Mikhas Thiab Xeem Daj

1 Ncua sijhawm ntawd, cov Ixayees tsis muaj vajntxwv. Lub sijhawm ntawd, xeem Daj tab tom nrhiav tebchaws rau lawv nyob ua lawv qub txeeg qub teg, rau qhov los txog thaum ntawd lawv tseem tsis tau nrog cov Ixayees tau qub txeeg qub teg.

2 Mas cov Daj thiaj xa tsib tug txivneej uas siab tuab sawv cev lawv xeem tuaj hauv Xaulas thiab Etha‑oos mus tshuaj tebchaws thiab saib tebchaws. Cov Daj hais rau lawv tias, nej cia li mus tshuaj saib tebchaws. Lawv tuaj txog pem toj siab Efa‑is tebchaws, tuaj txog ntawm Mikhas tsev mas so qhov ntawd.

3 Thaum lawv tuaj ze ntawm Mikhas tsev lawv cim tau tus hluas Levis ntawd lub suab, mas lawv thiaj nkag mus nug tias, leej twg coj koj tuaj ntawm no thiab koj ua abtsi ntawm no? Koj ua haujlwm abtsi?

4 Nws teb lawv tias, Mikhas ua li ub li no rau kuv, nws ntiav kuv mas kuv thiaj ua nws tus pov thawj.

5 Lawv txawm hais rau nws tias, thov nug (יחוח)Yahweh rau peb xwv peb thiaj paub tias qhov uas peb yuav mus no yuav zoo los tsis zoo.  

6 Tus pov thawj txawm hais rau lawv tias, cia li tso siab lug mus. (יחוח)Yahweh lub qhov muag yeej saib ntsoov qhov uas nej mus ntawd.

7 Tsib tug txivneej ntawd thiaj li tawm mus txog lub moos La‑is, mas pom tias cov tibneeg hauv lub moos ntawd nyob tso siab plhuav zoo yam nkaus li cov tibneeg Xaidoos. Lawv nyob tus yees tsis txob tsis txhawj abtsi, tsis tu ncua ib yam abtsi hauv ntiajteb no li, lawv yog tibneeg nplua nuj. Lawv nyob deb ntawm cov Xaidoos thiab lawv tsis muaj kev ntsig txog lwm yam tibneeg.

8 Thaum lawv rov los txog lawv tej kwvtij hauv Xaulas thiab Etha‑oos, mas cov kwvtij nug lawv tias, nej mus pom zoo li cas?

9 Lawv teb tias, cia li sawv tsees, peb mus ua rog rau lawv, rau qhov peb twb pom lub tebchaws ntawd lawm yog tebchaws zoo kawg li. Nej yuav tsis ua abtsi li lov? Tsis txhob qeeb siab, cia li mus txeeb kiag lub tebchaws ntawd ua nej tug.

10 Thaum uas nej mus txog yuav ntsib cov tibneeg uas tsis txob tsis txhawj abtsi li. Lub tebchaws kuj dav, mas (יחוח)Yahweh twb muab rau hauv nej txhais tes lawm, yog lub tebchaws uas tsis tu ncua ib yam abtsi hauv ntiajteb no li.  

11 Mas xeem Daj rau pua tus txivneej muaj cuab yeej ua rog tawm hauv Xaulas thiab Etha‑oos mus.

12 Lawv mus ua yeej ntawm Khiliyas Ye‑alis hauv Yahdah tebchaws. Vim li no lawv thiaj hu qhov chaw ntawd hais tias Mahanes Daj, los txog niaj hnub nimno. Lub yeej ntawd nyob ntawm Khiliyas Ye‑alis sab hnub poob.

13 Lawv kuj hla qhov ntawd mus rau pem toj siab Efa‑is tebchaws, mus txog Mikhas tsev.

14 Mas tsib tug txivneej uas twb mus tshuaj tebchaws ntawm lub moos La‑is lawd hais rau lawv tej kwvtij tias, nej puas paub tias hauv lub tsev no muaj ib lub efauj thiab dab qhuas thiab ib tug dab mlom uas txaug thiab ib tug dab mlom uas nchuav? Nej cia li xav saib nej yuav ua li cas.

