144,000 Leej Zaj Nkauj

1 Kuv saib mas pom tus Menyuam Yaj sawv saum lub roob Xi‑oo, thiab cov uas nrog nws ua ke muaj 144,000 leej uas muaj nws lub npe thiab muaj nws Leej Txiv lub npe sau rau ntawm lawv hauv pliaj. 2 Kuv hnov ib lub suab hais saum ntuj tuaj, nrov zoo ib yam li dej tsaws tsag thiab ib yam li xob nroo nrov heev. Lub suab uas kuv hnov ntawd, nrov yam nkaus li cov uas tabtom ntaus nkauj nog ncas lub suab. 3 Lawv hu ib zaj nkauj tshiab rau ntawm lub zwm txwv lub xubntiag, thiab ntawm plaub tug tsiaj ciaj sia, thiab cov kev txwj laug xubntiag. Tsis muaj leejtwg kawm tau txoj nkauj ntawd, tsuas yog 144,000 leej uas twb txhiv hauv ntiajteb lawm xwb. 4 Cov tibneeg no yog cov uas dawb huv, vim lawv yeej tsis tau ti dua pojniam. Lawv raws tus Menyuam Yaj qab mus rau txhua qhov. Lawv twb raug txhiv hauv tibneeg los ua thawj phaum uas muab xyeem rau Abba (יחוח)Yahweh thiab rau tus Menyuam Yaj, 5 thiab tsis pom muaj tej lus dag hauv lawv lub qhov ncauj kiag li, lawv tsis muaj chaw thuam.

​

Peb Tug Tubtxib Saum Ntuj

6 Kuv pom dua ib tug tubtxib saum ntuj, ya mus rau saum nruab ntug coj txoj hmoo zoo uas nyob ib txhis mus qhia rau cov uas nyob hauv lub ntiajteb, yog qhia rau txhua lub tebchaws, txhua xeem, txhua yam lus, thiab txhua haiv neeg.

7 Nws qw nrov nrov hais tias, cia li paub ntshai Abba (יחוח)Yahweh thiab qhuas nws, vim lub sijhawm uas nws yuav txiav txim los txog lawm. Thiab pe hawm tus uas tsim lub ntuj, ntiajteb, dej hiavtxwv, thiab tej qhov dej txhawv huvsi.

8 Muaj dua ib tug tubtxib saum ntuj yog tus uas ob, raws nws qab mus hais tias, lub nroog loj Npanpiloos pob tag, pob tag lawm, yog lub nroog uas yuam ib tsoom tebchaws sawvdaws haus nws tej cawv txiv hmab uas yog nws txojkev ntshaw ua nkauj ua nraug. 9 Muaj dua ib tug tubtxib saum ntuj, uas yog tus peb, raws ob tug qab mus qw nrov hais tias, yog leejtwg pe hawm tus tsiaj thiab nws tus dab mlom, thiab ntaus nws lub cim rau ntawm hauv pliaj, lossis ntawm txhais tes.

10 Tus ntawd yuav haus cov cawv txiv hmab uas yog Abba (יחוח)Yahweh txojkev npau taws uas muab hliv rau hauv Abba (יחוח)Yahweh txojkev chim lub khob, uas tsis muaj lwm yam tov li, thiab tus ntawd yuav raug tsim txom hauv hluavtaws thiab lawj faj tab meeg cov tubtxib saum ntuj dawb huv thiab tus Menyuam Yaj lub xubntiag. 11 Cov pa ncho hauv qhov uas lawv raug tsim txom, yuav ncho qas lug mus ib txhis tsis kawg. Cov uas pe hawm tus tsiaj, thiab nws tus dab mlom, thiab cov uas ntaus lub cim uas yog nws lub npe, yuav tsis tau so nruab hnub hmo ntuj kiag li. 12 No yog qhov uas cov neeg dawb huv yuav tsum ua siab ntev thev, yog cov uas tuav Abba (יחוח)Yahweh tej lus nkaw thiab txojkev ntseeg (יהושע)Yahshua. 13 Thiab kuv hnov ib lub suab hais saum ntuj tuaj hais tias, cia li sau li no tias, txij no mus, cov uas tuag rau hauv (יהושע)Yahshua Messiah, kuj nyob kaj siab lug. Thiab Tus Ntsuj Plig Dawbhuv hais tias, muaj tseeb li ntawd. Lawv yuav tau so tej haujlwm uas lawv ua khwv khwv, vim tej haujlwm uas lawv tau ua ntawd yuav nrog lawv mus.

​

Sau Tej Uas Nyob Hauv Ntiajteb

14 Kuv saib mas pom ib tauv huab dawb thiab muaj ib tug zaum saum tauv huab ntawd zoo li Neeg leej Tub, nws ntoo lub mom kub rau saum taubhau thiab tuav rawv ib rab liag ntse ntse hauv nws txhais tes. 15 Muaj dua ib tug tubtxib saum ntuj tawm hauv lub tuam tsev los hu nrov nrov rau tus uas zaum saum tauv huab hais tias, cia li muab koj rab liag hlais lauj, vim twb txog caij hlais lawm, rau qhov tej qoob uas yuav hlais hauv ntiajteb twb siav tag lawm. 16 Tus uas zaum saum tauv huab txawm cev nws rab liag los rau hauv lub ntiajteb, mas thiaj hlais tej qoob hauv ntiajteb. 17 Muaj dua ib tug tubtxib saum ntuj tawm hauv lub tuam tsev saum ntuj los, nws kuj tuav rawv ib rab liag ntse ntse. 18 Thiab muaj dua ib tug tubtxib saum ntuj muaj hwjchim kav hluavtaws tawm hauv lub thaj xyeem los, hu nrov nrov rau tus uas tuav rawv rab liag ntse hais tias, cia li cev koj rab liag hlais tej tauv txiv hmab ntawm cov txiv hmab hauv ntiajteb, vim tej txiv hmab siav lawm. 19 Tus tubtxib saum ntuj txawm cev nws rab liag los rau hauv lub ntiajteb hlais tej txiv hmab hauv ntiajteb sau los ua ke thiab muab nchuav rau hauv lub rhawv tsuam txiv hmab loj uas yog Abba (יחוח)Yahweh txojkev npau taws 20 muab tsuam rau hauv lub rhawv tsuam txiv hmab nraum ntug moos, thiab ntshav ntws hauv lub rhawv ntawd los, siab txij nees nplooj pus, thiab ntws mus deb li peb puas kilumeb.