Xaxoos Nyob Hauv Lub Moos Kaxas

1 Xaxoos mus rau hauv lub moos Ka-xas mas pom ib tug poj muag cev ces txawm mus nrog pw ua ke.

2 Muaj tibneeg mus hais rau cov tibneeg Kaxas tias, Xaxoos tuaj rau hauv no lawm.  Lawv txawm vij lub tsev uas nws nyob thiab zov ntawm rooj loog ib hmos kaj ntug. Lawv nyob twjywm zov ib hmos thiab hais tias, peb tos txog kaj ntug li muab nws tua pov tseg.

3 Tiamsis Xaxoos pw txog ib tag hmo. Mas thaum ib tag hmo nws sawv tsees los rho kiag txhib qhov rooj loog thiab ob tug ncej rooj thiab tus las rooj kwv kiag saum xub pwg mus rau pem lub ncov roob uas nyob ncaj lub moos Henploos.

​

Xaxoos Thiab Tus Pojniam Delilas

4 Dhau los rau tom qab Xaxoos mus nyiam ib tug pojniam hauv lub hav Xaules npe hu ua Delilas.

5 Filixatees cov thawj mus hais rau tus pojniam ntawd tias, koj cia li ntxias kom Xaxoos qhia saib vim li cas nws muaj zog loj li ntawd thiab peb yuav ua li cas thiaj kov yeej nws thiab khi tau nws thiab txo tau nws lub zog, mas peb cov no ib leeg yuav muab ib txhiab ib puas lub npib nyiaj rau koj.   

6 Delilas thiaj hais rau Xaxoos tias, thov koj qhia rau kuv saib vim li cas koj lub zog loj li ntawd thiab yuav ua li cas thiaj khi tau koj thiab txo tau koj lub zog.

7 Xaxoos hais rau nws tias, yog lawv muab xya txoj hlua hneev uas tseem nyoos tsis tau qhuav los khi kuv, mas kuv yuav tsis muaj zog, tsuas zoo li lwm tus txivneej xwb.

8 Filixatees cov thawj thiaj coj xya txoj hlua hneev uas tseem nyoos tsis tau qhuav tuaj rau Delilas mas nws muab Xaxoos khi.

9 Nws kuj npaj ib co tibneeg khiav nkaum rau hauv ib chav tsev zov tos.  Nws txawm hais rau Xaxoos tias, Xaxoos, cov Filixatees tuaj lawm lauj!

Tiamsis Xaxoos rub tej hlua hneev tu ib yam li tej xov maj raug hluavtaws kub es tu. Yog li ntawd lawv kuj tsis paub tias vim li cas nws muaj zog.

10 Delilas txawm hais rau Xaxoos tias, saib maj, koj dag kuv koj qhia tsis tseeb rau kuv.  Thov qhia kuv saib yuav ua li cas thiaj khi tau koj.

11 Xaxoos hais rau nws tias, yog lawv muab cov hlua tshiab uas tsis tau siv dua li khi kuv, ces kuv yuav tsis muaj zog, tsuas zoo li lwm tus txivneej xwb.

12 Delilas txawm muab cov hlua tshiab los khi nws thiab hais rau nws tias, Xaxoos, cov Filixatees tuaj lawm lauj! Muaj ib co tibneeg khiav nkaum nyob hauv lwm chav tsev zov.  Xaxoos kuj rub tej hlua ntawd tu pes nrho ntawm nws txhais tes ib yam li tej xov xwb.

13 Mas Delilas hais rau Xaxoos tias, koj dag kuv los txog tav no li thiab qhia tsis tseeb rau kuv xwb. Cia li hais rau kuv saib yuav ua li cas thiaj khi tau koj. Xaxoos hais rau nws tias, yog koj muab kuv xya qais plaubhau ntos ua txia rau hauv rab ntos thiab muab tus nqos npuaj kom ceev, ces kuv yuav tsis muaj zog, tsuas zoo li lwm tus txivneej xwb.

14 Yog li ntawd, thaum nws tsaug zog Delilas muab nws xya qais plaubhau ntos ua txia rau hauv rab ntos thiab muab tus nqos npuaj kom ceev, thiab hais rau nws tias, Xaxoos, cov Filixatees tuaj lawm lauj! Nws txawm sawv tsees rub tus nqos thiab rab ntos thiab cov plaubhau uas ntos rau hauv cov hlaub lawm rho kiag mus.

15 Mas Delilas hais rau Xaxoos tias, ua cas koj lam hais tias koj hlub kuv, es koj lub siab twb tsis npuab kuv? Koj dag kuv peb zaug lawm, koj twb tsis qhia tseeb rau kuv tias vim li cas koj muaj zog loj li kod.

