Yug Xaxoos

1 Cov Ixayees rov qab ua tej uas (יחוח)Yahweh pom tias phem, mas (יחוח)Yahweh thiaj muab lawv cob rau hauv cov Filixatees txhais tes tau plaub caug xyoo.

2 Muaj ib tug yawg yog xeem Daj nyob hauv lub moos Xaulas, nws npe hu ua Manau‑as. Nws tus pojniam ib txwm tsis xeeb menyuam.

3 (יחוח)Yahweh tus tubtxib saum ntuj los tshwm rau tus pojniam ntawd thiab hais rau nws tias, koj yeej ib txwm tsis xeeb menyuam, tiamsis koj yuav xeeb menyuam thiab yug ib tug tub.

4 Vim li no koj yuav tau ceev faj tsis txhob haus cawv txiv hmab thiab cawv ntxwg, thiab tsis txhob noj tej uas qias tsis huv,

5 vim koj yuav xeeb menyuam thiab yug ib tug tub. Tsis txhob chais nws cov plaubhau, rau qhov tus tub ntawd yuav muab cais ua Naxis pub rau (יחוח)Yahweh txij thaum yug los li.  Nws yuav pib cawm cov Ixayees dim hauv cov Filixatees txhais tes.

6 Tus pojniam ntawd txawm mus hais rau nws tus txiv tias, muaj

(יחוח)Yahweh ib tug tibneeg tuaj rau ntawm kuv, lub ntsej muag zoo yam nkaus li (יחוח)Yahweh tus tubtxib saum ntuj, txaus ntshai kawg. Kuv twb tsis nug tias nws tuaj qhovtwg tuaj thiab nws kuj tsis qhia nws lub npe rau kuv.

7 Tiamsis nws hais rau kuv tias, koj yuav xeeb menyuam thiab yug ib tug tub.  Yog li no tsis txhob haus cawv txiv hmab thiab cawv ntxwg, thiab tsis txhob noj tej uas qias tsis huv, rau qhov tus tub ntawd yuav muab cais ua Naxis pub rau (יחוח)Yahweh txij thaum yug los mus txog hnub tuag.

8 Ces Manau‑as txawm thov (יחוח)Yahweh tias, Au (יחוח)Yahweh, thov Tus Tswv tus tibneeg uas koj txib los ntawd rov los tshwm rau wb ob leeg pom dua ib zaug, thiab qhia rau wb paub tias wb yuav ua li cas rau tus tub uas yuav yug los ntawd. 9 (יחוח)Yahweh mloog Manau‑as tej lus thov thiab (יחוח)Yahweh tus tubtxib saum ntuj los tshwm dua ib zaug rau tus pojniam ntawd rau thaum nws zaum tom teb, tiamsis nws tus txiv Manau‑as tsis nrog nws nyob ua ke.

10 Nws thiaj khiav mus hais rau nws tus txiv tias, tus yawg uas hnub ntawd tuaj rau ntawm kuv kuj rov los tshwm rau kuv thiab.

11 Manau‑as thiaj li sawv tsees raws nws pojniam qab mus. Thaum nws mus txog tus yawg ntawd nws txawm hais tias, koj yog tus yawg uas hais cov lus rau tus pojniam no los tsis yog?  Tus ntawd teb tias, yog kawg.

12 Manau‑as thiaj hais tias, thaum muaj tseeb raws li koj tej lus lawm, tus tub ntawd lub neej yuav zoo li cas, thiab nws yuav tau ua abtsi?

13 (יחוח)Yahweh tus tubtxib saum ntuj thiaj hais rau Manau‑as tias, tus pojniam yuav tau ceev faj ua txhua yam raws li kuv hais rau nws lawd.

14 Nws tsis txhob noj ib yam abtsi uas muab txiv hmab ua, tsis txhob haus cawv txiv hmab lossis cawv ntxwg, tsis txhob noj tej uas qias tsis huv. Nws yuav tau ua raws nraim li txhua yam uas kuv hais rau nws lawd.

15 Manau‑as hais rau (יחוח)Yahweh tus tub txib saum ntuj tias, thov koj tos ib pliag, wb ob leeg yuav npaj ib tug menyuam tshis rau koj.

16 (יחוח)Yahweh tus tubtxib saum ntuj txawm hais rau Manau‑as tias, txawm yog kom tos los kuv yuav tsis noj koj tej zaub mov.  Tiamsis yog koj yuav npaj tej uas muab hlawv xyeem, koj cia li muab xyeem rau (יחוח)Yahweh. Manau‑as tsis paub tias tus ntawd yog (יחוח)Yahweh tus tubtxib saum ntuj.

17 Manau‑ as thiaj hais rau (יחוח)Yahweh tus tubtxib saum ntuj tias, koj npe hu li cas? Thaum muaj tseeb raws li koj tej lus lawm, wb thiaj li txawj pub koob meej rau koj.

18 (יחוח)Yahweh tus tubtxib saum ntuj hais rau nws tias, koj nug kuv lub npe ua abtsi? Kuv lub npe yog lub uas tibneeg xav tsis thoob.

19 Manau‑as txawm muab tus menyuam tshis thiab tej qoob loo uas xyeem tuaj xyeem rau saum lub pob zeb rau (יחוח)Yahweh. Thiab nws ua tej txujci uas xav tsis thoob rau thaum Manau-as thiab nws tus pojniam nkawv tseem saib ntsoov.  

20 Thaum nplaim taws cig plaws saum lub thaj mus rau saum ntuj, (יחוח)Yahweh tus tub txib saum ntuj txawm nrog cov nplaim taws saum lub thaj nce mus rau thaum Manau‑as thiab nws tus pojniam saib ntsoov, ces nkawv txawm khwb nkaus ua lub plhu ti nkaus av.  

21 (יחוח)Yahweh tus tubtxib saum ntuj tsis los tshwm rau Manau‑as thiab nws tus poj niam dua li lawm. Manau‑as thiaj paub tias tus ntawd yog (יחוח)Yahweh tus tubtxib saum ntuj.

22 Manau‑as txawm hais rau nws tus poj niam tias, ntshai wb yuav tuag xwb lauj, rau qhov wb tau pom (יחוח)Yahweh lawm.  

23 Tiamsis nws tus pojniam hais rau nws tias, yog (יחוח)Yahweh xav muab wb tua pov tseg, nws yuav tsis txais tej uas wb muab hlawv xyeem thiab tej qoob loo uas xyeem ntawm wb txhais tes, thiab yuav tsis qhia txhua yam no rau wb thiab piav tej yam uas zoo li no rau wb.

24 Tus pojniam ntawd thiaj yug tau ib tug tub, muab tis npe hu ua Xaxoos. Tus tub ntawd kuj hlob zoo thiab (יחוח)Yahweh foom koob hmoov rau nws.

25 Thiab (יחוח)Yahweh Tus Ntsuj Plig Dawb Huv pib txhawb nws lub siab ntawm Mahanes Daj uas nyob ntawm Xaulas thiab Etha‑oos ntu nruab nrab.