Nrhiav Pojniam Rau Xeem Npeeyamees

1 Cov Ixayees tau cog lus twv ntawm Mixapas tias, peb cov tsis kheev leej twg muab tej ntxhais qua rau cov Npeeyamees.

2 Cov pejxeem kuj tuaj rau ntawm Npe‑ees nyob ntawm (יחוח)Yahweh xub ntiag ib hnub tsaus ntuj, lawv tsa suab quaj heev kawg li.

3 Lawv hais tias, Au (יחוח)Yahweh uas yog cov Ixayees Tus Tswv, ua cas muaj tej xwm zoo li no tshwm los rau hauv cov Ixayees es hnub no yuav ploj ntais ib xeem Ixayees lawm?

4 Tagkis tom qab cov pejxeem sawv ntxov ua ib lub thaj thiab ua kevcai hlawv huvsi xyeem thiab ua kevcai xyeem sib raug zoo.

5 Cov Ixayees txawm hais tias, cov xeem Ixayees leejtwg tsis tuaj sablaj rau ntawm (יחוח)Yahweh xub ntiag nev? Cov Ixayees twb cog lus twv tawv kawg li hais txog tus uas tsis tuaj sablaj rau ntawm (יחוח)Yahweh xub ntiag hauv Mixapas tias, tus ntawd yuav tau raug muab tua xwb.

6 Cov Ixayees khuv xim lawv tus kwv Npeeyamees lawv hais tias, hnub no ib lub xeem hauv cov Ixayees raug muab txiav pov tseg lawm.

7 Peb yuav ua li cas nrhiav pojniam rau cov Npeeyamees uas tseem tshuav nyob, rau qhov peb twb tuav (יחוח)Yahweh lub npe cog lus twv lawm tias, peb yuav tsis muab peb tej ntxhais qua rau lawv yuav ua pojniam? 

8 Mas lawv hais tias, tshuav xeem twg hauv cov Ixayees uas tsis tuaj rau ntawm (יחוח)Yahweh xub ntiag hauv Mixapas? Yeej tsis muaj ib tug tuaj ntawm Yanpes Kile‑as tuaj nrog lawv koom hauv lub yeej.

9 Rau qhov thaum lawv txheeb cov pejxeem yeej tsis pom muaj cov Yanpes Kile‑as ib tug nyob ntawd kiag li.

10 Ua li ntawd cov pej xeem thiaj tso cov tub rog uas siab loj siab tuab kaum ob txhiab leej mus rau Yanpes Kile‑as mas hais rau lawv tias, Xuas ntaj tua cov uas nyob hauv Yanpes Kile‑as thiab tua cov pojniam thiab cov menyuam yaus.  

11 Nej yuav tau ua li no, txhua tus txivneej thiab txhua tus pojniam uas twb nrog dua txiv neej pw lawm mas muab tua pov tseg huvsi.

12 Hauv cov tibneeg Yanpes Kile‑as ntawd lawv pom muaj plaub puas tus nkauj xwb uas tsis tau nrog txivneej pw li, lawv thiaj coj cov nkauj xwb ntawd los rau lub yeej ntawm Silaus hauv Khana‑as tebchaws.  

13 Cov pejxeem sawvdaws kuj xa xov mus rau cov Npeeyamees uas nyob ntawm lub pob tsuas Limoos thiab tshaj xo rau lawv tias, rov sib raug zoo lawm.

14 Thaum ntawd cov Npeeyamees thiaj rov los, mas cov Ixayees muab cov nkauj xwb uas lawv tseg txojsia hauv Yanpes Kile‑as rau lawv yuav, tiamsis tsis txaus.

15 Cov pejxeem khuv xim cov Npeeyamees rau qhov (יחוח)Yahweh ua rau cov Ixayees ntais ib xeem lawm.

16 Mas cov kev txwj laug hauv cov pejxeem thiaj hais tias, vim cov Npeeyamees tej poj niam raug puam tsuaj tag lawm, peb yuav ua li cas nrhiav pojniam txhua rau cov uas tsis tau?

17 Lawv hais tias, cov Npeeyamees uas tseem tshuav yuav tau muaj caj muaj ceg nyob kom thiaj li tsis muaj ib xeem hauv cov Ixa-yees raug muab ntxuav kom tu noob.

18 Tiamsis peb muab tsis tau peb tej ntxhais qua rau lawv yuav rau qhov cov Ixayees tau cog lus twv tias, yog leejtwg muab tus ntxhais qua rau cov Npeeyamees yuav ua pojniam mas tus ntawd yuav raug lo lus foom tsis zoo.

19 Lawv thiaj hais tias, txhua xyoo muaj kevcai npaj noj haus xyeem rau

(יחוח)Yahweh ntawm Silaus, uas nyob ntawm Npe‑ees sab ped, yog ntawm txojkev mus Npe‑ees rau Sekhees sab hnub tuaj thiab nyob ntawm lub moos Lenpaunas sab nrad.

20 Lawv thiaj hais rau cov Npeeyamees tias, mus khiav nkaum rau hauv tej vaj txiv hmab zov tos,

21 mas saib yog cov ntxhais hauv Silaus tuaj nrog luag dhia seev cev, nej cia li tawm plaws hauv tej vaj txiv hmab los rub cov ntxhais hauv Silaus ib leeg ib tug coj mus ua pojniam mas rov qab mus rau Npeeyamees tebchaws.  

22 Thaum tej ntxhais ntawd leej txiv lossis tej kwvtij tuaj yws rau peb mas peb yuav hais rau lawv tias, thov saib rau peb es cia lawv yuav, rau qhov thaum peb mus ua rog, peb muab tsis tau pojniam txaus rau lawv txhua tus, thiab nej los nej kuj tsis muab rau lawv, yog nej muab los nej kuj txhaum. 

23 Cov Npeeyamees nyias taus nyias ua raws li lawv hais thiaj tau pojniam txhua, yog tau cov hluas nkauj dhia seev cev uas lawv mus rub. Lawv thiaj rov qab mus rau hauv lub tebchaws uas yog lawv qub txeeg qub teg, mus tsim kho tej moos thiab nyob rau hauv.

24 Thaum ntawd cov Ixayees nyias thiaj rov qab mus rau hauv nyias cum, nyias xeem, nyias mus nyob nyias tebchaws uas yog nyias qub txeeg qub teg.

25 Ncua sijhawm ntawd, cov Ixayees tsis muaj vajntxwv, mas nyias ua raws li nyias pom zoo xwb.