1 XAMUYEES 1

Yug Xamuyees

1 Muaj ib tug yawg nyob hauv lub moos Lamathas Xaufis pem toj siab Efa‑is teb chaws, nws yog Xub cum. Nws npe hu ua Eekhanas, nws txiv yog Yelauhas, nws yawg yog Elihus, nws yawg koob yog Thauhus, thiab nws yawg suab yog Xub, yog xeem Efa‑is.

2 Eekhanas muaj ob tug pojniam. Ib tug hu ua Hanas, ib tug hu ua Peninas. Peninas muaj menyuam hos Hanas tsis muaj.

3 Mas Eekhanas pheej niaj xyoo tawm ntawm nws lub moos mus pe hawm thiab xyeem tsiaj rau (יחוח)Yahweh uas muaj hwj chim loj kawg nkaus hauv lub moos Silaus. Elis ob tug tub uas yog Haunis thiab Finehas ua pov thawj ua (יחוח)Yahweh tej hauj lwm qhov ntawd.  

4 Hnub uas Eekhanas tua tsiaj xyeem rau

(יחוח)Yahweh, nws kuj faib nqaij rau nws tus pojniam Peninas thiab faib rau nws tej tub tej ntxhais huvsi.  

5 Thiab nws faib ob npaug rau Hanas, vim nws hlub Hanas tiamsis (יחוח)Yahweh kaw Hanas lub plab tsis pub muaj menyuam.

6 Peninas uas nrog Hanas sib txeeb txiv, pheej zes Hanas ua rau nws chim, vim (יחוח)Yahweh kaw Hanas lub plab tsis pub muaj menyuam. 

7 Pheej niaj xyoo muaj los li ntawd. Txhua zaus uas mus rau pem (יחוח)Yahweh lub tsev, Peninas kuj zes Hanas.  Vim li no, Hanas thiaj li quaj tsis kam noj mov. 8 Mas Eekhanas uas yog nws tus txiv thiaj nug nws tias, Hanas, ua cas koj quaj? Ua cas koj tsis noj mov? Ua cas koj yuav nyuaj siab? Kuv tsis zoo dua li kaum leej tub rau koj lov.

​

Hanas Thiab Elis 

9 Thaum noj haus hauv lub moos Silaus tag lawd, Hanas txawm sawv tsees. Tus pov thawj Elis zaum saum lub rooj uas nyob ntawm lub qhov rooj hauv (יחוח)Yahweh lub tsev ib sab.

10 Hanas nyuaj siab kawg li, nws thov (יחוח)Yahweh thiab quaj heev.

11 Nws tau yeem lus hais tias, Au (יחוח)Yahweh uas muaj hwj chim loj kawg nkaus, yog koj tsa qhov muag saib txog kuv uas yog koj tus nkauj qhe txoj kev txom nyem nyuaj siab, thiab nco ntsoov txog kuv thiab tsis txhob hnov qab kuv uas yog koj tus nkauj qhe es pub ib tug tub rau kuv, mas kuv yuav pub nws rov rau (יחוח)Yahweh tag nws sim neej thiab tsis kheev rab chais nphav nws taubhau kiag li.

12 Thaum nws tseem tab tom thov (יחוח)Yahweh ntawd, Elis saib ntsoov nws lub qhov ncauj.

13 Tiamsis Hanas hais hauv lub siab tsuas yog nws qhov ncauj ua nkawv nkim xwb, tsis hnov nws lub suab.  Vim li no, Elis thiaj xav tias yog nws qaug cawv.

14 Elis thiaj hais rau nws tias, koj yuav qaug mus ntev li cas? Cia li muab cawv tso tseg los maj.

15 Tiamsis Hanas teb tias, yawg hlob, tsis yog li ntawd, kuv yog ib tug pojniam uas lwj siab kawg li. Kuv tsis tau haus cawv txiv hmab thiab cawv ntxwg kiag li, tiamsis kuv qhib kiag kuv lub siab qhia rau (יחוח)Yahweh.

16 Tsis txhob xav hais tias kuv uas yog koj tus nkauj qhe yog ib tug pojniam tsis tsim txiaj.  Qhov uas kuv hais li ntawd twb yog vim kuv muaj kev nyuaj siab thiab kev lwj siab kawg.

17 Ces Elis teb tias, koj cia li mus zoo kaj siab lug. Thov Ixayees Tus Tswv ua raws li tej lus uas koj thov ntawd.

18 Mas Hanas hais rau nws tias, thov koj hlub kuv uas yog koj tus nkauj qhe. Ces Hanas txawm tawm mus noj mov thiab nws lub ntsej muag tsis mluas lawm.

19 Lawv sawv ntxov pe hawm (יחוח)Yahweh tag ces lawv txawm rov mus tsev rau hauv lub moos Lamas lawm. Eekhanas nrog nws tus pojniam Hanas pw thiab (יחוח)Yahweh nco txog Hanas.

20 Mas thaum txog lub caij lawm Hanas txawm xeeb tub thiab yug tau ib tug tub, thiab tis npe hu ua Xamuyees rau qhov nws hais tias, yog kuv thov tau ntawm (יחוח)Yahweh.

21 Eekhanas thiab nws tsev neeg sawvdaws mus xyeem tsiaj raws li niaj xyoo rau (יחוח)Yahweh thiab pauj tej uas nws fiv cia lawm.

22 Tiamsis Hanas tsis mus, rau qhov nws hais rau nws tus txiv tias, thaum tus me tub tseg mis lawd, kuv yuav coj nws mus kom nws thiaj mus nyob rau ntawm (יחוח)Yahweh xubntiag thiab nyob qhov ntawd mus li.

23 Eekhanas uas yog nws tus txiv hais rau nws tias, cia li ua raws li koj pom zoo, es tos txog thaum uas muab tus me tub cais mis tso.  Tsuav yog thov (יחוח)Yahweh ua kom nws tej lus tiav xwb.  Hanas thiaj nyob tsev tu nws tus tub mus txog thaum nws muab tus tub cais mis.

24 Thaum nws muab tus tub cais mis lawd, nws txawm coj tus tub thiab ib tug txiv nyuj hnub nyoog peb xyoos thiab ib efas hmoov mog thiab ib hnab tawv cawv txiv hmab mus rau ntawm (יחוח)Yahweh lub tsev hauv lub moos Silaus. Tus me tub tseem yau thiab.

25 Lawv tua tus txiv nyuj ntawd thiab coj tus me tub mus cuag Elis.

26 Mas Hanas hais rau Elis tias, yawg hlob, koj muaj txojsia nyob pom, kuv yog tus pojniam uas sawv ntsug thov (יחוח)Yahweh ntawm no tab meeg koj.

27 Kuv thov kom tau tus menyuam no, mas (יחוח)Yahweh pub raws li kuv tej lus thov rau kuv.

28 Vim li no kuv thiaj muab nws pub rau (יחוח)Yahweh, muab nws pub kiag rau (יחוח)Yahweh kom tag nws sim neej. Ces Eekhanas txawm pe hawm (יחוח)Yahweh qhov ntawd.