Hais Rau Lub Moos Ephesus

1 Cia li sau xa mus rau tus tubtxib saum ntuj uas saib pawg ntseeg hauv lub moos Ephesus li no: Tus uas tuav rawv xya lub hnub qub hauv nws txhais tes xis, thiab mus mus los los hauv nruab nrab xya tus ncej kub txawb teeb hais li no tias, 

2 Kuv paub koj tes haujlwm, thiab paub qhov uas koj khwv heev, thiab ua siab ntev thev ua haujlwm, thiab paub tias koj uv tsis taus cov tibneeg ua phem ntxiv lawm, thiab koj twb tshuaj saib cov uas khav hais tias lawv yog tubtxib tiamsis tsis yog, thiab koj twb pom tias lawv cov ntawd dag xwb. 3 Kuv paub tias, koj muaj lub siab ntev thev taus thiab yeem thev, vim saib rau kuv lub npe, thiab tsis qaug zog. 4 Tiamsis tshuav ib qho uas kuv tsis qhuas koj, yog qhov uas koj muab txojkev hlub uas koj muaj thaum chiv thawj tso tseg lawm. 5 Vim li no, cia li nco txog lub neej uas koj poob los ntawd, cia li ntxeev dua siab tshiab thiab ua tes haujlwm ib yam li thaum chiv thawj. Yog tsis ua li ntawd, kuv yuav tuaj saib koj thiab muab tus ncej txawb teeb rho ntawm koj mus, yuav yog koj ntxeev dua siab tshiab xwb, thiaj tsis muab rho mus. 6 Tiamsis koj tseem muaj qhov zoo thiab, yog qhov uas koj ntxub cov tibneeg Nikaulaites ib yam li kuv ntxub. 7 Tus uas muaj pobntseg cia li mloog tej uas Tus Ntsuj Plig Dawbhuv hais rau cov pawg ntseeg. Tus uas kov yeej, kuv yuav pub nws noj tsob txiv ntoo uas pub txojsia uas nyob hauv Abba (יחוח)Yahweh lub vaj uas zoo kawg nkaus.

​

Hais Rau Lub Moos Smyrna

8 Cia li sau xa mus rau tus tubtxib saum ntuj uas saib pawg ntseeg hauv lub moos  Smyrna li no: Tus uas yog lub hauv paus thiab yog lub ntsis, tus uas twb tuag thiab sawv hauv qhov tuag rov qab los lawm hais li no tias, 9 Kuv paub tias, koj raug kev tsim txom thiab kev pluag, tiamsis qhov tseeb, koj kuj yog tibneeg nplua nuj. Thiab kuv paub txog qhov uas cov tibneeg uas khav tias, lawv yog neeg Yahdaim, tiamsis tsis yog, iab liam koj. Lawv yog Xatas lub tsev sablaj xwb.

10 Tsis txhob ntshai qhov uas nej yuav raug kev tsim txom. Saib maj, Ntxwg Nyoog yuav muab nej qee leej pov rau hauv tsev lojfaj, xwv thiaj tau chaw sim nej, thiab nej yuav raug kev tsim txom kaum hnub. Koj cia li muab siab rau ntseeg mus txog hnub tuag tsis txhob tso kuv tseg, mas kuv yuav muab lub mom kub uas yog txojsia rau koj. 11 Tus uas muaj pobntseg cia li mloog tej uas Tus Ntsuj Plig Dawhhuv qhia rau cov pawg ntseeg. Tus uas kov yeej, yuav tsis raug txojkev tuag zaum ob kiag li.

​

Hais Rau Lub Moos Pergamos

12 Cia li sau xa mus rau tus tubtxib saum ntuj uas saib pawg ntseeg hauv lub moos Perga-mos li no: Tus uas tuav rawv rab ntaj ob sab ntse hais li no tias, 13 Kuv paub qhov chaw uas koj nyob, yog lub chaw uas muaj Xatas lub zwm txwv. Tiamsis koj tseem tuav rawv kuv lub npe thiab koj tsis muab txojkev ntseeg kuv tso tseg. Txawm yog thaum Atipas uas ua timkhawv ncaj ncees rau kuv raug muab tua hauv nruab nrab nej uas yog Xatas lub chaw nyob los koj tsis tso kuv tseg.

