1 Dhau ntawd thaum txog lub caij hlais mog, Xaxoos coj ib tug me nyuam tshis mus saib nws tus pojniam. Nws hais tias, kuv yuav nkag mus rau hauv kuv tus pojniam lub txaj. Tiamsis yawm txiv tsis kheev nws nkag mus.

2 Yawm txiv hais tias, kuv xav tias koj ntxub nws kawg li, kuv thiaj muab nws qua rau koj tus phijlaj lawm.  Nws tus niam hluas tseem zoo nkauj dua nws los tsis yog?  Cia koj yuav nws nyob tus niam laus chaw.

3 Xaxoos txawm hais rau lawv tias, zaum no kuv yuav ua phem rau cov Filixatees los kuv yeej tsis txhaum li lawm.

4 Xaxoos txawm tawm mus ntes peb puas tus hma coj los khi kotw sib txuas ua ib nkawg ib nkawg, muab ib teg tsau pav rau hauv txhua nkawm tus kotw sib txuas.

5 Thaum nws zes taws rau teg tsau lawd nws kuj muab tso rau hauv cov Filixatees tej teb mog mas hluavtaws kub lawv tej mog uas hlais tau thiab tej mog uas tseem tsis tau hlais thiab kub tej vaj txiv hmab thiab tej teb txiv aulib.

6 Cov Filixatees thiaj hais tias, leejtwg ua li no? Lawv teb tias, yog Xaxoos uas yog ib tug hauv Thinaj tus vauv vim yog nws yawm txiv muab Xaxoos tus pojniam qua rau nws tus phijlaj lawm. Cov Filixatees txawm tuaj muab Xaxoos tus pojniam thiab yawm txiv hlawv pov tseg huvsi.

7 Xaxoos txawm hais rau lawv tias, yog nej ua li no lawm, kuv twv ntuj tias kuv yuav tsis tso tseg mus txog thaum kuv ua pauj rau nej tag.

8 Nws txawm ntaus lawv ua lwj ua liam ua rau lawv tuag coob kawg, ces nws txawm mus nyob hauv kem zeb Edas.

​

Xaxoos Ntaus Yeej Cov Filixatees

9 Ces cov Filixatees txawm mus ua lub yeej hauv Yahdah thiab mus ntaus lub moos Lehis.

10 Cov tibneeg Yahdah nug tias, nej tuaj ntaus peb ua abtsi? Cov Filixatees hais tias, peb tuaj ntes Xaxoos, ua rau nws ib yam li nws ua rau peb.

11 Cov tibneeg Yahdah peb txhiab leej txawm mus rau ntawm kem zeb Edas thiab hais rau Xaxoos tias, koj tsis paub tias cov Filixatees yog cov uas kav peb lov? Koj ua abtsi li no rau peb? Xaxoos hais tias, lawv ua li cas rau kuv lawm, kuv thiaj ua li ntawd rau lawv.

12 Lawv thiaj hais rau nws tias, peb tuaj yuav muab koj khi coj mus cob rau hauv cov Filixatees txhais tes. Xaxoos hais rau lawv tias, thov cog lus twv cia tias nej yuav tsis muab kuv tua.

13 Lawv hais rau nws tias, ua li los maj, peb tsuas khi koj coj mus cob rau hauv lawv txhais tes xwb, peb yuav tsis tua koj. Lawv txawm muab ob txoj hlua tshiab khi Xaxoos coj hauv kem zeb ntawd los.

14 Thaum nws mus txog lub moos Lehis, cov Filixatees qw zom zaws tuaj ntsib nws. Mas (יחוח)Yahweh Tus Ntsuj Plig Dawb Huv kav kiag Xaxoos ces tej hlua uas lawv khi nws txhais npab ntawd txawm zoo yam li txoj hlua maj uas kub nyhiab yaj pes ntshis ntawm nws txhais tes.

15 Nws txawm pom ib daim puab tsaig nees luav nyoos nyoos ces nws cev tes khaws nkaus los ntaus cov Filixatees tuag ib txhiab leej.

16 Mas Xaxoos hais tias, kuv xuas daim puab tsaig nees luav thiaj tuag sib tsub sib nias, kuv xuas daim puab tsaig nees luav tua tau ib txhiab leej.

17 Thaum nws hais li ntawd tag nws txawm muab daim puab tsaig ntawd laim pov tseg.  Mas luag thiaj hu lub chaw ntawd tias Lamalehis.

18 Xaxoos nqhis dej heev thiaj li hu thov (יחוח)Yahweh hais tias, koj pub koj tus qhev txhais tes kov yeej tau loj li no, es nimno kuv yuav nqhis dej tuag thiab poob rau hauv cov uas tsis ua kevcai txiav txhais tes lov?

19 (יחוח)Yahweh txawm qhib kiag ib lub qhov ntawm lub moos Lehis mas dej txhawv los.  Thaum Xaxoos haus dej tag nws rov qab muaj zog thiab nws txojsia loj tuaj. Vim li ntawd thiaj hu qhov chaw ntawd tias Eehakhaus, tseem nyob ntawm Lehis txog niaj hnub nimno.

20 Thaum cov Filixatees tseem kav ntawd, Xaxoos ua tus thawj coj cov Ixayees tau nees nkaum xyoo.