15 Lawv thiaj nkag mus rau hauv tus Levis hluas ntawd lub tsev uas nyob ntawm Mikhas tsev mas nug nws kev noj qab nyob zoo.

16 Mas xeem Daj rau pua leej uas coj cuab yeej ua rog sawv ntawm rooj vag.

17 Mas tsib tug uas mus tshuaj tebchaws ntawd kuj nkag mus muab tus dab mlom uas txaug thiab lub tsho efauj thiab tej dab qhuas thiab tus dab mlom uas nchuav ntawd. Mas tus pov thawj kuj sawv nrog rau pua tus txivneej uas coj cuab yeej ua rog sawv ntawm rooj vag ua ke.

18 Thaum cov tibneeg no nkag mus rau hauv Mikhas tsev muab tus dab mlom uas txaug thiab lub tsho efauj thiab tej dab qhuas thiab tus dab mlom uas nchuav ntawd los, tus pov thawj thiaj nug tias, nej ua abtsi li no?

19 Lawv teb nws tias, ua twjywm, muab tes pos qhov ncauj es nrog peb mus, mus ua peb txiv thiab ua peb li pov thawj. Ua pov thawj rau ib tug txivneej tsev neeg zoo los ua pov thawj rau ib xeem ib cum hauv cov Ixayees zoo dua?

20 Mas tus pov thawj thiaj li zoo siab. Nws thiaj muab lub efauj thiab tej dab qhuas thiab tus dab mlom uas txaug coj nrog cov tibneeg ntawd mus.

21 Lawv thiaj tig kiag ntawd mus, lawv tso lawv tej menyuam thiab tej tsiaj txhu mus ua ntej.

22 Thaum lawv mus deb ntawm Mikhas tsev lawd mas Mikhas txawm hu cov tibneeg uas nyob ze nws tsev tuaj ua ke mas lawv caum cuag cov tibneeg Daj.

23 Lawv qw hu cov Daj, mas cov Daj cia li tig hais rau Mikhas tias, muaj li cas es koj yuav coj tibneeg coob ua luaj li no tuaj?

24 Nws teb tias, nej muab kuv tej dab mlom uas kuv ua thiab coj kuv tus pov thawj khiav mus lawm, es kuv tseem tshuav abtsi thiab? Ua cas nej tseem nug kuv tias, yog ua li cas?

25 Cov Daj thiaj hais rau nws tias, tsis txhob tsa koj lub suab rau peb hnov tsam ces tej tibneeg npau taws ces muab koj thiab koj tsev neeg ntaus tuag tag.

26 Cov Daj cia li taug kev mus lawm. Thaum Mikhas pom tias lawv muaj zog dua, nws cia li tig kiag rov mus tsev lawm.

27 Cov tibneeg Daj coj tej uas Mikhas ua thiab Mikhas tus pov thawj mus mas mus txog lub moos La‑is uas cov tibneeg nyob siab tus yees tsis txob tsis txhawj abtsi li. Lawv txawm xuas ntaj tua cov tibneeg ntawd huvsi thiab muab lawv lub moos hlawv pov tseg tag. 

28 Tsis muaj leejtwg tuaj pab cawm, rau qhov lawv nyob deb lub moos Xaidoos thiab lawv tsis ntsig txog lwm tus.  Lub moos La‑is nyob hauv lub hav ze lub moos Npelehaus.  Lawv muab lub moos ntawd ua dua tshiab rau lawv nyob.

29 Lawv thiaj hu lub moos ntawd hu ua moos Daj raws li lawv yawg koob Daj uas yog Ixayees yug. Yav thaum ub lub moos ntawd hu ua La‑is.

30 Cov Daj kuj muab tus dab mlom uas txaug txawb rau lawv teev.  Mas Kawsoos tus tub Yahnathas uas yog Mauxes xeeb ntxwv thiab nws cov tub ua pov thawj rau xeem Daj mus txog lub sijhawm uas tebchaws poob.

31 Lawv muab tus dab mlom txaug uas Mikhas ua ntawd txawb teev mus tag lub sij hawm uas (יחוח)Yahweh lub tsev nyob hauv Silaus.