Tibneeg Xav Pom Txujci Tseem Ceeb

(Yahchanan Mark 8:11-13, Luke 12:54-56)

1 Cov Falixais thiab cov Xadukais tuaj sim (יהושע)Yahshua thov kom nws ua ib yam txujci tseem ceeb tshwm saum ntuj los rau lawv pom. 2(יהושע)Yahshua txawm teb lawv tias, thaum yuav tsaus ntuj nej hais tias, tagkis yuav tshav ntuj vim yog qab ntuj liab liab. 3 Thaum sawv ntxov nej hais tias, Hnub no yuav muaj nag xob nag cua vim yog qab ntuj liab thiab tsaus nti. Nej txawj saib lub ntuj thiaj paub tias yuav muaj abtsi tshwm los, tiamsis tej txujci tseem ceeb ntsig txog tiam no nej ho tsis paub. 4 Tiam tibneeg no phem thiab fav xeeb nrhiav ib yam txujci tseem ceeb, tiamsis yuav tsis muab dua txujci tseem ceeb rau lawv pom tsuas yog zaum txujci uas muaj rau Yauna xwb. Ces (יהושע)Yahshua txawm ncaim lawv mus lawm.

​

Cov Falixais Thiab Cov Xadukais Cov Keeb

(Yachanan Mark 8:14-21)

5 Thaum cov thwjtim hla mus rau sab Hiav-txwv tim ub, lawv tsis nco qab coj ncuav mus.

6(יהושע)Yahshua txawm hais rau lawv tias, nej yuav tsum ua tib zoo ceev faj cov Falixais thiab cov Xadukais cov keeb.

7 Cov thwjtim txawm sib tham hais tias, yog tim qhov uas peb tsis coj ncuav tuaj.

8(יהושע)Yahshua paub tej uas lawv tham ntawd, nws thiaj hais tias, nej cov uas kev ntseeg yau es, ua cas nej sib tham txog qhov uas tsis muaj ncuav? 9 Nej tseem tsis tau nkag siab lov? Nej tsis nco tsib lub ncuav thiab tsib txhiab leej thiab nej khaws tau pes tsawg tawb lov?  10 Nej tsis nco xya lub ncuav thiab plaub txhiab leej thiab nej khaws tau pes tsawg tawb lov?  11 Ua cas nej tsis to taub tias kuv tsis tau hais txog tej ncuav? Cia li ceev faj cov Falixais thiab cov Xadukais cov keeb. 12 Lawv thiaj nkag siab tias tsis yog (יהושע)Yahshua hais kom lawv ceev faj cov keeb ua ncuav, tiamsis yog hais kom ceev faj cov Falixais thiab cov Xadukais tej lus qhia.

​

Kepha Hais Tias (יהושע)Yahshua Yog Tus Messiah

(Yahchanan 8:27-30, Luke 9:18-21)

13 Thaum (יהושע)Yahshua mus rau hauv lub moos Xixaleyas Filipis ces nws txawm ntsib thiab nug nws cov thwjtim tias, Luag tej hais tias Neeg Leej Tub yog leejtwg?  

14 Lawv hais tias, qee leej hais tias yog Yahch-anan  uas coj ua kevcai raus dej, qee leej hais tias yog Eliyas, thiab dua lwm tus hais tias koj yog Yelemyah lossis yog dua ib tug xibhwb cev Abba (יחוח)Yahweh lus.

15(יהושע)Yahshua hais rau lawv tias, nej nev nej hais tias kuv yog leejtwg?

16 Simon Kepha teb tias, koj yog tus Messiah, yog Abba (יחוח)Yahweh uas muaj txojsia nyob leej tub.

17(יהושע)Yahshua thiaj hais rau Kepha tias, Yaunas tus tub Simon  es, koj tau koob hmoov, rau qhov tsis yog tibneeg uas muaj roj muaj ntshav qhia rau koj, tiamsis yog kuv Abba (יחוח)Yahweh uas nyob saum ntuj qhia rau koj. 18 Kuv hais rau koj tias, koj yog Kepha  kuv yuav tsim tsa kuv pawg ntseeg rau saum lub txhib zeb no, thiab tub tuag teb lub zog yuav kov tsis yeej pawg ntseeg no.

19 Kuv yuav muab tus yuam sij lub nroog Yeluxalees rau koj. Koj txwv yam twg  hauv lub ntiajteb yam ntawd kuj raug txwv saum ntuj, koj tso ncauj  yam twg hauv lub ntiajteb yam ntawd kuj raug tso ncauj saum ntuj thiab. 20 Ces (יהושע)Yahshua txawm txwv cov thwjtim kom tsis txhob qhia rau leej-twg paub tias nws yog tus Messiah.

​

(יהושע)Yahshua Hais Txog Nws Kev Tuag

(Yahchanan Mark 8:31-9:1, Luke 9:22-27)

21 Txij thaum ntawd los (יהושע)Yahshua txawm pib qhia rau nws cov thwjtim paub tias nws yuav tsum mus rau Yeluxalees thiab yuav raug cov kev txwj laus thiab cov pov thawj hlob thiab cov xibhwb qhia Abba Yahweh kevcai tsim txom thiab raug muab tua mas peb hnub nws yuav raug muab tsa ciaj sawv rov los.

22 Ces Kepha txawm coj (יהושע)Yahshua mus rau ib cag pib txwv nws hais tias, Tus Tswv, thov kom tsis txhob muaj li ntawd. Koj yeej yuav tsis raug li ntawd. 23(יהושע)Yahshua txawm tig hais rau Kepha tias, Xatas, koj cia li khiav rau tom kuv qub qab. Koj ua chaw rau kuv dawm rau qhov koj xav li tibneeg xwb tsis xav li Abba (יחוח)Yahweh.

24 Thaum ntawd (יהושע)Yahshua hais rau nws cov thwjtim tias, yog leejtwg xav raws kuv qab mus, cia tus ntawd tswj nws tus kheej thiab kwv nws tus ntoo ntsia tes raws kuv qab. 25 Vim tias tus uas xav cawm tau nws txojsia yuav piam txojsia, tiamsis tus uas tso nws txojsia tseg vim yog saib rau kuv, mas yuav nrhiav tau txojsia. 26 Yog leejtwg tau tag nrho lub ntiajteb huvsi tiamsis nws txojsia tu lawm, tus ntawd yuav tau qabhau abtsi? Tibneeg yuav muab abtsi pauv tau txojsia rov los?

27 Neeg Leej Tub yuav nrog leej Txiv lub hwjchim ci ntsa iab los thiab nrog nws cov tubtxib saum ntuj ua ke los mas nws yuav ntxiv rau txhua tus raws li tej uas lawv ua lawd. 28 Kuv hais tseeb rau nej tias, cov uas sawv ntawm no muaj qee leej yuav tsis tau sim txojkev tuag ces yuav xub pom Neeg Leej Tub los ua vajntxwv kav.