Tus Levis Thiab Nws Niam Yau

1 Ncua sijhawm ntawd, cov Ixayees tsis muaj vajntxwv, mas muaj ib tug Levis nyob pem toj siab Efa‑is tebchaws ceg uas deb kawg. Nws yuav tau ib tug hluas nkauj hauv Npelehees hauv Yahdah tebchaws ua niam yau.

2 Nws tus niam yau ntawd mus deev dua hluas nraug thiaj khiav tus txiv rov mus nrog leej txiv nyob hauv Npelehees hauv Yahdah tebchaws, nyob tau plaub lub hlis.

3 Nws tus txiv ho mus tos nws, mus ua tib zoo hais nws thiab yuav coj nws rov los.  Nws coj ib tug tub qhe thiab ib nkawg nees luav nrog nws mus.  Tus pojniam txawm coj tus txiv mus rau hauv yawm txiv tsev. Thaum yawm txiv pom nws, kuj zoo siab hlo hu los tsev.

4 Nws yawm txiv uas yog tus ntxhais txiv cheem nws nyob mas nws thiaj nyob tau peb hnub. Lawv kuj noj haus thiab pw qhov ntawd.

5 Mas hnub uas plaub, lawv thiaj sawv ntxov los npaj yuav mus, tiamsis tus ntxhais txiv hais rau tus vauv tias, cia li noj ib khaw mov thiaj muaj zog es kuv siab thiaj kheev koj mus.

6 Nkawv thiaj li rov zaum noj haus ua ke.  Dhau ntawd, tus ntxhais txiv cheem tias, rov pw ib hmos es tham kom zoo siab tso.

7 Thaum tus vauv sawv tsees yuav mus, yawm txiv cheem cheem mas nws rov pw qhov ntawd.

8 Mas hnub uas tsib, nws sawv ntxov yuav mus tiamsis tus ntxhais txiv hais tias, noj mov thiaj muaj zog, nyob ib chim hnub qaij tso. Nkawv thiaj noj mov ua ke.

9 Thaum tus yawg ntawd thiab nws tus niam yau thiab tus tub qhe sawv tsees yuav mus, yawm txiv uas yog tus ntxhais txiv hais rau nws tias, hnub qaij twb yuav tsaus ntuj, ces thov rov nyob ib hmos thiab. Twb yuav tag ib hnub ces pw no, nyob kom zoo siab tso, tagkis nej mam li sawv ntxov taug kev mus tsev.

10 Tiamsis tus yawg ntawd tsis yeem pw dua ib hmos lawm, nws cia li sawv tsees mus lawm.  Lawv mus txog ncaj ntawm lub moos Yenpus (uas yog Yeluxalees). Nws muab ob tug nees luav nog eeb huvsi thiab nws tus niam yau kuj nrog nws mus thiab.

11 Thaum lawv los yuav txog lub moos Yenpus mas twb yuav tsaus ntuj, tus tub qhe thiaj hais rau tus lospav tias, cia peb nkag mus so rau hauv cov Yenpus lub moos no thiab pw ib hmos hauv.

12 Tus lospav teb tias, peb txhob nkag mus rau hauv lwm haiv neeg lub moos uas tsis yog cov Ixayees li, peb yuav hla mus kom txog lub moos Kinpe‑as.

13 Nws thiaj hais rau tus tub qhe tias, cia peb mus kom ze Kinpe‑as lossis Lamas es pw hauv tej chaw no ib qho.  

14 Lawv thiaj hla kiag mus. Thaum lawv los ze Kinpe‑as uas yog xeem Npeeyamees lub moos mas hnub poob lawm.

15 Lawv thiaj nkag mus yuav pw hauv Kinpe‑as.  Nws thiaj mus zaum ntawm tshav puam hauv lub plawv moos vim yog tsis muaj leejtwg hu lawv mus pw hauv tsev.

16 Thaum yuav tsaus ntuj, muaj ib tug yawg laus mus teb los. Nws yog tib neeg pem toj siab Efa‑is tebchaws los nyob hauv lub moos Kinpe‑as, tiamsis cov tibneeg hauv lub moos ntawd, yog xeem Npeeya-mees.

