Xaxoos Thiab Tus Hluas Nkauj Filixatees

1 Xaxoos mus nram lub moos Thinaj, mas pom ib tug hluas nkauj Filixa-tees hauv lub moos Thinaj ntawd.

2 Ces nws txawm rov los hais rau nws niam nws txiv tias, kuv pom ib tug hluas nkauj Filixatees hauv lub moos Thinaj, neb mus yuav los ua kuv pojniam.

3 Tiamsis leej txiv thiab leej niam hais rau nws tias, koj cov neej tsa thiab tag nrho peb haiv neeg tsis muaj ib tug ntxhais hluas li lov es koj tseem mus yuav cov Fili-xatees uas tsis ua kevcai txiav tej ntxhais ua pojniam? Tiamsis Xaxoos hais rau leej txiv tias, cia li mus yuav tus ntxhais ntawd rau kuv xwb, rau qhov kuv nyiam nws kawg nkaus li.

4 Leej txiv thiab leej niam tsis paub tias qhov no yog los ntawm (יחוח)Yahweh los, rau qhov (יחוח)Yahweh tab tom nrhiav kev ua rog rau cov Filixatees.  Thaum ntawd cov Filixatees kav kiag cov Ixayees.

5 Ces Xaxoos txawm nrog nws niam nws txiv mus nram Thinaj. Thaum nws tuaj txog tej vaj txiv hmab ntawm Thinaj ua ciav muaj ib tug thav tsov ntxhuav dhia nyooj laws los rau nws.

6 (יחוח)Yahweh Tus Ntsuj Plig Dawb Huv txawm los kav kiag Xaxoos, nws thiaj muab tus tsov ntxhuav ntawd dua ua tej cwb ceg ib yam li dua menyuam tshis, nws twb tsis muaj cuab yeej abtsi hauv nws txhais tes li.  Tiamsis nws kuj tsis qhia rau nws niam nws txiv paub tias nws ua abtsi lawm.  

7 Nws txawm mus nrog tus hluas nkauj ntawd tham, nws txaus siab rau tus hluas nkauj ntawd heev.  8Tsis ntev tom qab Xaxoos rov mus yuav tus hluas nkauj ntawd. Nws txawm mus xauj saib tus tsov ntxhuav lub cev tuag ntawd, ua ciav muaj ib xub ntab nyob hauv tus tsov ntxhuav lub cev twb muaj zib lawm.

9 Nws txawm cev tes kaus cov zib ntab ntawd los noj taug kev mus. Nws los txog nws niam nws txiv nws txawm muab cev rau nkawv noj, tiamsis nws tsis qhia tias nws muab cov zib ntab ntawd hauv tus tsov ntxhuav lub cev tuag los.  

10 Nws txiv kuj mus rau nram tus hluas nkauj ntawd mas Xaxoos npaj ib rooj mov qhov ntawd ib yam li tej hluas ib txwm ua.

11 Thaum cov Filixa-tees pom nws lawd, lawv coj peb caug leej tuaj ua qhua nrog nws nyob ua ke.

12 Ces Xaxoos txawm hais rau lawv tias, cia kuv txhiaj ib nqes rau nej txhais.  Yog nej txhais tau ua ntej xya hnub uas noj tshoob no, kuv yuav muab peb caug lub tsho ntaub mag thiab peb caug cev tsoos tsho ua zam rau nej.  

13 Yog nej txhais tsis tau, nej yuav tau muab peb caug lub tsho ntaub mag thiab peb caug cev tsoos tsho ua zam rau kuv.  Lawv hais rau nws tias, cia li txhiaj rau peb txhais saib.  

14 Ces Xaxoos hais rau lawv tias, muaj ib yam noj tau tawm hauv tus uas noj los. Muaj ib yam qab zib tawm hauv tus uas muaj zog los. Tau peb hnub lawm, lawv txhais tsis tau txoj txhiaj txhais ntawd.

15 Thaum txog hnub uas plaub lawv txawm mus hais rau Xaxoos tus pojniam tias, koj cia li ntxias koj tus txiv kom txhais txoj txhiaj txhais rau peb. Tsis ua li ntawd mas peb yuav muab hluavtaws hlawv koj thiab koj txiv tsev neeg pov tseg. Koj hu peb tuaj no yog hu kom peb tuaj raug kev pluag xwb lov?

16 Xaxoos tus pojniam mus quaj rau Xaxoos thiab hais tias, koj tsuas ntxub kuv xwb, koj yeej tsis hlub kuv. Koj txhiaj txhais rau kuv cov neej tsa, koj kuj tsis txhais rau kuv mloog. Xaxoos hais rau nws tias, kuv niam kuv txiv kuv twb tsis qhia li, yuav qhia koj tau li cas?

17 Nws quaj rau Xaxoos xya hnub uas noj tshoob ntawd, mas hnub uas xya, Xaxoos thiaj txhais txoj txhiaj txhais ntawd rau nws mloog rau qhov nws txob Xaxoos heev hwv lawm. Ces nws txawm qhia tej lus uas txhais ntawd rau nws cov neej tsa.

18 Ces hnub uas xya thaum hnub tsis tau poob qho, cov tibneeg hauv lub moos ntawd thiaj hais rau Xaxoos tias, muaj yam twg qab zib dhau zib ntab? Muaj abtsi muaj zog dua tsov ntxhuav? Xaxoos thiaj hais rau lawv tias, yog nej tsis muab kuv niag maum nyuj mus laij nej yeej txhais tsis tau li.

19 (יחוח)Yahweh Tus Ntsuj Plig Dawb Huv los kav tag nrho Xaxoos, nws thiaj mus nram lub moos Akheloos mas tua cov txivneej hauv lub moos ntawd peb caug leej, txeeb kiag lawv ib puas tsav yam huvsi thiab muab lawv tej tsoos tsho ua zam rau cov uas txhais tej lus txhiaj txhais ntawd. Ces nws thiaj li rov qab mus rau pem nws txiv lub tsev ua chim kawg.  

20 Xaxoos tus pojniam ntawd mas luag muab qua rau nws tus phijlaj yuav lawm.