Yethas

1 Yethas uas yog tibneeg Kile‑as yog ib tug tub rog siab loj siab tuab.  Nws niam yog ib tug poj muag cev, nws txiv yog Kile‑as.

2 Kile‑as tus niam tsav cuab muaj ob peb tug tub.  Thaum cov tub ntawd hlob lawm lawv txawm ntiab Yethas khiav mus thiab hais tias, koj yuav tsis muaj feem tau peb txiv li qub txeeg qub teg rau qhov koj yog dua ib tug niam yug.

3 Yethas txawm khiav ntawm cov kwvtij mus nyob hauv lub tebchaws Thauj. Cov tibneeg tsis tsheej haj tuaj koom nrog nws mus ua tub sab tub nyiag.  

4 Tom qab ntawd cov Asmoos ua rog rau cov Ixayees.

5 Thaum cov Asmoos ua rog rau cov Ixayees ntawd, cov kev txwj laug hauv Kile‑as teb chaws txawm mus coj Yethas hauv Thauj teb chaws los.

6 Lawv hais rau Yethas tias, cia li los ua peb tus thawj es peb yuav ua rog rau cov Asmoos.

7 Tiamsis Yethas hais rau Kile‑as cov kev txwj laug tias, nej ntxub kuv thiab ntiab kuv tawm hauv kuv txiv lub tsev los tsis yog? Ua cas nimno nej raug kev ceeblaj txom nyem nej ho tuaj nrhiav kuv thiab?

8 Kile‑as cov kev txwj laug hais rau Yethas tias, qhov uas peb tuaj cuag koj no kuj yog xav tau koj nrog peb mus ntaus cov Asmoos thiab mus ua peb tus thawj kav tag nrho cov Kile‑as huvsi.

9 Yethas thiaj hais rau Kile‑as cov kev txwj laug tias, yog nej coj kuv rov mus tsev mus ua rog rau cov Asmoos thiab yog (יחוח)Yahweh muab lawv cob rau hauv kuv txhais tes, mas kuv yuav ua nej tus thawj.  

10 Kile‑as cov kev txwj laug hais rau Yethas tias, (יחוח)Yahweh ua timkhawv rau peb, peb yeej yuav ua raws li koj hais.

11 Yethas thiaj nrog Kile‑as cov kev txwj laug mus mas cov pejxeem thiaj tsa nws ua tus thawj thiab ua tus kav hlo lawv. Yethas thiaj hais tej lus uas lawv hais haum huvsi ntawd tab meeg (יחוח)Yahweh ntawm lub moos Mixapas.

12 Yethas thiaj tso tibneeg xa xov mus hais rau cov Asmoos tus vajntxwv tias, koj muaj plaub abtsi rau kuv es koj yuav tuaj ua rog rau kuv lub tebchaws?

13 Cov Asmoos tus vajntxwv teb Yethas cov tub xa xov tias, vim yog thaum cov Ixayees tawm hauv Iziv tebchaws los, lawv txeeb kuv lub tebchaws lawm txij ntua tus dej Anoos mus txog tus dej Yanpos thiab mus txog tus dej Yaladees. Nimno cia li thim lub tebchaws no zoo zoo rov los.  

14 Yethas tso tibneeg xa xov rov mus cuag cov Asmoos tus vajntxwv dua,

15 lawv hais tias, Yethas hais li no tias, cov Ixayees tsis tau txeeb Mau‑as lub tebchaws thiab cov Asmoos lub tebchaws li.

16 Tiamsis thaum cov Ixayees tawm hauv Iziv tebchaws los, lawv taug kev hauv tebchaws moj sab qhua mus txog Hiav txiv Liab thiab los txog ntawm Khades.  

17 Mas cov Ixayees tso tibneeg xa xov mus hais rau Edoos tus vajntxwv tias, thov koj kheev peb hla koj lub tebchaws mus, tiamsis Edoos tus vajntxwv tsis quav ntsej li. Lawv tso tibneeg mus thov Mau‑as tus vajntxwv ib yam li ntawd, los nws kuj tsis kheev.  Yog li ntawd cov Ixayees thiaj nyob ntawm Khades.  

18 Ces lawv txawm mus hauv tebchaws moj sab qhua lug Edoos thiab Mau‑as lub teb chaws los txog ntawm Mau‑as lub tebchaws sab hnub tuaj thiab tsuam chaw nyob ntawm tus dej Anoos sab ped.  Lawv twb tsis mus rau hauv Mau‑as tebchaws li, rau qhov tus dej Anoos twb ua ciam teb quas Mau‑as tebchaws lawm.

19 Cov Ixayees thiaj tso tibneeg xa xov mus cuag cov Amaulais tus vajntxwv Xihoos hauv lub moos Hesanpoos. Cov Ixayees hais rau nws tias, thov cia peb hla koj lub tebchaws mus rau hauv peb lub tebchaws. 

20 Tiamsis Xihoos tsis tso siab cia cov Ixayees hla nws lub tebchaws, Xihoos txawm txhij nws cov tibneeg sawvdaws mus ua lub yeej rau ntawm Yahaj thiab ua rog rau cov Ixayees.  

21 Mas (יחוח)Yahweh uas yog cov Ixayees Tus Tswv thiaj muab Xihoos thiab nws cov tibneeg huvsi rau hauv cov Ixayees txhais tes, nws thiaj swb lawm. Cov Ixayees thiaj txeeb kiag cov Amaulais uas nyob qhov ntawd lub tebchaws huvsi.

