Qhuas (יחוח)Yahweh Uas Hlub Yeluxalees

​

1 Halleluyah! Cia li qhuas (יחוח)Yahweh. Qhov uas hu nkauj qhuas peb Tus Tswv yog qhov uas zoo, qhov uas hu nkauj qhuas nws yog yam uas peb zoo siab ua thiab tsim nyog peb ua.  

2 (יחוח)Yahweh rov qab rhawv lub nroog Yeluxalees, thiab nws qaws cov Ixayees uas tawg ua sab ua sua rov qab los.

3 Nws kho cov tibneeg lwj siab thiab qhwv lawv tej qhov txhab.

4 Nws suav cov hnub qub saib muaj pes tsawg lub thiab tis npe rau txhua lub huvsi.  

5 Peb Tus Tswv loj kawg thiab muaj hwj chim kawg nkaus, tsis muaj leejtwg yuav ntsuas tau nws lub tswvyim.

6 (יחוח)Yahweh tsa cov uas raug tsuj yuam sawv, nws yuav qhau cov tibneeg limhiam rau hauv av.

7 Cia li hu nkauj ua (יחוח)Yahweh tsaug, cia li ntaus nkauj nog ncas qhuas peb Tus Tswv.

8 Nws tso huab laum nruab ntug, nws npaj nag cia rau lub ntiajteb, nws ua kom tuaj nyom rau saum tej roob.  

9 (יחוח)Yahweh pub zaub rau tej tsiaj txhu noj thiab pub rau tej menyuam uab lag uas quaj tau noj.

10 (יחוח)Yahweh tsis yog zoo siab rau tej nees lub zog, thiab tsis yog nws zoo siab rau tibneeg txhais ceg uas dhia.

11 Tiamsis (יחוח)Yahweh zoo siab rau cov uas hwm thiab paub ntshai nws thiab cov uas vam khom rau nws txojkev hlub uas ruaj khov.

12 Yeluxalees es, cia li qhuas (יחוח)Yahweh, Xi‑oo es, cia li qhuas koj Tus Tswv.

13 vim nws tuav koj tej rooj loog ruaj khov kho, nws foom koob hmoov rau tej tub ki uas nyob hauv koj.

14 (יחוח)Yahweh kuj pub kev thaj yeeb rau hauv koj lub tebchaws, nws pub koj tau noj tej mog zoo zoo tsau npo.  

15 (יחוח)Yahweh xa nws tej kevcai tuaj rau lub ntiajteb, nws tej lus nthuav mus sai kawg.

16 (יחוח)Yahweh tso daus los yam li plaub yaj. (יחוח)Yahweh tso te los dawb vog li hmoov tshauv.

17 (יחוח)Yahweh tso lawg los yam li qe zeb. Leejtwg yuav thev taus qhov uas nws ua kom no txias heev ntawd?  

18 (יחוח)Yahweh tso lus plhuav, ua rau tej ntawd yaj tag, nws tso nws li cua ntsawj ua tej dej ntws kiag mus.

19 (יחוח)Yahweh qhia nws tej lus rau Yakhauj, thiab qhia nws tej kab ke thiab kevcai rau Ixayees.

20 (יחוח)Yahweh yeej tsis tau qhia tej kevcai no rau lwm haiv neeg, lawv tsis paub nws tej kevcai. Halleluyah! Cia li qhuas (יחוח)Yahweh.