Ua Rog Rau Xeem Npeeyamees

1 Ib tsoom Ixayees txij ntua Daj mus txog Npe‑awsenpas thiab cov hauv Kile‑as sawvdaws tawm tuaj txoos ua ke ua kiag ib lub siab tuaj rau ntawm (יחוח)Yahweh xub ntiag hauv lub moos Mixapas.

2 Thaum (יחוח)Yahweh cov tibneeg tuaj sab laj ua ke mas cov thawj hauv txhua xeem Ixayees sawvdaws kuj tuaj koom thiab.  Huvsi muaj 400,000 leej tub rog uas mus kotaw coj ntaj.

3 (Thaum ntawd cov tibneeg Npeeya-mees hnov tias cov Ixayees tuaj ua ke rau Mixapas). Cov Ixayees hais tias, thov qhia rau peb saib tej kev phem no tshwm xwm los li cas. 

4 Tus Levis uas yog tus niam yau uas raug tua ntawd tus txiv hais tias, kuv thiab kuv tus niam yau los txog lub moos Kinpe‑as uas yog cov Npeeyamees lub moos, yog peb los pw ib hmos qhov ntawd.

5 Thaum tsaus ntuj cov txivneej hauv lub moos Kinpe‑as txawm tuaj nrhiav kuv thiab vij nkaus lub tsev. Lawv yuav muab kuv tua pov tseg, mas lawv muab kuv tus niam yau yuam nws thiaj li tuag.  

6 Kuv coj kuv tus niam yau lub cev tuag mus txiav ua tej ywb yav xa mus thoob plaws lub tebchaws uas yog cov Ixayees qub txeeg qub teg, rau qhov lawv ua tej kev txaj muag tej kev qias vuab tsuab rau hauv cov Ixayees lawm.

7 Saib lauj, nej cov tibneeg Ixayees sawv daws pab sablaj ntawm no saib pom zoo yuav ua li cas.  

8 Cov pejxeem txhua tus ib txhij sawv tsees hais tias, peb cov no tsis muaj ib tug yuav rov qab mus rau peb tej tsev ntaub thiab tsis muaj ib tug yuav mus rau peb vaj peb tsev.

9 Peb yuav ua li no rau Kinpe‑as. Peb yuav rho ntawv mus ua rog rau lawv.

10 Peb yuav rho cov Ixayees txhua xeem, rho kaum leej hauv ib puas leej, rho ib puas leej hauv ib txhiab leej, rho ib txhiab leej hauv kaum txhiab leej, kom mus nrhiav mov noj los rau cov tub rog, cov tub rog thiaj mus pauj tej kev phem kev qias uas cov tibneeg Kinpe‑as uas yog xeem Npeeyamees ua rau hauv cov Ixayees.

11 Cov Ixayees sawvdaws kuj sau nthwv ua ib lub siab mus ua rog rau lub moos ntawd.

12 Txhua xeem Ixayees thiaj xa tibneeg mus hais thoob plaws xeem Npeeyamees tias, ua cas yuav muaj tej kev phem kev qias no tshwm rau hauv nej cov?

13 Nej cia li muab cov txivneej phem hauv Kinpe‑as rau peb coj mus tua pov tseg mas peb yuav rhuav tshem tej kev phem kom tawm hauv cov Ixayees mus. Tiamsis cov Npeeyamees tsis yeem mloog lawv cov kwvtij Ixayees hais.

14 Cov Npeeyamees txawm tawm hauv lawv tej moos sau nthwv tuaj rau Kinpe‑as yuav ua rog rau cov Ixayees.  

15 Hnub ntawd cov Npeeyamees txhij tau cov tub rog coj ntaj hauv lawv tej moos huvsi tuaj yog nees nkaum rau txhiab leej nrog cov Kinpe‑as uas txhij tau xya pua leej tub rog uas txawj tshaj plaws.

