Tus Tub Qhe Tsis Ncaj

1 (יהושע)Yahshua kuj hais rau cov thwjtim hais tias, Ib tug nplua nuj muaj ib tug tub qhe uas saib xyuas nws vaj tse. Muaj tibneeg kom rau tus nplua nuj hais tias tus tub qhe ntawd tabtom phob tus nplua nuj tej qhov txhia chaw. 2 Tus nplua nuj thiaj hu tus tub qhe ntawd los hais rau nws hais tias, Zaj uas kuv tau hnov txog koj li ntawd yog li cas? Muab phau ntawv teev nyiaj los rau kuv saib, rau qhov koj yuav ua tsis tau tus uas saib xyuas vaj tse ntxiv mus lawm. 3 Tus tub qhe ntawd xav hauv lub siab hais tias, kuv yuav ua li cas, rau qhov tus lospav muab kuv rho tawm qhov uas ua tus saib tsev lawm? Yuav mus khawb av kuj tsis muaj zog, mus thov khawv kuj txaj muag. 4 Kuv paub lawm hais tias kuv yuav ua li cas, xwv thaum kuv raug rho tawm lawm lwm tus thiaj hu kuv mus rau hauv lawv tsev. 5 Nws txawm hu cov uas tshuav nws tus lospav nqe los ib tug zuj zus mas nug thawj tug hais tias, koj tshuav kuv tus lospav npaum twg? 6 Tus ntawd hais tias, tshuav ib puas thoob roj. Tus tub qhe ntawd hais rau nws hais tias, cia li muab koj daim ntawv tshuav nqe los zaum thiab sau kiag ua tsib caug thoob xwb. 7 Thiab nws nug dua ib tug hais tias, koj tshuav npaum twg? Tus ntawd hais hais tias, tshuav ib puas seev tsaj mog. Tus tub qhe hais rau nws hais tias, cia li muab koj daim ntawv tshuav nqe los sau ua yim caum seev. 8 Tus lospav kuj qhuas tus tub qhe tsis ncaj ntawd vim nws muaj tswvyim ua li ntawd. Rau qhov tibneeg ntiajteb tiam no muaj tswvyim ua haujlwm heev dua txojkev kaj li menyuam.

9 Kuv hais rau nej hais tias, cia li muab tej nyiaj txiag uas tsis ncaj coj mus zeem kwvluag, xwv thaum tej nyiaj txiag tag lawm luag thiaj txais nej nyob hauv lub chaw uas nyob mus ib txhis. 10 Tus uas ua ncaj rau tej yam tsawg kuj yuav ua ncaj rau tej yam ntau. Tus uas ua tsis ncaj rau tej yam tsawg kuj yuav ua tsis ncaj rau tej yam ntau. 11 Yog li ntawd, yog nej ua tsis ncaj rau tej nyiaj txiag uas tsis ncaj, leejtwg yuav muab tej nyiaj txiag uas ncaj cob rau nej? 12 Yog nej ua tsis ncaj rau tej uas yog lwm tus li, leejtwg yuav muab tej uas yog nej li rau nej?

13 Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Abba (יחוח)Yahweh li qhev thiab ua nyiaj txiag li qhev ua ke tsis tau.

​

Tej Kevcai Thiab Abba (יחוח)Yahweh Lub Tebchaws

(Math. 11:12-13,5:31-32;Ycn. Mark 10:11-12)

14 Thaum cov Falixais uas nyiam nyiaj txiag hnov tej lus ntawd lawv txawm thuam luag (יהושע)Yahshua.

15 Tiamsis (יהושע)Yahshua  hais rau lawv hais tias, nej suav hais tias nej yog tibneeg ncaj ncees tab meeg sawvdaws, tiamsis Abba (יחוח)Yahweh paub nej lub siab. Rau qhov yam uas tibneeg saib hais tias muaj nqes yog yam uas Abba (יחוח)Yahweh pom hais tias qias vuab tsuab. 16 Tsuas muaj txoj kevcai thiab cov xibhwb cev Abba (יחוח)Yahweh lus los txog thaum Yahchanan tshwm los xwb. Txij ntawd los, txoj Hmoo zoo hais txog Abba (יחוח)Yahweh lub tebchaws raug muab tshaj tawm, mas sawvdaws siv zog sib txeeb kev mus rau hauv lub tebchaws ntawd. 17 Lub ntuj thiab lub ntiajteb yuav ploj yoojyim dua rhuav txoj kevcai ib nyuag teev pov tseg. 18 Txhua tus nrauj pojniam es nws mus yuav dua pojniam tshiab, kuj yog ua txhaum kev nkauj kev nraug, thiab tus uas yuav ib tug pojniam nrauj ua pojniam kuj yog nws deev luag pojniam.

​

Tus Nplua Nuj Thiab Laxalaus

19 Muaj ib tug nplua nuj hnav tsoos tsamxem thiab ntaub mag zoo zoo nyob xyiv fab noj seem noj so txhua hnub.

20 Thiab muaj ib tug pluag hu ua Laxalaus ua kiav txhab thoob plaws ib ce pw ntawm tus nplua nuj lub rooj vag. 21 Nws xav noj tus nplua nuj tej qub mov uas poob saum rooj los, thiab dev tseem los muab nws tej kiav txhab yaim. 22 Dhau ntawd tus pluag ntawd txawm tuag mas cov tubtxib saum ntuj qaws nws mus rau ntawm Abraham lub xubntiag. Tus nplua nuj kuj tuag thiab muab faus. 23 Thaum nws raug tsim txom hauv tub tuag teb, nws tsa qhov muag saib pom Abraham nyob deb deb thiab Laxalaus nyob ntawm Abraham xubntiag. 24 Tus nplua nuj txawm hu hais tias, txiv Abraham es, thov khuvleej kuv lauj. Thov txib Laxalaus tuaj muab nws tus hau ntiv tes raus dej los twb kuv tus nplaig kom laj, rau qhov kuv raug txom nyem heev kawg hauv cov nplaim taws no.

25 Tiamsis Abraham hais tias, tub es, koj cia li nco hais tias, thaum koj tseem ua neej nyob, koj tau txhua yam zoo rau koj tiamsis Laxalaus tau yam uas phem kawg. Nimno nws tau kev nplij siab lawm, koj ho raug kev txom nyem heev.

26 Tsis tag li ntawd nyob ntawm peb thiab nej ntu nruab nrab, muaj ib lub niag hav tob heev quas lawm, kom cov uas xav hla tim no mus rau tim nej los tsis tau, thiab cov tim nej hla los tim peb los kuj tsis tau. 27 Tus nplua nuj txawm hais tias, yog li ntawd, kuv txiv, thov koj txib Laxalaus rov mus rau tom kuv txiv tsev, 28 rau qhov kuv tseem tshuav tsib tug kwv, kom Laxalau mus qhuab ntuas lawv xwv lawv thiaj tsis los raug tsim txom hauv lub chaw no. 29 Tiamsis Abraham hais tias, lawv muaj Mauxes thiab cov xibhwb cev Abba (יחוח)Yahweh lus lawm, cia lawv mloog cov tibneeg ntawd hais.

30 Nws txawm hais tias, txiv Abraham es, tsis tau li. Yog muaj ib tug tawm hauv cov tibneeg tuag mus cuag lawv, lawv thiaj li ntxeev dua siab tshiab. 31 Abraham hais rau nws hais tias, yog lawv tsis mloog Mauxes thiab cov xibhwb cev Abba (יחוח)Yahweh lus hais, ces txawm yog muaj ib tug sawv hauv qhov tuag los los lawv yeej yuav tsis ntseeg.