COV THAWJ TXIAV TXIM 17

Mikhas Teev Dab Mlom

1 Muaj ib tug yawg yog tibneeg pem toj siab Efa‑is tebchaws hu ua Mikhas.

2 Nws hais rau nws niam tias, ib txhiab ib puas daim nyiaj uas muaj tibneeg nyiag koj li thiab koj tau tsawm foom rau thiab kuv hnov lawd, mas cov nyiaj ntawd nyob ntawm kuv. Yog kuv muab lawm. Nws niam txawm hais tias, thov (יחוח)Yahweh foom koob hmoov rau kuv tus tub.

3 Mikhas thiaj muab ib txhiab ib puas daim nyiaj ntawd thim rau leej niam. Mas leej niam hais tias, cov nyiaj no kuv pub kiag rau (יחוח)Yahweh ua nws tug, mas kuv muab rau koj coj mus txaug ua dab mlom thiab nchuav ua dab mlom. Kuv thiaj muab rov rau koj.

4 Thaum Mikhas thim cov nyiaj rov rau leej niam lawm, leej niam txawm coj ob puas daim mus rau tus kws nyiaj muab txaug ua dab mlom thiab nchuav ua dab mlom. Mas tej dab mlom ntawd nyob hauv Mikhas tsev.

5 Tus Mikhas no muaj ib lub tsev dab thiab ua ib lub efauj thiab teev dab qhuas, thiab tsa nws ib tug tub ua pov thawj coj kevcai.

6 Ncua sijhawm ntawd, cov Ixayees tsis muaj vajntxwv mas txhua tus nyias ua raws li nyias pom zoo.  

7 Muaj ib tug hluas, yog xeem Levis, yog tibneeg Npelehees, nws nyob hauv Npelehees hauv xeem Yahdah tebchaws.  

8 Nws tawm hauv Npelehees uas nyob hauv Yahdah tebchaws mus nrhiav chaw nyob.  Thaum nws taug kev mus ntawd nws mus txog pem toj siab Efa‑is tebchaws thiab mus txog Mikhas lub tsev.  

9 Mikhas thiaj hais rau nws tias, koj tuaj qhov twg tuaj? Nws teb tias, kuv yog ib tug Levis uas nyob hauv moos Npelehees hauv Yahdah tebchaws, kuv tuaj mus nrhiav chaw nyob.

10 Mikhas txawm hais rau nws tias, cia li nrog kuv nyob, ua kuv txiv thiab ua ib tug pov thawj rau kuv mas ib xyoos kuv yuav muab kaum daim nyiaj rau koj thiab muab ib cev tsoos tsho thiab mov noj rau koj. Tus Levis ntawd thiaj mus rau hauv tsev.

11 Tus Levis kuj txaus siab nrog tus yawg ntawd nyob. Tus hluas ntawd kuj zoo tam Mikhas ib tug tub ntag.

12 Mikhas kuj tsa tus Levis ntawd mas tus Levis thiaj ua nws tus pov thawj thiab nyob hauv nws tsev.

13 Mikhas hais tias, nimno kuv paub tseeb tias (יחוח)Yahweh yuav pub kuv noj qab nyob zoo rau qhov kuv muaj ib tug Levis ua pov thawj lawm.