Kho Tus Uas Mob Phoj Vog

1 Muaj dua ib hnub Sabbath (יהושע)Yahshua mus noj mov rau hauv ib tug thawj Falixais tsev, mas lawv saib ntsoov (יהושע)Yahshua. 2 Txawm muaj ib tug yawg tes taw phoj vog tuaj nyob ntawm (יהושע)Yahshua xubntiag.

3 (יהושע)Yahshua txawm nug cov xibhwb uas paub kevcai thiab cov Falixais hais tias, muaj cai kho mob rau hnub Sabbath los tsis muaj cai?

4 Lawv nyob ntsiag to. (יהושע)Yahshua txawm ntsiab nkaus tus ntawd thiab kho nws zoo kiag li tso nws mus.

5 (יהושע)Yahshua hais rau lawv hais tias, nej cov yog leejtwg muaj menyuam lossis nyuj uas poob rau hauv qhov dej rau hnub Sabbath nws yuav tsis muab rho tawm los tamsim ntawd lov? 6 Mas lawv teb tsis tau li.

​

Tus Uas Mus Ua Qhua

7 Thaum (יהושע)Yahshua pom cov tibneeg uas hu tuaj ntawd xaiv sam tsum zaum xwb, nws txawm ua paj lug hais rau lawv hais tias, 8 Thaum luag hu nej mus noj tshoob, nej tsis txhob mus zaum sam tsum ntshai tsam lawv twb hu ib tug uas muaj meej dua koj tuaj, 9 mas tus uas hu neb ob leeg tuaj yuav los hais rau koj hais tias, cia tus no nyob lub chaw kod, ces koj yuav poob ntsej muag nqes mus zaum lub rooj uas qes kawg. 10 Thaum luag hu koj mus, cia li mus zaum lub rooj qes ua ntej xwv thaum tus uas hu koj los hais rau koj hais tias Kwvluag, cia li mus zaum sam tsum, mas thaum ntawd koj thiaj li tau koob meej tab meeg sawvdaws uas tuaj koom noj mov ntawd. 11 Txhua tus uas tsab ua loj yuav raug muab txo kom qes, thiab tus uas txo hwjchim yuav raug muab tsa ua loj.

12 Mas (יהושע)Yahshua txawm hais rau tus uas hu (יהושע)Yahshua mus noj mov ntawd hais tias, thaum koj muaj pluag noj tsis hais pluas su pluas hmo, tsis txhob yog hu koj cov kwvluag lossis kwvtij lossis tej txheeb ze lossis tibneeg zej zog uas nplua nuj xwb, tsam ces lawv rov hu koj thiaj pauj tau koj.

13 Thaum koj muaj pluag noj cia li hu cov pluag, cov qhuav tes qhuav taw, cov tuag taw thiab cov dig muag, 14 mas koj yuav tau hmoov zoo rau qhov lawv pauj tsis tau koj, mas yuav pauj rau koj thaum cov tibneeg ncaj ncees ciaj sawv hauv qhov tuag rov los.

​

Piv Lus Hais Txog Rooj Tshoob

(Mattithyah  22:1-10)

15 Thaum ib tug uas nrog (יהושע)Yahshua nyob ntawm rooj mov hnov tej lus ntawd, nws txawm hais rau (יהושע)Yahshua hais tias, tus uas yuav tau noj mov hauv Abba (יחוח)Yahweh lub tebchaws kuj nyob kaj siab lug.

16 (יהושע)Yahshua hais rau nws hais tias, muaj ib tug yawg npaj ib pluag noj loj heev thiab hu qhua coob. 17 Thaum txog sijhawm noj, nws txib nws tus tub qhe mus hais rau cov uas twb hu lawd hais tias, cia li tuaj, twb npaj txhua yam txhij lawm. 18 Lawv txhua tus nyias taus nyias yig. Ib tug hais tias, kuv yuav teb lawm, kuv yuav tsum mus saib daim teb ntawd. Kuv tuaj tsis tau, txhob tu siab. 19 Muaj dua ib tug hais tias, kuv yuav tau tsib nkawg nyuj cia, kuv yuav mus xyuas. Kuv tuaj tsis tau, txhob tu siab. 20 Muaj dua ib tug hais tias, kuv nyuam qhuav yuav pojniam, vim li no kuv tuaj tsis tau. 21 Tus tub qhe ntawd rov los hais tej no huvsi rau tus lospav mloog. Mas Tus Tswv tsev kuj chim thiaj hais rau tus tub qhe hais tias, cia li tawm mus sai sai tom tej kev loj thiab tej kev me hauv lub moos coj cov pluag, cov qhuav tes qhuav taw, cov dig muag thiab cov tuag taw tuaj noj. 22 Tus tub qhe txawm los hais tias, Yawg hlob, kuv twb ua txhua yam raws li koj hais tseg lawm, tiamsis tseem tshuav chaw seem. 23 Tus lospav txawm hais rau tus tub qhe hais tias, cia li tawm mus tom tej kev loj kev me mus yuam cov tibneeg ntawd kom tuaj, thiaj li muaj qhua puv kuv lub tsev. 24 Kuv hais rau nej hais tias cov tibneeg uas twb hu lawd tsis muaj ib tug yuav tau saj kuv rooj mov li.

​

Tus Uas Xav Ua (יהושע)Yahshua Thwjtim

(Mattithyah 10:37-38)

25 Muaj tibneeg coob coob nrog (יהושע)Yahshua mus, mas (יהושע)Yahshua tig los hais rau lawv hais tias, 26 Yog leejtwg los cuag kuv es tsis ntxub nws niam nws txiv nws pojniam menyuam kwvtij nkauj muam thiab nws txojsia tus ntawd ua tsis tau kuv li thwjtim. 27 Leejtwg tsis kwv nws tus ntoo ntsia tes raws kuv qab mus, tus ntawd ua tsis tau kuv li thwjtim. 28 Nej cov muaj leejtwg uas xav ua lub chaw tsom faj es yuav tsis xub zaum xam txog tus nqe ua ntej hais tias muaj txaus ua kom tiav los tsis muaj? 29 Yog tsis ua li ntawd, thaum twb tiag tej taw lawm nws ua tsis tau kom tiav, mas txhua tus uas pom yuav thuam luag nws, 30 hais tias, tus no pib ua lawm, tiamsis nws ua tsis tau kom tiav.

31 Lossis muaj ib tug vajntxwv twg uas yuav mus ua rog rau dua ib tug vajntxwv, es tsis zaum ua tib zoo xav ua ntej saib muaj tub rog ib vam leej yuav mus ua rog tau rau tus uas muaj ob vam leej los tsis tau? 32 Yog ua tsis tau, mas thaum tus vajntxwv ntawd tseem nyob deb nws cia li txib tibneeg mus thov kom nyob sib raug zoo. 33 Ib yam li ntawd, nej cov leejtwg tsis tso txhua yam uas nws muaj tseg mas ua tsis tau kuv li thwjtim.

​

Ntsev Tsuag

(Mattithyah 5:13; Yahchanan Mark  9:50)

34 Ntsev yog yam uas zoo, tiamsis yog ntsev tsuag lawm, yuav ua kom rov daw tau li cas? 35 Siv ua chiv rau av kuj tsis tau, muab tov xyaw quav tsiaj kuj tsis tau, tsuas muaj uas muab laim pov tseg xwb. Leejtwg muaj qhov ntsej hnov, cia li mloog nawj!