COV THAWJ TXIAV TXIM 12

Yethas Thiab Cov Efa‑is

1 Cov tibneeg Efa‑is raug sau ua tub rog hla mus txog Xafoos mas lawv hais rau Yethas tias, ua cas koj hla mus ua rog rau cov Asmoos koj tsis hu peb nrog koj mus? Peb yuav muab koj vaj tse hlawv kom kub kiag koj thiab.

2 Yethas thiaj hais rau lawv tias, thaum kuv thiab kuv cov tibneeg tseem ua rog loj rau cov Asmoos, kuv hu kom nej tuaj pab tiamsis nej kuj tsis tuaj pab kuv dim hauv lawv txhais tes.

3 Thaum kuv pom tias nej tsis pab kuv dim lawm, kuv thiaj tso nyog kuv txojsia hla mus ua rog rau cov Asmoos, mas (יחוח)Yahweh tau muab lawv rau hauv kuv txhais tes.  Vim li cas hnub no nej ho yuav tuaj ua rog rau kuv?  

4 Yethas thiaj sau zog cov tibneeg Kile‑as ua rog rau cov Efa‑is. Cov Kile‑as kuj tua cov Efa‑is rau qhov cov Efa‑is hais tias, nej cov Kile‑as uas nyob hauv Efa‑is thiab Manaxes yog cov niag tibneeg uas khiav tawm hauv Efa‑is lawm.

5 Cov Kile‑as kuj txeeb tau tej chaw uas hla tus dej Yaladees tag huvsi tsis kheev cov Efa‑is hla. Thaum cov Efa‑is tus twg khiav los hais tias, kuv thov hla dej mus, mas cov Kile‑as nug tias, koj yog tibneeg Efa‑is los tsis yog?  

Yog nws teb tias, tsis yog,

6 ces lawv hais tias, koj sim hais lo lus Sinpaulej saib. Tus ntawd hais tias, Xinpaulej vim yog cov Efa‑is hais tsis tau lo lus no meej. Lawv txawm ntes kiag tus ntawd muab tua pov tseg rau ntawm tej chaw hla dej Yaladees. Thaum ntawd cov Efa‑is tuag plaub caug ob txhiab leej.

7 Yethas ua thawj kav cov Ixayees tau rau xyoo.  Yethas uas yog tibneeg Kile‑as mam tuag mas muab nws faus rau ib lub moos hauv Kile‑as tebchaws.

​

Ixas Thiab Eloos Thiab Adoos 

8 Dhau Yethas lawm mas Ixas uas nyob hauv Npelehees ua thawj kav cov Ixayees.

9 Nws muaj peb caug tus tub thiab peb caug tus ntxhais, nws muab qua rau lwm xeem thiab nws yuav lwm xeem peb caug tus ntxhais los rau nws cov tub. Nws kav cov Ixayees tau xya xyoo.

10 Ixas mam tuag mas muab nws faus rau hauv Npelehees.  11Dhau Ixas lawm mas Eloos uas yog xeem Xenpuloos ua thawj kav cov Ixayees.  Nws kav cov Ixayees tau kaum xyoo.

12 Mas Eloos uas yog tibneeg Xenpu-loos kuj tuag mas muab nws faus rau hauv Aiyaloos hauv Xenpuloos tebchaws.

13 Dhau Eloos lawm mas Hilees tus tub Adoos uas nyob hauv lub moos Pilathoos ua thawj kav cov Ixayees.

14 Nws muaj plaub caug tus tub thiab muaj peb caug tus xeeb ntxwv caij xya caum tus nees luav. Nws kav cov Ixayees tau yim xyoo.

15 Hilees tus tub Adoos uas nyob hauv Pilathoos kuj tuag mas muab nws faus rau ntawm Pilathoos hauv Efa‑is tebchaws uas yog pem toj siab uas muaj cov Amalej nyob.