Tus Yaj Uas Ploj

(Mattithyah  18:12-14)

1 Cov tibneeg sau se thiab cov tibneeg muaj txim sawvdaws kuj txav los ze yuav mloog (יהושע)Yahshua qhia. 2 Cov Falixais thiab cov xibhwb qhia Abba (יחוח)Yahweh kevcai yws hais tias, tus no lees yuav cov tibneeg muaj txim thiab nrog lawv noj ua ke. 3 (יהושע)Yahshua txawm ua paj lug qhia rau lawv hais tias, 4 Nej cov yog leejtwg muaj ib puas tus yaj mas ib tug ploj lawm nws yuav tsis tseg cuaj caum cuaj tug yaj cia rau hauv tshav zaub es mus nrhiav kom tau tus uas ploj lawd lov? 5 Thaum nrhiav tau lawd, nws muab kwv kiag saum xubpwg zoo siab xyiv fab. 6 Thaum los txog tsev, nws hu kwvtij kwvluag zej zog tuaj ua ke hais rau lawv hais tias, cia li nrog kuv zoo siab, rau qhov kuv twb nrhiav tau kuv tus yaj uas ploj lawm. 7 Ib yam nkaus li ntawd kuv hais rau nej hais tias, yog ib tug tibneeg muaj txim ntxeev dua siab tshiab mas yuav muaj kev zoo siab xyiv fab saum Lub Nroog Yeluxalees heev dua li zoo siab rau cuaj caum cuaj tug tibneeg ncaj ncees uas tsis txog ntxeev dua siab tshiab.

​

Lub Nyiaj Uas Ploj Lawm

8 Lossis tus pojniam twg uas muaj kaum lub nyiaj muaj ib lub ploj lawm yuav tsis taws teeb cheb vaj cheb tse ua tib zoo nrhiav mus txog thaum tau lov?

9 Thaum nrhiav tau lawd, nws hu kwvtij kwvluag zej zog tuaj ua ke hais rau lawv hais tias, cia li nrog kuv zoo siab, rau qhov kuv twb nrhiav tau lub nyiaj uas ploj lawm. 10 Ib yam nkaus li ntawd kuv hais rau nej hais tias, yuav muaj kev zoo siab xyiv fab rau ntawm Abba (יחוח)Yahweh cov tubtxib saum ntuj xubntiag rau thaum ib tug tibneeg muaj txim ntxeev dua siab tshiab.

​

Tus Tub Uas Ploj Lawm

11 Thiab (יהושע)Yahshua hais tias, muaj ib tug yawg muaj ob tug tub. 12 Tus tub yau hais rau Leej Txiv hais tias, txiv, thov faib tej cuab txhiaj cuab tam uas yog kuv feem rau kuv. Leej Txiv txawm muab faib rau ob tug tub.

13 Dhau ntawd tsis muaj tsawg hnub tus tub yau txawm sau zog txhua yam uas yog nws li mas taug kev mus rau lwm lub tebchaws deb deb,thiab muab nws tej nyiaj txiag phob xuam phumlam qas ntsuav. 14 Thaum nws muab siv tag lawm, txawm muaj kev tshaib nqhis heev hauv lub tebchaws ntawd, nws txawm pib tu pluas. 15 Nws txawm mus nrhiav zog ntawm ib tug tibneeg hauv lub tebchaws ntawd, tus ntawd thiaj txib nws mus yug npua tom teb. 16 Nws yeej xav noj tej plhaub taum uas npua noj ntawd, tsis muaj leejtwg pub abtsi rau nws noj li.

17 Thaum nws xav txog nws lub neej nws txawm hais tias, kuv txiv cov tub zog muaj coob li cas los tseem tau noj tsau npo noj tsis tag, tiamsis kuv tabtom tuag tshaib rau ntawm no. 18 Kuv yuav sawv tsees mus cuag kuv txiv thiab hais rau nws hais tias, txiv, kuv ua txhaum rau lub ntuj thiab ua txhaum rau koj lawm.

19 Tsis tsim nyog yuav hu kuv ua koj tus tub dua li lawm. Thov cia kuv zoo li koj ib tug tub zog xwb. 20 Ces nws txawm sawv tsees mus cuag nws txiv. Thaum nws tseem los txog deb, Leej Txiv pom nws thiab khuvleej nws, txawm khiav mus puag nws thiab nwj nws. 21 Tus tub hais rau Leej Txiv hais tias, txiv, kuv ua txhaum rau lub ntuj thiab ua txhaum rau koj lawm. Tsis tsim nyog hu kuv ua koj tus tub dua li lawm. 22 Tiamsis Leej Txiv hais rau nws cov tub qhe hais tias, cia li maj nroos mus coj lub tsho ntev uas zoo kawg tuaj ua rau nws hnav, thiab muab nplhaib rau nws coj ntawm ntiv tes thiab muab khau rau nws rau. 23 Thiab coj tus menyuam nyuj uas hwv rog rog los tua, thiab cia peb noj ua kev zoo siab xyiv fab, 24 rau qhov kuv tus tub no tuag lawm los nws ciaj rov los, nws ploj lawm los rov qab ntsib dua. Lawv pib ua kev zoo siab xyiv fab. 25 Tiamsis tus tub hlob nyob tom teb. Thaum nws los yuav txog tsev nws kuj hnov suab raj suab nruas thiab suab seev cev.

26 Nws txawm hu ib tug tub qhe tuaj nug hais tias tej no yog abtsi. 27 Tus tub qhe teb hais tias, koj tus kwv rov los es koj txiv tua tus menyuam nyuj rog rog rau qhov Leej Txiv tau tus tub yau rov los nyob kaj siab lug. 28 Tus tijlaug txawm chim tsis kam nkag los tsev. Leej Txiv thiaj tawm tuaj thov nws los tsev.

29 Nws teb Leej Txiv hais tias, sim saib, kuv ua koj qhev khwv ntau xyoo los, tsis tau tawv koj tej lus ib los li, los koj twb tsis muab ib tug menyuam tshis rau kuv xwv kuv thiaj tau nrog kuv cov phoojywg noj ua kev zoo siab xyiv fab.

30 Tiamsis koj tus tub no mus deev tej poj muag cev muab koj tej cuab txhiaj cuab tam phob xuam tag, los thaum nws rov los koj tseem tua tus menyuam nyuj rog rog yug nws thiab. 31 Leej Txiv hais rau nws hais tias, tub es, koj yeej ib txwm nrog nraim kuv nyob, txhua yam uas kuv muaj puavleej yog koj li.

32 Tsim nyog peb zoo siab xyiv fab hlo, rau qhov koj tus kwv no tuag lawm los nws ciaj rov los, nws ploj lawm los rov qab ntsib dua.

​