Riyyah Thiab Naomi

1 Thaum cov thawj tseem kav Ixayees tebchaws mas muaj kev tshaib nqhis hauv lub tebchaws ib zaug.

Muaj ib tug yawg nyob hauv lub moos Npelehees hauv Yahdah tebchaws txawm coj pojniam thiab ob tug tub tsiv mus nyob ib ntus rau hauv Mau‑as teb chaws.

2 Tus yawg ntawd npe hu ua Elimelej, nws pojniam hu ua Naomi, ob tug tub ib tug hu ua Maloos, ib tug hu ua Khili‑oos. Lawv yog tibneeg Efathas nyob hauv lub moos Npelehees hauv Yahdah tebchaws. Lawv tsiv mus nyob hauv Mau‑as tebchaws.  

3 Ces Naomi tus txiv Elimelej txawm tuag lawm, tseg nws thiab nws ob tug tub. 4 Ob tug tub ntawd kuj yuav tau Mau‑as cov ntxhais los ua pojniam.  Ib tug npe hu ua Aupas, ib tug hu ua Riyyah. Lawv nyob qhov ntawd tau kaum xyoo.

5 Ces Maloos thiab Khili‑oos nkawv txawm tuag lawm, ces Naomi thiaj nyob ua ntsoj ua ntsuag tsis muaj txiv tsis muaj tub.

6 Mas Naomi thiab ob tug nyab npaj yuav sawv kev tawm hauv Mau‑as tebchaws rov qab, vim yog thaum tseem nyob hauv Mau‑as tebchaws nws hnov xov tias, (יחוח)Yahweh los pab nws haiv neeg thiab pub lawv muaj mov noj lawm.

7 Nws thiaj tawm hauv lub chaw nyob nrog ob tug nyab mus, lawv taug kev rov qab mus rau Yahdah tebchaws.

8 Naomi txawm hais rau nws ob tug nyab tias, cia neb ob leeg nyias rov mus nrog nyias niam nyob. Thov (יחוח)Yahweh hlub neb ib yam li neb tau hlub cov uas tuag lawd thiab hlub kuv.

9 Thov (יחוח)Yahweh pub kom neb tau nyob kaj siab lug nyias tau nyob hauv nyias tus txiv lub tsev. Ces Naomi txawm nwj ob tug nyab, lawv nyias taus nyias quaj.

10 Nkawv hais rau Naomi tias, tsis txhob ua li ntawd, wb yuav nrog koj mus rau koj haiv neeg.

11 Tiamsis Naomi hais tias, ob tug nyab, cia li rov qab mus, neb yuav nrog kuv mus ua abtsi? Kuv lub plab tseem yuav muaj tub rau neb yuav ua txiv thiab lov?

12 Ob tug nyab es, rov qab mus tsev mog.  Kuv laus heev lawm, kuv tsis yuav txiv ntxiv lawm. Yog kuv xav tias, kuv tseem muaj vam es txawm yog yuav txiv hmo no thiab muaj tub,

13 los neb yuav tos mus txog thaum tej tub ntawd hlob thiab lov? Neb yuav tswj tau neb lub siab tsis yuav txiv lov? Tsis txhob ua li, ob tug me nyab, kuv raug kev lwj siab heev dua neb, vim yog (יחוח)Yahweh txhais tes tawm tsam kuv.

14 Ces lawv nyias taus nyias rov quaj. Ces Aupas txawm nwj leej niam thiab rov qab mus lawm, tiamsis Riyyah tseem dai lias leej niam.

15 Naomi hais rau Riyyah tias, saib maj, koj tus niam laus twb rov qab mus rau nws haiv neeg thiab nws tej dab lawm. Koj cia li raws koj tus niam laus rov qab mus mog.

16 Tiamsis Riyyah hais tias, tsis txhob hais kom kuv tso koj tseg ncaim koj rov qab mus. Koj mus qhovtwg los kuv yuav mus thiab, koj nyob qhovtwg los kuv yuav nyob qhov ntawd thiab, koj haiv neeg los yog kuv haiv neeg thiab, koj Tus Tswv los yog kuv Tus Tswv thiab.

17 Koj tuag qhov twg, kuv yuav tuag qhov ntawd thiab, muab koj faus qhov twg, yuav muab kuv faus rau qhov ntawd thiab. Yog txojkev tuag ua rau kuv ncaim koj los thov (יחוח)Yahweh rau txim rau kuv thiab rau kom nyhav dua.

18 Thaum Naomi pom tias Riyyah muaj siab nrog nws mus tiag tiag li, nws txawm tsis hais abtsi lawm.

19 Nkawv thiaj li ua ke mus txog lub moos Npelehees. Thaum nkawv los txog Npelehees lawd, cov kwvtij zej zog ras zom zaws rau nkawv. Tej pojniam sib hais tias, ntawd yog Naomi lov?

20 Naomi hais rau lawv tias, tsis txhob hu kuv ua Naomi lawm, cia li hu kuv ua Malas rau qhov (יחוח)Yahweh uas muaj hwjchim loj kawg nkaus, ua rau kuv lwj siab kawg.

21 Thaum kuv tawm hauv lub moos no mus, kuv muaj txhua yam nplua mias, tiamsis (יחוח)Yahweh coj kuv rov qab los tes dawb tes npliag. (יחוח)Yahweh ua rau kuv txom nyem nyuaj siab thiab (יחוח)Yahweh uas muaj hwjchim loj coj xwm txheej phem los raug kuv, nej tseem yuav hu kuv ua Naomi abtsi?

22 Yog li no, Naomi thiaj li tawm ntawm Mau‑as tebchaws los thiab Riyyah uas yog nws tus nyab thiab yog tibneeg Mau‑as kuj nrog nws los. Nkawv los txog lub moos Npelehees yog lub caij uas pib hlais qeb.