Poj Koob Yawm Txwv Tej Lus Qhia

(Yahchanan Mark 7:1-13)

1 Thaum ntawd cov Falixais thiab cov xibhwb qhia Abba (יחוח)Yahweh kevcai tawm hauv Yeluxalees tuaj cuag (יהושע)Yahshua thiab nug hais tias, 2 Ua cas koj cov thwjtim tsis ua raws li poj koob yawm txwv tej kevcai? Rau qhov thaum lawv noj mov lawv tsis xub ntxuav tes. 3(יהושע)Yahshua teb lawv tias, Ua cas nej rhuav Abba (יחוח)Yahweh tej lus nkaw vim yog saib rau nej tej kevcai?  4 Rau qhov Abba (יחוח)Yahweh twb hais cia tias, Koj yuav tsum hwm koj niam koj txiv,  thiab hais tias, Leejtwg hais lus phem rau nws niam nws txiv mas yuav raug txim tuag. 5 Tiamsis nej qhia hais tias, yog leejtwg hais rau nws niam nws txiv tias, yam uas muaj qabhau rau neb twb muab pub rau Abba (יחוח)Yahweh lawm,  6 nws thiaj tsis txog hwm nws txiv. Nej ua li no twb yog nej rhuav Abba (יחוח)Yahweh tej lus vim yog saib rau nej tej kevcai. 7 Cov tibneeg ncauj lus zoo siab phem, Isayah cev lus zoo heev hais txog nej tias, 8 Cov tibneeg no hwm kuv ntawm daim tawv ncauj xwb tiamsis lawv lub siab nyob deb kuv. 9 Qhov uas lawv pe hawm kuvtsis muaj qabhau kiag li, lawv muab tibneeg tej kevcai los qhia ib yam li yog Abba (יחוח)Yahweh tej lus nkaw.

​

Yam Uas Ua Rau Tibneeg Qias Tsis Huv

(Yahchanan Mark 7:14-23)

10(יהושע)Yahshua hu cov tibneeg tuaj cuag nws thiab hais rau lawv tias, cia li mloog thiab nkag siab nawj. 11 Tsis yog yam uas nkag rau hauv lub qhov ncauj ua rau tibneeg qias tsis huv, tiamsis yog yam uas tawm hauv lub qhov ncauj los thiaj ua rau tibneeg qias tsis huv. 12 Thaum ntawd cov thwjtim txawm los hais rau (יהושע)Yahshua tias, Koj puas paub tias thaum cov Falixais hnov tej lus ntawd lawv tsis txaus siab heev?  

13 Nws teb tias, txhua tsob ntoo uas tsis yog kuv Abba (יחוח)Yahweh cog mas yuav raug muab dob pov tseg. 14 Cia lawv ua lawv. Lawv yog cov dig muag coj dig muag kev. Yog tus dig muag coj tus dig muag kev mas ob leeg yeej yuav poob rau hauv qhov. 15 Petus hais rau (יהושע)Yahshua tias, thov koj txhais zaj paj lug ntawd rau peb paub.

16 Mas (יהושע)Yahshua hais tias, nej tseem tsis tau to taub thiab lov?  17 Nej tsis pom tias yam uas nkag rau hauv lub qhov ncauj kuj nqes rau hauv lub plab thiab tawm rau hauv lub qhov vuab tsuab lawm lov?  18 Tiamsis yam uas tawm hauv tibneeg lub ncauj kuj yog tawm hauv lub siab los, thiaj ua rau tibneeg qias tsis huv. 19 Qhov uas xav phem, tua tibneeg, deev luag poj luag txiv, ua nkauj ua nraug, ua tub sab, ua cuav timkhawv, iab liam luag puavleej yog tawm hauv lub siab los. 20 Tej no thiaj ua rau tibneeg qias tsis huv. Tiamsis qhov uas tsis ntxuav tes cia li noj mov tsis ua rau tibneeg qias tsis huv.

