nej hais tias, kuv tsis paub xyov nej tuaj qhovtwg tuaj. Cov niag tibneeg ua phem sawvdaws, nej cia li khiav ntawm kuv mus.

28 Qhov chaw ntawd yuav muaj kev quaj tom hniav qas qawv rau thaum nej pom Abraham, Isaac thiab Yaaqob thiab cov xibhwb cev Abba (יחוח)Yahweh lus saw-vdaws nyob hauv Abba (יחוח)Yahweh lub tebchaws, tiamsis nej raug muab pov rau sab nraud.

29 Yuav muaj tibneeg tuaj sab hnub tuaj sab hnub poob sab ped sab nram tuaj zaum koom rooj mov ua ke hauv Abba (יחוח)Yahweh lub tebchaws. 30 Saib maj, yeej yuav muaj cov uas ua tom tw rov ua cov thawj, thiab cov thawj rov ua cov tom tw.

​

(יהושע)Yahshua Quaj Txog Yeluxalees

(Mattithyah 23:37-39)

31 Thaum ntawd cov Falixais qee leej tuaj hais rau (יהושע)Yahshua hais tias. Koj cia li khiav ntawm no mus, rau qhov Helauj xav muab koj tua.

32 (יהושע)Yahshua txawm hais rau lawv hais tias, cia li mus hais rau tus niag hma ntawd hais tias, saib maj, kuv yuav ntiab dab tawm thiab kho mob rau hnub no thiab tagkis mas hnub peb kuv yuav ua kuv tes haujlwm kom tiav.

33 Tiamsis hnub no, tagkis thiab nagkis kuv yuav tsum taug kev mus, rau qhov tus xibhwb cev Abba (יחוח)Yahweh lus yuav raug tua tuag rau sab nraud Yeluxalees tsis tau li. 34 Au Yeluxalees, Yeluxalees es, koj yog tus uas tua cov xibhwb cev Abba (יחוח)Yahweh lus thiab xuas pob zeb ntaus cov uas txib tuaj cuag koj tuag. Muaj ntau zaus kuv twb yuav qaws koj cov menyuam los ua ke ib yam li tus poj qaib puag nws cov menyuam rau hauv nws phab tis, tiamsis nej tsis yeem kiag li. 35 Saib nawj, nej lub tuam tsev yuav raug muab tso tseg. Kuv hais rau nej hais tias nej yuav tsis pom kuv mus txog thaum nej hais tias, tus uas tuaj hauv Tus Tswv lub npe tau nyob kaj siab lug.