16 Thaum Delilas txob txob hais tag hais thiab taij hnub tag hnub thiab, ces Xaxoos txawm dhuav siab yuav tuag.

17 Nws txawm qhia kiag nws lub siab rau Delilas huvsi hais tias, rab chais tsis tau nphav kuv lub taubhau kiag li, rau qhov kuv raug muab cais ua Naxis pub rau ()Yahweh txij thaum nruab thiab los lawm. Yog chais kuv cov plaubhau lawm kuv lub zog yuav tawm ntawm kuv mus thiab kuv yuav tsis muaj zog, tsuas zoo li lwm tus txivneej lawm xwb.

18 Thaum Delilas pom tias nws qhia kiag lub siab huvsi lawm, ces Delilas txawm txib tibneeg mus hu Filixatees cov thawj hais tias, cia li rov tuaj ib zaug xwb rau qhov nws qhia kiag lub siab rau kuv lawm. Ces Filixatees cov thawj txawm tuaj rau ntawm Delilas thiab coj nyiaj tuaj.

19 Delilas txawm kom Xaxoos pw tsaug zog rau saum nws ncej puab, thiab nws hu ib tug yawg tuaj chais Xaxoos xya qais plaubhau saum nws taubhau. Ces Delilas txawm zes Xaxoos, ua ciav nws tsis muaj zog lawm.  

20 Delilas txawm hais tias, Xaxoos, cov Filixatees tuaj lawm lauj! Xaxoos tsim dheev los hais tias, kuv yuav tawm plaws mus yam li txhua zaus thiab nti kom dim plaws. Nws tsis paub tias (יחוח)Yahweh twb ncaim nws lawm.

21 Cov Filixatees thiaj muab nws ntes thiab muab nws ob lub qhov muag kaus pov tseg, thiab coj nws mus rau nram lub moos Kaxas, lawv muab saw hlau tooj liab khi nws. Lawv kom nws zom zeb hauv lub tsev lojfaj.

22 Txij thaum chais nws cov plaub hau lawd, nws cov plaubhau kuj pib tuaj ntev zuj zus.

​

Xaxoos Tuag

23 Filixatees cov thawj tuaj txoos ua ke yuav ua kevcai loj xyeem tsiaj rau lawv tus dab Dakoos, thiab ua kev lomzem zoo siab rau qhov lawv hais tias, peb tus dab muab peb tus yeeb ncuab Xaxoos rau hauv peb txhais tes lawm.

24 Thaum cov pejxeem pom Xaxoos lawv kuj qhuas lawv tus dab tias, peb tus dab muab tau peb tus yeeb ncuab uas rhuav tshem peb lub tebchaws rau hauv peb txhais tes, nws tua peb tuag coob kawg li lawm.

25 Thaum lawv ua lomzem zoo siab ntawd, lawv txawm hais tias, cia li hu Xaxoos los dhia ua si rau peb saib. Lawv thiaj mus hu Xaxoos tawm hauv lub tsev lojfaj los, mas Xaxoos kuj los dhia ua si rau lawv saib.  Lawv kom nws sawv hauv nruab nrab cov ncej tsev.

26 Xaxoos hais rau tus menyuam tub uas tuav nws tes tias, thov coj kuv mus xuas tej ncej uas txheem lub tsev no, kuv thiaj tau chaw pheeb tej ncej ntawd.

27 Muaj pojniam txivneej puv nkaus lub tsev ntawd. Filixatees cov thawj sawv daws kuj nyob qhov ntawd, thiab tseem muaj pojniam txivneej peb txhiab leej nyob txheej saud saib Xaxoos dhia ua si.  

28 Ces Xaxoos txawm quaj thov (יחוח)Yahweh tias, Au (יחוח)Yahweh, thov nco txog kuv. Au (יחוח)Yahweh, thov pub zog rau kuv zaum no tib zaug xwb es kuv yuav pauj cov Filixatees rau kuv ob lub qhov muag ib sab.

29 Xaxoos txawm tuav ob tug ncej hauv nruab nrab tsev uas txheem lub tsev ntawd thiab nriaj tes rau ob tug ncej ntawd, txhais tes xis nriaj ib tug, txhais tes laug nriaj ib tug.

30 Thiab Xaxoos hais tias, thov cia kuv nrog cov Filixatees tuag lauj. Ces nws txawm thawb kawg nkaus nws lub zog, mas lub tsev ntawd pob rhe los tais cov thawj thiab cov pejxeem uas nyob hauv lub tsev txhua tus huvsi.  Yog li no cov tibneeg uas nws tua tuag rau thaum nws tuag no, coob dua li cov uas nws tua tuag rau thaum nws tseem muaj txojsia nyob.

31 Ces nws cov kwvtij thiab nws tsev neeg sawvdaws tuaj coj nws lub cev tuag mus faus rau hauv nws txiv Manau‑as lub qhov ntxa uas nyob ntawm lub moos Xaulas thiab lub moos Etha‑oos ntu nruab nrab. Nws ua thawj kav cov Ixayees tau nees nkaum xyoo.