​

Tus Pojniam Khana‑ as Kev Ntseeg

(Yahchanan Mark 7:24-30)

21(יהושע)Yahshua txawm tawm qhov ntawd mus rau hauv lub nroog Thailab thiab lub nroog Xaidoo. 22 Ces nws txawm muaj ib tug pojniam Khana‑as uas nyob tebchaws ntawd tawm tuaj qw hais tias, Tus Tswv uas yog Daviv li tub, thov khuvleej kuv lauj! Kuv tus ntxhais raug dab txom nyem kawg li.

23(יהושע)Yahshua tsis teb ib los li, mas cov thwjtim los thov (יהושע)Yahshua hais tias, cia li ntiab tus pojniam ntawd khiav mus, rau qhov nws pheej qw raws peb qab.

24(יהושע)Yahshua teb tias, Kuv raug txib mus kom txog Ixayees caj ces cov yaj uas ploj lawd. 25 Tiamsis tus pojniam ntawd los pe thov (יהושע)Yahshua hais tias, Tus Tswv, thov pab kuv lauj! 26(יהושע)Yahshua teb tias, tsis tsim nyog muab menyuam tej mov pov rau dev noj. 27 Tus pojniam ntawd thiaj hais tias, Tus Tswv, tseeb tiag, tiamsis dev yeej tau noj tej mov uas poob saum Tus Tswv lub rooj los.

28(יהושע)Yahshua txawm teb nws tias, Mentxhais  es, koj txojkev ntseeg loj heev, cia muaj raws li koj ntshaw. Ces nws tus ntxhais txawm zoo kiag tamsim ntawd.

29(יהושע)Yahshua txawm tawm qhov ntawd mus taug ntug Hiavtxwv Kalilais thiab nce mus zaum saum lub pov roob. 30 Muaj tibneeg coob coob tuaj cuag (יהושע)Yahshua. Lawv coj tej tibneeg ceg tawv, tibneeg tuag tes tuag taw, tibneeg dig muag, tibneeg ruam thiab tej uas mob lwm yam ntau leej tuaj tso rau ntawm (יהושע)Yahshua kotaw. Mas (יהושע)Yahshua kho lawv zoo huvsi. 31 Cov tibneeg ntawd thiaj phimhwj heev rau thaum lawv pom cov tibneeg ruam hais tau lus, cov uas tuag tes tuag taw zoo, cov tibneeg ceg tawv mus tau kev thiab cov dig muag pom kev lawm. Lawv thiaj qhuas cov Ixayees Tus Tswv.

​

(יהושע)Yahshua Pub Mov Rau 4,000 Leej Noj

(Yahchanan Mark 8:1-10)

32(יהושע)Yahshua hu nws cov thwjtim los thiab hais tias, Kuv khuvleej cov tibneeg no, vim lawv twb nrog kuv nyob tau peb hnub no thiab tsis muaj mov noj lawm. Kuv tsis xav tso lawv mus tshaib qaug zog zis, ntshai tsam lawv ho tsaus muag tom tej kev. 33 Cov thwjtim hais rau (יהושע)Yahshua tias, hauv ntuj nrag teb do no peb yuav nrhiav mov qhovtwg los txaus rau cov tibneeg coob npaum li no noj?  34(יהושע)Yahshua hais rau lawv tias, nej muaj tsawg lub ncuav? Lawv teb tias, muaj xya lub thiab ob peb tug ntses me me. 35 Nws txawm hais kom cov tibneeg zaum rau hauv pem teb, 36 thiab nws muab xya lub ncuav thiab cov ntses ntawd los ua Abba (יחוח)Yahweh tsaug mas muab ntais cev rau cov thwjtim, cov thwjtim muab faib rau cov tibneeg coob coob ntawd. 37 Lawv sawvdaws noj tsau, mas tej uas noj tsis tag lawv khaws tau xya tawb puv nkaus. 38 Cov uas noj zaum ntawd cov txivneej xwb muaj plaub txhiab leej tsis suav cov pojniam menyuam.

39(יהושע)Yahshua tso cov tibneeg rov mus tag lawm nws txawm nce nkoj mus rau tim ib cheebtsam ntawm lub moos Magdalene.