Xyaum Raws Li (יהושע)Yahshua  Uas Txo Hwjchim

1 Vim li no, yog nej muaj kev txhawb siab rau hauv (יהושע)Yahshua Messiah, thiab muaj kev nplij siab ntawm txojkev sib hlub, thiab muaj kev sib raug zoo rau hauv Tus Ntsuj Plig Dawbhuv, thiab muaj qhov uas ib leeg mob siab rau ib leeg, thiab ib leeg khuvleej ib leeg li cas lawm. 2 Kuj cia li ua rau kuv zoo siab xyiv fab kawg nkaus, vim nej muaj lub siab xav ib yam nkaus, muaj lub siab hlub ib yam nkaus, thiab koom ua ib lub siab, thiab koom ib txoj kev xav ib yam nkaus.

3 Tsis txhob ua siab hlob txeeb ua ib yam abtsi rau yus lossis tsab ua loj tiamsis yuav tsum txo hwjchim xam pom lwm tus zoo dua yus. 4 Nej tsis txhob nyias xam pom nyias tus kheej xwb,yuav tsum xam pom lwm tus thiab.

5 Nej cia li muaj lub siab zoo li no rau hauv nej, ib yam li muaj rau hauv (יהושע)Yahshua Messiah. 6 Nws yeej zoo ib yam li Abba (יחוח)Yahweh, tiamsis nws tsis suav tias, yuav txeeb qhov uas sib luag li Abba (יחוח)Yahweh rau nws,

7 tiamsis nws yeem muab txhua yam tso tseg, es saws lub neej zoo li tus qhev, thiab los yug ua tibneeg. Thaum nws yug los ua tibneeg, 8 nws txo nws tus kheej kom qes, thiab mloog lus mus txog ntua thaum uas nws tuag, yog tuag saum tus ntoo ntsia tes.

9 Vim li no, Abba (יחוח)Yahweh thiaj muab nws tsa siab kawg nkaus thiab pub lub npe uas siab tshaj tej npe huvsi rau nws, 10 vim lub npe (יהושע)Yahshua ntawd, txhua lub hauv caug saum ntuj thiab hauv ntiajteb, thiab hauv qab ntiajteb, yuav txhos caug ntua pe nws. 11 Thiab txhua tus nplaig yuav lees tias (יהושע)Yahshua Messiah yog tus Cawmseej thiaj ua rau Abba (יחוח)Yahweh uas yog Leej Txiv tau koob meej ci ntsa iab.

​

Tsom Duab Ci Rau Lub Ntiajteb

12 Yog li ntawd, cov kwvtij uas kuv hlub, ib yam li nej txeev mloog kuv lus tsis tu ncua, tsis yog mloog rau thaum kuv nrog nej nyob xwb, tiamsis thaum kuv tsis nrog nej nyob, nej kuj yimhuab yuav mloog, mas nimno nej yuav tsum ntshai tshee hnyo ua lub neej phim nej txojkev dim kom tiav.

13 Rau qhov Abba (יחוח)Yahweh ua haujlwm rau hauv nej, kom nej muaj lub siab xav thiab muaj peevxwm ua raws li nws lub siab nyiam. 14 Cia li ua txhua yam, tsis txhob sib yws sib cav, 15 kom nej thiaj tsis muaj chaw thuam thiab tsis muaj qhov txhaum, ua Abba (יחוח)Yahweh cov menyuam uas tsis muaj ib qhov phem rau hauv nruab nrab tiam neeg phem thiab nkhaus no, thiab ci rau hauv lawv ib yam li tej hnub qub ci rau lub ntiajteb.

16 Cia li tuav txojlus uas pub txojsia ruaj, xwv kuv thiaj qhuas tau rau (יהושע)Yahshua Messiah hnub hais tias, kuv tsis tau khiav do do xwb lossis siv zog ua haujlwm tsis muaj nuj nqis. 17 Txawm yog kuv yuav raug muab hliv ib yam li tej cawv txiv hmab uas hliv xyeem rau saum tej uas nej muab xyeem, thiab saum tej haujlwm uas nej ua, vim nej ntseeg, kuv kuj zoo siab thiab nrog nej txhua tus zoo siab xyiv fab. 18 Thiab tsim nyog nej yuav zoo siab thiab nrog kuv zoo siab xyiv fab.

​

Timothy Thiab Epafauditas

19 Kuv cia siab hais tias, yog peb tus Cawm-seej (יהושע)Yahshua pom zoo, tsis ntev no kuv yuav txib Timothy tuaj saib nej, xwv thaum kuv hnov nej xov lawd, thiaj txhawb tau kuv lub siab.  20 Timothy tib leeg xwb, thiaj li xav ib yam li kuv thiab mob siab txog nej.

21 Dua li lwm tus, lawv tsuas xav txog lawv tej haujlwm xwb, lawv tsis quavntsej (יהושע)Yahshua Messiah tej haujlwm li.

22 Nej twb paub lawm hais tias, Timothy tes haujlwm muaj nqis heev, nws nrog kuv ua txoj hauj-lwm uas qhia txojmoo zoo ib yam li wb yog ob txiv tub. 23 Yog li ntawd, thaum twg kuv paub hais tias lawv yuav ua li cas rau kuv, kuv cia siab hais tias, kuv yuav tau txib Timothy tuaj qhia rau nej sai sai. 24 Thiab kuv cia siab hais tias, yog Abba (יחוח)Yahweh pom zoo, tsis ntev no kuv yuav tau tuaj saib nej thiab. 25 Kuv pom tias cheem tsum xa Epafauditas tuaj cuag nej. Nws yog kuv kwvtij uas nrog kuv koom ua haujlwm thiab nrog kuv ua tub rog, thiab tseem yog tus tubtxib uas nej txib tuaj tu kuv thiab pab tej uas kuv tu ncua.

26 Vim nws nco txog nej sawvdaws, thiab nws txhawj txog qhov uas nej hnov tias nws muaj mob. 27 Nws yeej mob tiag, twb yuav luag tuag, tiamsis Abba (יחוח)Yahweh khuvleej nws, thiab tsis yog khuvleej nws tib leeg xwb, tseem khuvleej kuv thiab, xwv kuv thiaj tsis raug kev txhawj xeeb tsav ntxiv rau tej kev txhawj. 28 Vim li no kuv yimhuab xav xa nws tuaj kom nej thiaj zoo siab qhov uas rov pom nws, thiab qhov uas kuv txhawj thiaj li tsawg zuj zus mus. 29 Vim li no, cia li zoo siab hlo txais nws hauv Abba (יחוח)Yahweh, thiab hwm cov neeg uas zoo li no, 30 rau qhov nws twb yuav luag tuag, vim yog (יהושע)Yahshua Messiah tes haujlwm, nws sev txojsia zoo siab ua num rau kuv, rau tej uas nej ua tsis tau.

​