Riyyah Thiab Npau‑as Ntawm Lub Tshav Ntaus Qeb

1 Naomi  uas yog Riyyah niam pog hais rau nws tias, nyab, puas tsim nyog kuv nrhiav cuab nrhiav yig rau koj kom koj thiaj nyob kaj siab lug?

2 Npau‑as uas koj mus nrog nws cov nkauj qhe ua ke ntawd, yog peb cov kwvtij txheeb.  Hmo no nws tabtom ntxuaj qeb hauv lub tshav ntaus qeb.

3 Koj cia li da dej pleev roj tsw qab thiab hnav cev tsoos uas zoo heev mus rau nram lub tshav ntaus qeb kom tsis txhob cia nws pom koj mus txog thaum nws noj mov haus dej tag tso.

4 Thaum nws mus pw, ua tib zoo saib nws pw qhovtwg, mam li mus tshem daim pam ntawm nws kotaw thiab pw rau qhov ntawd. Ces nws yuav qhia rau koj tias koj yuav tau ua abtsi.

5 Riyyah teb tias, kuv yuav ua txhua yam uas koj hais.

6 Riyyah thiaj mus nram lub tshav ntaus qeb thiab ua raws li nws niam pog hais txhua yam.

7 Thaum Npau‑as noj haus tsau zoo siab lawd, nws txawm mus pw ntawm pawg qeb ib sab. Ces Riyyah txawm nkag mus tshem daim pam ntawm nws kotaw thiab pw qhov ntawd.

8 Thaum ib tag hmo, Npau-as tsim dheev los tig cev ua ciav muaj ib tug pojniam pw ntawm nws kotaw.

9 Nws thiaj nug tias, koj yog leejtwg? Tus pojniam teb tias, kuv yog koj tus nkauj qhe Riyyah os. Thov koj yaws koj lub qab tsho ntev vov koj tus nkauj qhe, rau qhov koj yog ib tug kwvtij txheeb.

10 Npau‑as thiaj hais tias, me ntxhais es, thov (יחוח)Yahweh foom koob hmoov rau koj lauj. Koj txojkev hlub zaum no loj dua zaum ua ntej, rau qhov koj tsis mus nrhiav tej tub hluas, tsis hais muaj los pluag.

11 Me ntxhais es, nimno tsis txhob ntshai, kuv yuav ua txhua yam raws li koj thov. Cov tibneeg hauv peb lub moos sawvdaws yeej paub tias koj yog ib tug pojniam uas zoo tsim txiaj.

12 Thiab kuv los yeej yog kwvtij txheeb tiag, tiamsis tseem muaj dua ib tug kwvtij uas txheeb dua kuv.

13 Hmo no koj cia li pw ntawm no. Tagkis kaj ntug yog tus ntawd lees ua kwvtij txheeb saws koj, kuj zoo, cia nws saws. Yog nws tsis yeem ua kwvtij txheeb saws koj, muaj (יחוח)Yahweh uas muaj txoj sia nyob pom, kuv yuav lees ua kwvtij txheeb saws koj. Cia li pw ntawm no mus txog kaj ntug. 

14 Riyyah thiaj pw ntawm nws kotaw mus txog kaj ntug, tiamsis nws sawv ntxov tsees thaum tsis tau pom kev zeem tau ntsej muag. Npau‑as hais tias, tsis txhob kheev leejtwg paub tias ib tug pojniam tuaj ntawm lub tshav ntaus qeb no.

15 Nws hais rau Riyyah tias, cia li muab koj daim ntaub kauv nthuav los. Riyyah thiaj nthuav los, mas Npau‑as luj tau rau xe‑as qeb muab rau nws ris mus, nws txawm rov mus rau hauv lub moos lawm.

16 Thaum Riyyah los txog, nws niam pog nug tias, me nyab, zoo li cas xwb? Riyyah txawm piav txhua yam uas Npau-as ua rau nws rau leej niam mloog,

17 hais tias, nws pub rau xe‑as qeb no rau kuv, nws hais tias, tsis txhob rov qab mus tes dawb tes do rau ntawm koj niam pog.

18 Naomi teb tias, me nyab, nyob twjywm tos mus txog thaum paub tias tej no zoo li cas, rau qhov tus yawg ntawd yuav tsis so, nws yuav hais tej no kom tiav rau hnub no.