Npau‑as Yuav Riyyah

1 Npau‑as mus zaum ntawm rooj loog. Mas tus kwvtij txheeb uas Npau‑as hais txog kuj taug kev tuaj. Npau‑as txawm hais tias, kwvtij, los zaum ntawm no. Ces tus yawg ntawd txawm los zaum.

2 Npau‑as thiaj mus hu cov kev txwj laug hauv lub moos ntawd kaum leej tuaj thiab hais tias, nej cia li zaum ntawm no. Lawv txawm zaum.

3 Nws txawm hais rau tus kwvtij uas txheeb ntawd tias, daim teb uas yog peb tus kwvtij Elimelej li mas Naomi uas rov hauv Mau‑as tebchaws los yuav muab muag.  

4 Kuv xav tias kuv yuav hais rau koj paub thiab thov kom koj yuav cia tab meeg cov tibneeg uas zaum ntawm no thiab tab meeg peb cov kev txwj laug. Yog koj yuav txhiv kuj cia li txhiv. Yog koj tsis txhiv kuj hais meej rau kuv paub, rau qhov dhau koj lawm, tsis muaj leejtwg yuav muaj feem txhiv tau, tsuas yog kuv thiaj muaj feem ua koj qab xwb. Tus yawg ntawd hais tias, kuv yuav txhiv.

5 Ces Npau‑as txawm hais tias, hnub uas koj yuav daim teb ntawm Naomi, koj kuj tau Riyyah uas yog tibneeg Mau‑as uas ua poj ntsuam thiab, kom thiaj tuav tau tus uas tuag lawd lub npe cia rau hauv daim teb uas yog nws qub txeeg qub teg.

6 Tus kwvtij txheeb ntawd teb tias, kuv txhiv li ntawd tsis tau, yuav ua rau kuv qub txeeg qub teg poob mus. Koj cia li sawv kuv chaw mus txhiv, rau qhov kuv txhiv tsis tau.

7 No yog tej kevcai uas thaum ub cov Ixayees coj ntsig txog kev txhiv thiab kev pauv, thiaj ua tau timkhawv tias ob tog hais sib haum, tus uas tsis txhiv yuav hle khau cev rau tus uas txhiv. No yog kevcai ua timkhawv rau hauv cov Ixayees.

8 Yog li no, thaum tus kwvtij txheeb hais rau Npau‑as tias, koj cia li yuav koj, nws thiaj hle nws ib sab khau.

9 Ces Npau‑as txawm hais rau cov kev txwj laug thiab cov pejxeem sawvdaws tias, hnub no nej ua timkhawv pom tias kuv tau yuav Elimelej tej cuab txhiaj cuab tam thiab Khili‑oos thiab Maloos tej cuab txhiaj cuab tam huvsi ntawm Naomi txhais tes lawm.

10 Thiab kuv yuav Maloos tus pojniam Riyyah uas ua poj ntsuam thiab yog tibneeg Mau‑as los ua kuv pojniam kom thiaj tuav tau tus uas tuag lub npe cia rau hauv daim teb uas yog nws qub txeeg qub teg mus li, xwv tus uas tuag lub npe thiaj tsis raug muab txiav tu hauv nws cov kwvtij thiab tu hauv lub rooj loog uas yog nws lub moos. Hnub no nej ua tim khawv.

11 Ces cov pejxeem sawvdaws uas nyob ntawm rooj loog thiab cov kev txwj laug txawm hais tias, peb ua tau timkhawv. Thov (יחוח)Yahweh ua rau tus pojniam uas tabtom los rau hauv koj lub tsev zoo yam nkaus li Lachees thiab Le‑as, uas tsim haiv neeg Ixayees. Thov kom koj vam meej rau hauv Efathas thiab muaj koob meej rau hauv Npelehees.

12 Thov kom cov me nyuam uas (יחוח)Yahweh yuav pub rau tus pojniam hluas no ua koj li caj ces zoo yam nkaus li Peles caj ces uas Thamas yug rau Yahdah.

13 Yog li no Npau‑as thiaj li yuav Riyyah ua pojniam. Nws mus nrog Riyyah pw thiab (יחוח)Yahweh pub Riyyah xeeb tub yug tau ib tug tub.

14 Tej pojniam hais rau Naomi tias, qhuas (יחוח)Yahweh uas hnub no tsis tso koj tseg cia ua tus uas tsis muaj kwvtij txheeb. Thov cia tus metub no muaj koob meej nrov nto moo lug rau hauv cov Ixayees.

15 Tus metub no yuav tsav koj txojsia thiab yug koj rau thaum koj laus.  Rau qhov tus metub no yog tus nyab uas hlub koj yug, yog tus nyab uas tsim txiaj dua xya leej tub.

16 Ces Naomi txawm muab tus metub ntawd puag rau hauv nws lub xubntiag thiab tu tus metub ntawd.

17 Tej poj niam uas nyob ze ib ncig hais tias, yug tau ib tug tub rau Naomi lawm. Lawv tis npe rau tus metub ntawd hu ua Aunpes. Aunpes yog Yisais txiv, Yisais yog Daviv txiv.

18 Ntawm no mus yog Peles caj ces. Peles yog Hexaloos txiv,

19 Hexaloos yog Las txiv, Las yog Aminadas txiv,

20 Aminadas yog Nasoos txiv, Nasoos yog Xamoos txiv,

21 Xamoos yog Npau‑as txiv, Npau‑as yog Aunpes txiv,

22 Aunpes yog Yisais txiv, Yisais yog Daviv txiv.