Hanas Txoj Nkauj

1 Ces Hanas txawm thov (יחוח)Yahweh hais tias, kuv lub siab xyiv fab rau hauv (יחוח)Yahweh, kuv tus kub kuj raug muab tsa rau lub chaw siab hauv (יחוח)Yahweh. Kuv lub qhov ncauj khav tau rau kuv cov yeeb ncuab, rau qhov kuv zoo siab rau koj txoj kev cawm dim.

2 Tsis muaj leej twg dawb huv li (יחוח)Yahweh, tsis muaj leej twg zoo cuag li koj, tsis muaj ib txhib zeb twg zoo cuag li peb Leej Txiv (יחוח)Yahweh.

3 Tsis txhob hais lus khav theeb dua li lawm, tsis txhob cia tej lus muab hlob tawm hauv lub qhov ncauj, rau qhov (יחוח)Yahweh yog Tus Tswv uas paub txhua yam, thiab muab txhua yam hauj lwm luj tshuaj saib.

4 Cov uas muaj zog rab hneev raug muab lov lawm, cov uas tsaug leeg, kuj tau lub zog los hnav lawm.

5 Cov uas ib txwm muaj noj tsau npo, kuj tawm mus ua zog nrhiav noj, cov uas tshaib plab, kuj tsis tshaib lawm. Tus uas ib txwm xeeb tsis taus me nyuam, kuj yug tau xya tus menyuam lawm, tiamsis tus uas muaj menyuam coob nimno nyob qhuav quas lawm.

6 (יחוח)Yahweh muab tua thiab pub txojsia, nws coj nqis mus rau hauv tub tuag teb thiab tsa kom sawv rov los.

7 (יחוח)Yahweh ua kom pluag thiab ua kom muaj, nws muab txo kom qis thiab muab tsa kom sawv siab.

8 Nws tsa cov uas pluag sawv hauv hmoov av los, nws muab cov uas raug txom nyem tsa sawv hauv qhov tshauv los, coj lawv los nrog cov thawj zaum ua ke, thiab tau lub rooj siab uas muaj koob meej ua lawv tug.  Cov ncej uas txheem lub ntiajteb no yog (יחוח)Yahweh li, nws muab lub ntiajteb txawb rau saum cov ncej ntawd.

9 Nws yuav tsom kwm cov uas npuab nws txhais kotaw, tiamsis cov tibneeg lim hiam, yuav nyob ntsiag to rau hauv qhov tsaus ntuj, rau qhov tibneeg siv nws lub zog xwb yuav kov tsis yeej.

10 (יחוח)Yahweh cov yeeb ncuab yuav raug muab tsoo tawg ua tej dwb daim, nws yuav ua xob nthe saum ntuj tawm tsam lawv. (יחוח)Yahweh yuav txiav txim thoob plaws hauv lub qab ntuj no, nws yuav pub zog rau nws tus vajntxwv, thiab yuav tsa tus uas nws hliv roj tsa cia lawm tus kub nyob siab dua huvsi.

11 Ces Eekhanas txawm rov qab mus tsev rau hauv lub moos Lamas lawm. Ces tus me tub ntawd ua koom tu (יחוח)Yahweh ntawm tus pov thawj Elis lub xubntiag.

​

Elis Ob Tug Tub Ua Txhaum 

12 Elis ob tug tub yog tibneeg tsis tsheej haj tsis hwm (יחוח)Yahweh kiag li,

13 thiab tsis quav ntsej tej kevcai uas cov pov thawj coj rau tej pejxeem. Thaum leej twg coj tsiaj tuaj xyeem, mas thaum tab tom hau nqaij, tus pov thawj tus tub qhe yuav los tuav rawv rab hmuv uas muaj peb ceg.

14 Nws yuav muab rab hmuv nkaug rau hauv lub yias lossis lub hwj lossis lub lauj kaub loj lub lauj kaub me. Txhua yam uas rab hmuv chob tau ntawd, tus pov thawj yuav muab ua nws tug coj los noj. Elis ob tug tub ua li no rau txhua tus Ixayees uas tuaj rau hauv lub moos Silaus.  

15 Tsis tag li ntawd xwb, ua ntej uas lawv tsis tau hlawv cov hlab hluas roj, tus pov thawj tus tub qhe pheej los hais rau tus uas muab xyeem ntawd tias, thov nqaij mus rau tus pov thawj kib. Nws tsis yuav tej nqaij uas koj hau, nws yuav nqaij nyoos xwb.

16 Yog tus uas xyeem teb tias, thov cia lawv hlawv cov hlab hluas roj tso koj mam coj npaum li koj lub siab nyiam mus, tus tub qhe yuav hais tias, tsis tau li, yuav tau muab nimno xwb. Yog koj tsis muab los kuv yuav muab kuv mus.

17 Vim li no, (יחוח)Yahweh thiaj pom tias ob tug tub hluas no lub txim loj kawg li, rau qhov nkawv saib tsis taus tej uas muab xyeem rau (יחוח)Yahweh.

18 Xamuyees tu ntawm (יחוח)Yahweh xub ntiag, nws yog ib tug me tub uas hnav ib lub tsho efauj ntaub mag.

19 Nws niam niaj xyoo xaws ib lub tsho me coj mus rau nws rau thaum nws nrog tus txiv mus xyeem tsiaj rau (יחוח)Yahweh.

20 Mas Elis pheej foom koob hmoov rau Eekhanas thiab nws tus pojniam tias, thov (יחוח)Yahweh pub tus pojniam no yug menyuam rau koj pauj tus uas nws thov es muab pub rau (יחוח)Yahweh lawm. Ces nkawv li rov mus tsev.