22 Cov Ixayees txeeb kiag cov Amaulais lub tebchaws txij ntua tus dej Anoos mus txog tus dej Yanpos, thiab txij ntua lub tebchaws moj sab qhua mus txog tus dej Yaladees.

23 Yog li no (יחוח)Yahweh uas yog cov Ixayees Tus Tswv thiaj ntiab cov Amaulais khiav tawm ntawm nws haiv neeg Ixayees hauv ntej mus. Mas koj txawm yuav muab ua koj tug lov?

24 Koj tsis ceev tej uas koj tus dab Khemauj muab cob rau koj lov? Txhua thaj uas (יחוח)Yahweh uas yog peb Tus Tswv ntiab luag tawm ntawm peb hauv ntej mus es pub rau peb, peb yuav ceev cia.

25 Koj zoo dua Xipaus tus tub Npalaj uas ua vajntxwv hauv Mau‑as tebchaws lov? Npalaj puas tau nrog cov Ixayees sib ntsuas zog thiab ua rog rau lawv?  

26 Cov Ixayees twb nyob hauv lub moos Hesanpoos thiab ib ncig lub moos ntawd thiab nyob hauv lub moos Alau‑aws thiab ib ncig ntawd thiab nyob hauv txhua lub moos raws tus ntug dej Anoos tau peb puas xyoo, ua cas koj tsis txeeb rov qab thaum ntawd?

27 Yog li no kuv tsis tau ua txhaum rau koj, koj yog tus ua txhaum rau kuv rau qhov uas ua rog rau kuv. Cia (יחוח)Yahweh uas yog tus txiav txim los tu plaub rau cov Ixayees thiab cov Asmoos hnub no.

28 Tiamsis cov Asmoos tus vajntxwv tsis mloog tej lus uas Yethas tso tibneeg mus hais ntawd.

29 Mas (יחוח)Yahweh Tus Ntsuj Plig Dawb Huv los kav kiag Yethas, nws thiaj hla hlo Kile‑as thiab Manaxes tebchaws mus rau ntawm lub moos Mixapas hauv Kile‑as, thiab tawm ntawm Mixapas hauv Kile‑as mus txog cov Asmoos.

30 Yethas thiaj fiv rau (יחוח)Yahweh hais tias, yog koj muab cov Asmoos rau hauv kuv txhais tes lawm,

31 mas leejtwg uas tawm hauv kuv lub qhov rooj tuaj tos kuv rau thaum kuv kov yeej cov Asmoos rov qab los, tus ntawd yuav muab ua (יחוח)Yahweh tug thiab kuv yuav muab nws ua kevcai hlawv xyeem.

32 Ces Yethas txawm hla mus ua rog rau cov Asmoos mas (יחוח)Yahweh muab lawv cob rau hauv nws txhais tes.

33 Mas nws tua tau lawv txij ntua lub moos Alau‑aws mus yuav txog lub moos Minij, huvsi ntaus tau nees nkaum lub moos thiab mus txog ntua lub moos Anpees Khelamees, tibneeg tuag coob heev. Cov Asmoos thiaj swb kiag zwm rau cov Ixayees.

​

Yethas Tus Ntxhais

34 Yethas txawm rov qab los tsev rau hauv Mixapas, ces nws tus ntxhais npuaj nruas seev cev tuaj tos nws. Nws cov menyuam muaj tib tug ntxhais ntawd xwb tsis muaj dua lwm tus tub ntxhais kiag li.

35 Thaum nws pom dheev tus ntxhais ntawd nws txawm dua rhe nws lub tsho thiab hais tias, Au me ntxhais es, koj ua rau kuv txom nyem lauj! Koj ua rau kuv nyuaj siab heev kawg, vim kuv tau tsa ncauj fiv rau (יחוח)Yahweh lawm, yuav thim tsis tau tej lus ntawd.

36 Nws thiaj hais rau leej txiv tias, txiv, yog koj tau tsa ncauj cog lus rau (יחוח)Yahweh li cas lawm, cia li ua rau kuv raws li koj cog lus ntawd, rau qhov (יחוח)Yahweh twb pauj cov Asmoos uas yog koj tej yeeb ncuab rau koj lawm.  

37 Nws kuj hais rau leej txiv tias, kuv thov koj cia kuv ua li no xwb, thov tso kuv nyob ywj siab ob lub hlis, kom kuv tau nrog kuv tej phooj ywg mus ncig ua si saum tej roob thiab quaj ntsuag qhov uas kuv yuav tuag rau thaum kuv tseem yog nkauj xwb.

38 Leejtxiv teb tias, cia li mus.  Nws thiaj tso tus ntxhais mus ob lub hlis. Mas tus ntxhais thiab tej phooj ywg thiaj tawm mus quaj ntsuag txog nws lub cev nkauj xwb rau pem roob.

39 Thaum puv ob hlis lawd, nws thiaj rov los rau ntawm leej txiv, mas leej txiv kuj muab nws xyeem raws li nws tau cog lus tseg lawd. Nws yeej tsis tau nrog dua txivneej pw li. Qhov no thiaj ua ib txoj kevcai rau cov Ixayees,

40 kom lawv tej ntxhais niaj xyoo quaj ntsuag txog Yethas uas yog tibneeg Kile‑as tus ntxhais ib xyoos mas plaub hnub.