17 Nws tsa muag saib mas pom cov qhua nyob ntawm tshav puam hauv lub moos, tus yawg laus ntawd thiaj hais tias, nej yuav

mus qhov twg, thiab nej tuaj qhov twg tuaj?

18 Tus Levis teb tias, peb taug kev hauv Npelehees hauv Yahdah tebchaws los yuav mus lawm pem toj siab Efa‑is ceg uas deb kawg, yog kuv tuaj pev tuaj kuv tau mus rau Npelehees hauv Yahdah tebchaws, kuv yuav rov qab mus tsev. Tsis muaj leejtwg hu kuv mus so hauv lawv tsev.  

19 Quav nyab thiab zaub nees luav peb kuj muaj txhij thiab peb uas yog koj cov qhev muaj mov noj thiab cawv txiv hmab txaus rau kuv thiab tus pojniam no thiab tus hluas uas nrog wb tuaj no huvsi, tsis tu ncua ib yam abtsi li.

20 Tus yawg laus ntawd thiaj hais tias, thov cia nej nyob kaj siab lug.  Kuv yuav pub txhua yam uas nej xav tau rau nej. Thov tsis txhob pw ib hmos ntawm tshav puam no.  

21 Nws thiaj coj lawv los so hauv nws tsev, nws muab zaub rau nees luav noj thiab lawv ntxuav kotaw thiab noj haus.

22 Thaum lawv tab tom nyob zoo siab hlo mas cov txivneej phem hauv lub moos ntawd txawm tuaj vij lub tsev, tsoo qhov rooj qw hu tus yawg laus uas yog tus tswv tsev ntawd tias, cia li xa tus yawg uas tuaj rau hauv koj tsev tuaj rau peb deev.  

23 Tus tswv tsev txawm mus hais rau lawv tias, cov kwvtij, tsis txhob ua li, tsis txhob ua phem li no, rau qhov tus yawg no los so hauv kuv tsev lawm.  Tsis txhob ua phem ua qias li no.

24 Kuv muaj ib tug ntxhais uas tsis tau deev dua hluas nraug li thiab muaj nws tus niam yau nyob no, kuv yuav coj tuaj rau nej nimno. Mas nej yuav yuam nkawv thiab ua li cas raws li nej lub siab nyiam los tau. Tiamsis tsis txhob ua phem ua qias rau tus txivneej no xwb.

25 Tiamsis cov tibneeg ntawd tsis mloog kiag li.  Mas tus yawg ntawd thiaj muab nws tus niam yau thawb kiag mus rau lawv. Cov txiv neej ntawd thiaj li yuam nws ua phem rau nws ib hmos kaj ntug.  Thaum kaj ntug txoog, lawv muab nws tso mus.

26 Thaum pom kev tseeb tus pojniam los ntog vau hlo rau ntawm lub tsev uas tus txiv pw taw rooj mus txog hnub tawm.

27 Tagkis tus txiv sawv los qhib qhov rooj yuav mus, ua ciav nws tus niam yau pw xyab luas ntawd, ob txhais tes xyab khaum ntawm taw rooj.

28 Nws hais rau tus niam yau tias, cia li sawv tsees peb yuav mus, tiamsis tsis hnov teb li.  Nws txawm muab tus niam yau tsaws kiag rau saum tus nees luav, nws taug kev mus txog ntua tsev.

29 Thaum nws mus rau hauv tsev lawd, nws cia li muab riam txiav tus niam yau uas tuag ntawd ua kaum ob ya mas nws xa mus thoob plaws Ixayees teb chaws. 30 Txhua tus uas pom kuj hais tias, tej xwm zoo li no tsis tau muaj dua li txij thaum cov Ixayees tawm hauv Iziv tebchaws los txog hnub no, tsis muaj leejtwg tau pom dua li. Cia li muab coj los xav thiab sablaj tib zoo es hais mus.