21 (יחוח)Yahweh los pab Hanas, mas nws thiaj li xeeb menyuam yug tau peb tug tub thiab ob tug ntxhais. Tus me tub Xamuyees kuj hlob zoo rau ntawm

(יחוח)Yahweh lub xubntiag.

22 Elis laus heev lawm thiab nws kuj hnov txog txhua yam uas nws ob tug tub ua rau cov Ixayees, thiab hnov txog qhov uas nkawv deev cov pojniam uas ua hauj lwm ntawm lub rooj vag uas nkag mus rau hauv lub tsev ntaub sib ntsib.

23 Mas nws hais rau nkawv tias, ua cas neb yuav ua li no? Kuv tau hnov cov pej xeem piav tej kev phem uas neb ua.

24 Tub es, tsis txhob ua. Tej xov uas kuv hnov (יחוח)Yahweh cov tibneeg piav ncha lug ntawd mas tsis zoo kiag li.

25 Yog tibneeg ua txhaum rau tibneeg, (יחוח)Yahweh nyob nruab nrab tu.  Tiamsis yog tibneeg ua txhaum rau (יחוח)Yahweh, leej twg yuav thov tau? Tiamsis nkawv tsis kam mloog leej txiv hais, rau qhov tias (יחוח)Yahweh twb npaj siab muab nkawv tua pov tseg lawm.

26 Tus me tub Xamuyees kuj hlob zuj zus, (יחוח)Yahweh thiab tibneeg kuj txaus siab rau nws zuj zus.  

​

Elis Tsev Neeg Yuav Puam Tsuaj 

27 Thaum ntawd muaj (יחוח)Yahweh cov ib tug tibneeg tuaj hais rau Elis tias, (יחוח)Yahweh hais li no tias, kuv twb qhia kuv rau koj yawg koob Aloos tsev neeg rau thaum lawv nyob hauv Iziv tebchaws uas lawv nyob hauv Falaus kev tswj hwm lawm.

28 Kuv xaiv nws tawm hauv txhua xeem Ixayees los ua kuv li pov thawj mus ua hauj lwm ntawm kuv lub thaj, thiab hlawv hmoov tshuaj tsw qab thiab hnav lub tsho efauj rau ntawm kuv xubntiag. Kuv tau muab tej uas cov Ixayees muab hlawv xyeem rau kuv huvsi ua koj yawg koob caj ces li feem.

29 Ua cas koj yuav saib tsis taus tej uas muab xyeem rau kuv thiab, tej uas kuv hais kom muab pub rau kuv? Koj muab koj ob tug tub saib hlob dua kuv es muab txhua yam zoo kawg uas kuv haiv neeg Ixayees muab xyeem rau kuv txav kom nej rog.

30 Vim li no, (יחוח)Yahweh uas yog cov Ixayees Tus Tswv thiaj hais tias, kuv twb cog lus tias, koj tsev neeg thiab koj yawg koob caj ces yuav ua koom tu kuv mus ib txhis.  Tiamsis nimno (יחוח)Yahweh tshaj tawm tias, tej uas kuv hais ntawd, muab rhuav pov tseg lawm. Rau qhov cov uas muab kuv saib hlob kuv yuav muab lawv saib hlob, cov uas saib tsis taus kuv, kuv yuav saib tsis taus lawv.

31 Saib maj, lub sijhawm uas kuv yuav txiav koj lub zog thiab koj yawg koob caj ces lub zog pov tseg los yuav txog, xwv thiaj tsis muaj ib tug laus nyob hauv koj lub cuab.  

32 Koj yuav raug kev txom nyem nyuaj siab, saib liab muag khiav, khib tej kev vam meej uas cov Ixayees tau lawd, thiab koj cuab tibneeg yuav tsis muaj ib tug nyob laus mus ib txhiab ib txhis li.

33 Koj cov tibneeg uas kuv tseg txojsia nyob tsis muab txiav kom tu ntawm kuv lub thaj los yuav ua rau koj quaj, ua qhov muag tho ntshuv thiab ua rau koj lub siab ntxhov nyho. Koj caj ces yav tom qab sawvdaws yuav tuag rau thaum tseem hluas muaj zog npho.

34 Tej uas yuav raug Haunis thiab Finehas uas yog koj ob tug tub, yog qhov uas nkawv yuav tuag rau ib hnub, mas tej no yuav qhia koj paub tias tej uas hais yog muaj tseeb.

35 Kuv yuav tsa ib tug pov thawj uas lub siab xib rau kuv, uas yuav ua raws li tej uas kuv xav hauv kuv lub siab. Kuv yuav pub nws muaj ib ceg tibneeg ruaj khov, thiab nws yuav ua haujlwm rau ntawm tus uas kuv hliv roj tsa cia lawd lub xub ntiag mus ib txhis.

36 Thiab koj caj ces uas tseem tshuav nyob yuav thov tus ntawd ib lub npib nyiaj lossis ib lub ncuav noj, thiab yuav hais tias, thov koj tsa kuv ua tej hauj lwm pov thawj kuv thiaj tau noj tej zaub mov me ntsis thiab.