16 Cov tub rog huvsi no muaj xya pua leej uas xis sab laug uas txawj ua rog tshaj plaws. Cov no txhua tus txawj xuas hlua fiav pob zeb ntaus kom raug tej yam uas luaj li txoj plaub hau xwb los yeej raug tag nrho huvsi li.

17 Cov Ixayees uas coj ntaj tsis suav cov Npeeyamees mas txhij tau 400,000 leej, puav leej yog tub rog siab tuab.

18 Cov Ixayees thiaj mus rau ntawm Npe‑ees mus nug (יחוח)Yahweh tias, peb cov no leejtwg yuav ua ntej mus ntaus cov Npeeyamees? (יחוח)Yahweh hais tias, cia Yahdah mus ua ntej.

19 Tagkis cov Ixayees thiaj sawv ntxov mus ua yeej ntaus lub moos Kinpe‑as.

20 Cov Ixayees tawm mus ua rog rau cov Npeeyamees, thiab cov Ixayees npaj tub rog ua tej pab tej pawg ntaus lawv ntawm Kinpe‑as.

21 Hnub ntawd cov Npeeyamees tawm hauv lub moos Kinpe‑as tuaj tua cov Ixayees ntog tuag tag nees nkaum ob txhiab leej.

22 Tiamsis cov Ixayees ho sib cuab zog thiab rov tso dua tub rog ua tej pab tej pawg rau tej chaw uas tso thawj hnub.  

23 Thiab cov Ixayees kuj mus quaj rau ntawm (יחוח)Yahweh xub ntiag ib hnub tsaus ntuj. Lawv nug (יחוח)Yahweh tias, peb yuav rov txeem mus ntaus peb cov kwvtij Npeeyamees los tsis txhob mus? (יחוח)Yahweh teb tias, mus ntaus lawv los maj.  

24 Mas hnub uas ob cov Ixayees thiaj txeem mus ze ze cov Npeeyamees.

25 Mas hnub ob ntawd, cov Npeeyamees kuj tawm hauv Kinpe‑as tuaj tua cov Ixayees tuag tag kaum yim txhiab leej, txhua tus puav leej yog tub rog coj ntaj.

26 Ixayees cov tub rog sawvdaws thiaj li mus pem Npe‑ees lawv quaj quaj. Lawv zaum rau ntawm (יחוח)Yahweh xub ntiag yoo mov ib hnub tsaus ntuj, thiab ua kevcai hlawv huvsi xyeem thiab ua kevcai xyeem sib raug zoo rau (יחוח)Yahweh.

27 Cov Ixayees thiaj nug (יחוח)Yahweh. (Lub sijhawm ntawd (יחוח)Yahweh lub phij xab sib cog lus nyob qhov ntawd.  

28 Mas Ele‑axas tus tub Finehas uas yog Aloos xeeb ntxwv ua haujlwm ntawm lub phij xab rau lub sijhawm ntawd). Cov Ixayees nug tias, peb yuav rov qab mus ua rog rau peb cov kwvtij Npeeyamees dua ib zaug los peb yuav tso tseg? (יחוח)Yahweh hais tias, cia li mus ntaus rau qhov tagkis kuv yuav muab lawv rau hauv nej txhais tes.

29 Yog li no cov Ixayees thiaj tso tub rog mus nraim cev zov puag ncig Kinpe‑as. 30 Mas cov Ixayees thiaj rov mus ntaus cov Npeeyamees rau hnub uas peb thiab tso tub rog ua tej pab tej pawg tiv Kinpe‑as yam li thawj ob zaug.

31 Cov Npeeyamees tawm tuaj ua rog rau cov Ixayees mas raug ntxias tawm mus deb lub moos. Lawv pib ntaus thiab tua cov Ixayees ib txhia yam li thawj ob zaug, yog taug txoj kev uas mus pem Npe‑ees thiab txoj uas mus Kinpe‑as thiab tom tej hav nroj, tua tau cov Ixayees kwvlam peb caug leej.