14 Tiamsis tshuav ob peb qho uas kuv tsis qhuas koj. Rau qhov nej cov, muaj qee leej tuav rawv Npala‑as tej lus qhia uas qhia rau Vajntxwv Npalaj hais tias, yog koj xav kom cov Ixayees yuam kev ua txhaum, koj cia li hais kom lawv noj tej zaub mov uas luag muab xyeem rau tej dab tej mlom lawm, thiab kom lawv ua kev nkauj kev nraug. 15 Ib yam li ntawd, koj kuj muaj qee leej uas tuav rawv cov neeg Nikaulaites tej lus qhia lawm thiab.

16 Vim li no, cia li ntxeev dua siab tshiab. Yog tsis ua li ntawd kuv yuav tuaj saib koj sai sai no, thiab yuav xuas rab ntaj uas yog kuv lub qhov ncauj tawm tsam cov tibneeg ntawd. 17 Tus uas muaj pobntseg cia li mloog tej uas Tus Ntsuj Plig Dawbhuv qhia rau cov pawg ntseeg. Tus uas kov yeej, kuv yuav muab cov manas uas muab zais cia lawd, rau nws noj thiab yuav muab ib lub pob zeb dawb rau nws. Muaj lub npe tshiab sau cia ntawm lub pob zeb ntawd, tsis muaj leejtwg paub li. Tsuas yog tus uas tau txais thiaj paub xwb.

​

Hais Rau Lub Moos Thyatira

18 Cia li sau xa mus rau tus tubtxib saum ntuj uas saib pawg ntseeg hauv lub moos Thyatira li no: Abba (יחוח)Yahweh tus Tub uas ob lub qhovmuag ci zoo ib yam li nplaim taws, thiab ob txhais kotaw ci zoo ib yam li tej tooj liab uas luag twb muab txhuam ci nplas lawm, hais li no tias, 19 Kuv paub koj tes haujlwm thiab paub koj kev hlub, kev ntseeg, kev ua num rau luag thiab qhov uas ua siab ntev thev, thiab paub tias tej haujlwm uas koj ua thaum kawg no zoo dua thaum chiv thawj. 20 Tiamsis muaj ib qho uas kuv tsis qhuas koj, yog qhov uas koj tso ncauj rau tus niag pojniam Yexenpees uas khav hais tias nws yog poj xibhwb cev Abba (יחוח)Yahweh lus thiab nws qhia thiab dag ntxias kuv cov tub qhe kom ua nkauj ua nraug thiab noj tej zaub mov uas muab xyeem rau dab mlom. 21 Kuv pub sijhawm rau nws ntxeev dua siab tshiab tiamsis nws tsis yeem ntxeev dua siab tshiab ntawm qhov uas ua nkauj ua nraug. 22 Saib maj, kuv yuav muab nws pov rau hauv lub lav mob, thiab muab cov uas nrog nws sib deev pov rau hauv txojkev txom nyem loj heev, ntshai tsuas yog lawv ntxeev dua siab tshiab ntawm tus pojniam ntawd tej kev phem lawm xwb.

23 Kuv yuav muab tus pojniam ntawd, cov menyuam tua pov tseg. Mas txhua pawg ntseeg yuav paub tias kuv yog tus uas tshuaj saib lawv lub siab, thiab tej uas lawv xav, thiab kuv yuav pub rau nej txhua tus raws li tej haujlwm uas txhua tus ua. 24 Tiamsis nej cov uas nyob hauv lub moos Thiathilas muaj ib txhia kuj tsis tau coj raws li tej lus qhia uas phem ntawd, thiab tsis tau kawm tej uas luag hais tias, yog tej uas nyob tob tob hauv dab Ntxwgnyoog tej ntsiab lus uas tsis muaj tibneeg paub. Kuv qhia rau nej hais tias, kuv yuav tsis muab lub nra hnyav rau nej ris.

25 Tsuav yog nej tuav rawv tej uas nej muaj lawd, mus txog thaum kuv rov los xwb.  26 Tus uas kov yeej thiab ua kuv tes haujlwm mus txog thaum kawg, kuv yuav pub kom nws muaj hwjchim kav ib tsoom tebchaws. 27 Nws yuav xuas qws hlau kav lawv, ib yam li tej lauj kaub av, uas raug muab tsoo ntsoog tag,

28 ib yam li kuv tau txais hwjchim ntawm kuv Leej Txiv lawm, thiab kuv yuav muab lub hnub qub toog rau nws. 29 Tus uas muaj pobntseg cia li mloog tej uas Tus Ntsuj Plig Dawbhuv qhia rau cov pawg ntseeg.

​