Riyyah Mus Xawb Qeb Hauv Npau‑as Daim Teb

1 Naomi muaj ib tug kwvtij muaj nyiaj yog Elimelej cum ntag, npe hu ua Npau‑ as.

2 Mas Riyyah uas yog tibneeg Mau‑as hais rau Naomi tias, cia kuv mus teb mus xawb tej qeb raws qab tus uas zoo siab cia kuv xawb. Naomi hais rau nws tias, me nyab es, cia li mus.

3 Riyyah txawm tawm mus xawb raws qab cov uas hlais. Nws mus tau rau hauv Npau‑as daim teb, yog tus uas nrog Elimelej koom ib cum.

4 Mas Npau‑as tuaj hauv Npele-hees tuaj txog, nws hais rau cov uas hlais qeb tias, thov (יחוח)Yahweh nrog nraim nej nyob. Lawv teb tias, thov (יחוח)Yahweh foom koob hmoov rau koj.

5 Npau‑as txawm nug tus tub zog uas coj zog hlais qeb ntawd tias, tus pojniam ntawd yog leejtwg tus?

6 Tus tub zog uas coj zog hlais qeb teb tias, yog tus pojniam Mau‑as uas nrog Naomi tawm hauv Mau‑as tebchaws rov los.

7 Tus pojniam ntawd thov hais tias, cia kuv xawb thiab khaws raws qab cov uas hlais tej teg qeb.  Nws thiaj tuaj xawb tagkis no los lawm, tsuas yog so ib pliag hauv tsev teb xwb.

8 Ces Npau‑as txawm hais rau Riyyah tias, nyab es, cia li mloog kuv hais, tsis txhob mus xawb lwm tus li teb es tso daim no tseg.  Cia li raws qab ti ti kuv tej nkauj qhe.

9 Cia li saib ntsoov daim teb uas lawv hlais thiab raws lawv qab.  Kuv twb hais rau cov tub hluas kom tsis txhob zes koj. Thaum koj nqhis dej kuj cia li mus haus dej hauv lub taub uas cov hluas ntim cia lawd.

10 Nws thiaj khwb nkaus hauv av pe Npau‑as thiab hais tias, kuv tsuas yog ib tug tibneeg lwm tebchaws xwb, ua li cas koj yuav hlub kuv thiab saib kuv zoo?

11 Npau‑as teb nws tias, muaj tibneeg piav rau kuv paub txog txhua yam uas koj tu koj niam pog txij thaum koj tus txiv tuag lawm, thiab paub txog qhov uas koj tso koj niam koj txiv thiab lub tebchaws uas yug koj tseg es los nrog haiv neeg uas koj tsis tau paub dua nyob.

12 Thov (יחוח)Yahweh pauj tej uas koj ua zoo rov rau koj thiab thov (יחוח)Yahweh uas yog cov Ixayees Tus Tswv uas koj los cawm siav rau hauv nws phab tis, pub koob hmoov nplua mias rau koj.

13 Riyyah thiaj teb tias, yawg hlob, thov koj hlub kuv mus li, rau qhov txawm yog kuv tsis yog koj tus nkauj qhe los koj twb nplij tau kuv lub siab thiab hais tej lus zoo rau kuv.

14 Txog sijhawm noj mov, Npau‑as kuj hais rau nws tias, los nrog peb noj thiab muab ncuav ntsw tej kua qaub noj. Nws thiaj nrog cov uas hlais qeb zaum. Npau‑as cev tej qeb kib rau nws, nws noj tsau tseem tshuav seem.  

15 Thaum Riyyah sawv tsees mus xawb qeb, Npau‑as hais rau cov tub hluas tias, cia nws xawb raws tej teg qeb, tsis txhob cem nws.  

16 Thiab rho tej rev qeb tso rau nws khaws thiab, tsis txhob cem nws.

17 Riyyah thiaj xawb qeb mus txog tsaus ntuj. Nws muab tej uas xawb ntawd ntaus tau kwvlam ib efas qeb.  

18 Nws ris cov qeb ntawd rov mus rau hauv lub moos, nws muab tej qeb uas nws xawb los ntawd rau nws niam pog saib thiab muab tej zaub mov uas nws noj tsis tag rau niam pog noj.

19 Niam pog thiaj hais rau nws tias, hnub no koj mus xawb qeb qhov twg? Koj ua hauj lwm qhov twg? Thov cia tus uas hlub koj tau koob hmoov. Riyyah thiaj hais rau niam pog paub tias, nws mus ua haujlwm hauv leejtwg daim teb thiab hais tias, tus yawg uas hnub no kuv mus ua haujlwm ntawd npe hu ua Npau‑as.  

20 Naomi hais rau tus nyab tias, thov (יחוח)Yahweh foom koob hmoov rau tus yawg ntawd. (יחוח)Yahweh txojkev hlub muaj tsis tu rau tus uas tseem muaj txojsia nyob thiab tus uas tuag lawd. Naomi hais rau Riyyah tias, tus yawg ntawd yog peb cov kwvtij, yog ib tug txheeb ze peb. 

21 Riyyah uas yog tibneeg Mau‑as hais tias, thiab nws tseem hais rau kuv

tias, koj raws qab xawb ti ti kuv cov qhev mus txog thaum lawv hlais kuv cov qeb tag.   

22 Naomi hais rau Riyyah uas yog nws tus nyab tias, nyab, qhov uas koj nrog nws tej nkauj qhe ua haujlwm zoo lawm, ntshai tsam koj mus rau hauv lwm tus li teb ces raug luag zes.

23 Vim li ntawd Riyyah thiaj raws ti ti Npau‑as cov nkauj qhe qab xawb qeb thiab mog mus txog thaum hlais qeb thiab hlais mog tag, thiab nrog nws niam pog nyob.