32 Cov Npeeyamees hais tias, lawv swb peb yam li thawj zaug lawm. Tiamsis cov Ixayees hais tias, cia peb thim coj lawv tawm mus deb lub moos kom txog tej kev loj.  

33 Cov Ixayees sawvdaws kuj tawm hauv lawv tej chaw khiav mus ua tej pab tej pawg ntawm Npa‑as Thamas, mas cov Ixayees uas nraim cev txawm sawv pes tsees hauv lawv tej chaw ntawm Kenpas sab hnub poob.  

34 Muaj kaum txhiab tus tub rog Ixayees uas txawj tshaj plaws txawm txeem mus ntaus lub moos Kinpe‑as. Mas ua rog ceev heev, cov Npeeyamees tsis paub tias kev puam tsuaj twb tuaj ze lawv lawm.  

35 (יחוח)Yahweh ua rau cov Ixayees kov yeej cov Npeeyamees. Hnub ntawd cov Ixayees tua tau cov Npeeyamees tuag nees nkaum tsib txhiab ib puas leej, cov ntawd puav leej yog tub rog tuav ntaj.

36 Yog li ntawd cov Npeeyamees thiaj pom tias lawv swb lawm. Cov Ixayees thim khiav cov Npeeyamees, vim yog lawv tso siab rau cov uas nraim cev uas lawv tso mus zov lub moos Kinpe‑as.

37 Cov uas nraim cev zov kuj sawv pes tsees txeem mus ntaus lub moos Kinpe‑as.  Cov uas nraim cev ntawd tawm los xuas ntaj tua lub moos huvsi.

38 Cov Ixayees nrog cov uas nraim cev teem haum tias thaum lawv ua pa taws ncho hlob hauv lub moos,

39 mas cov Ixayees yuav tig rov los tua. Cov Npeeyamees pib tua tau cov Ixayees kwvlam peb caug leej ces txawm hais tias, lawv yuav tuag rau peb tes ib yam li thawj zaug thiab ntag.

40 Tiamsis thaum muaj pa taws ncho tshwm plaws hauv lub moos raws li uas teem cia ntawd, cov Npeeyamees tig los saib ua ciav lub moos twb cig pa twb ncho nto ntuj lawm.

41 Cov Ixayees tig loo rov los, mas cov Npeeyamees kuj poob siab rau qhov lawv pom tias kev puam tsuaj los txog lawv lawm.

42 Lawv thiaj tig hlo khiav cov Ixayees taug txojkev uas mus rau tebchaws moj sab qhua, tiamsis lawv khiav tsis dim kev ua rog, mas cov Ixayees uas tawm hauv tej moos tuaj kuj muab lawv tua rau hauv nruab nrab.

43 Lawv muab cov Npeeyamees puav kev thiab caum tua mus rau ntawm tej chaw uas cov Npeeya-mees so, mus ncaj lub moos Kinpe‑as sab hnub tuaj.

44 Cov Npeeyamees tuag kaum yim txhiab leej, puav leej yog cov tub rog uas siab loj siab tuab.

45 Lawv kuj tig khiav mus rau tebchaws moj sab qhua mus txog lub pob tsuas Limoos.  Cov Ixayees tua lawv tuag taug txojkev tsib txhiab leej thiab caum lawv mus txog ntua Kidoos mas tua tau ob txhiab leej.  

46 Npeeyamees cov tub rog siab loj siab tuab uas coj ntaj raug tuag tag rau hnub ntawd huvsi yog nees nkaum tsib txhiab leej.  

47 Tiamsis muaj rau pua leej tub rog tig khiav mus rau tebchaws moj sab qhua mus txog lub pob tsuas Limoos, mas lawv nyob ntawm lub pob tsuas Limoos tau plaub lub hlis.

48 Cov Ixayees kuj rov mus ntaus cov Npeeyamees thiab xuas ntaj tua tej tibneeg thiab tej tsiaj txhu thiab txhua yam uas lawv pom. Thiab txhua lub moos uas lawv mus txog lawv muab hlawv huvsi pov tseg.