COV THAWJ TXIAV TXIM 10

Thaulas Thiab Ya‑is

1 Dhau Anpimelej lawm muaj dua ib tug sawv los pab cov Ixayees dim yeeb ncuab, yog Pu‑as tus tub Thaulas. Nws yog Dausdaus tus xeeb ntxwv, yog xeem Ixakhas nyob lub moos Samis pem toj siab Efa‑is tebchaws.

2 Nws ua thawj kav cov Ixayees tau nees nkaum peb xyoos, nws mam tuag mas lawv muab nws faus rau hauv lub moos Samis.

3 Dhau ntawd Ya‑is uas yog tibneeg Kile‑as ho sawv ua thawj kav cov Ixayees tau nees nkaum ob xyoos.

4 Nws muaj peb caug tus tub uas caij peb caug tus nees luav.  Lawv muaj peb caug lub moos hu ua Havauya‑is los txog niaj hnub nimno rau hauv Kile‑as tebchaws.

5 Ya‑is tuag mas muab faus rau hauv lub moos Khamoos.

​

Cov Asmoos Tsim Txom Cov Ixayees

6 Cov Ixayees rov ua tej uas (יחוח)Yahweh pom tias phem. Lawv mus teev tej dab Npa‑as thiab tej dab Athalaus, thiab Alas cov dab, Xaidoos cov dab, Mau‑as cov dab thiab cov Asmoos thiab cov Filixatees tej dab. Lawv tso (יחוח)Yahweh tseg tsis ua koom tu (יחוח)Yahweh.

7 Mas (יחוח)Yahweh npau taws rau cov Ixayees, nws thiaj muab lawv tso rau hauv cov Asmoos thiab cov Filixatees txhais tes.

8 Luag thiaj tsim txom quab yuam cov Ixayees rau xyoo ntawd.  Luag quab yuam cov Ixayees uas nyob sab dej Yaladees hnub tuaj hauv cov Amaulais tebchaws uas yog Kile‑as tau kaum yim xyoo.

9 Cov Asmoos kuj hla tus dej Yaladees mus ua rog rau cov Yahdah thiab Npeeyamees thiab Efa‑is. Cov Ixayees thiaj raug kev txom nyem heev kawg li.  

10 Cov Ixayees thiaj quaj thov (יחוח)Yahweh tias, peb tau ua txhaum rau koj vim yog peb tau tso peb Tus Tswv tseg mus ua koom tu tej dab Npa‑as.

11 Mas (יחוח)Yahweh hais rau cov Ixayees tias, kuv tsis tau pab nej dim hauv cov Iziv thiab cov Amaulais thiab cov Asmoos thiab cov Filixatees lov?

12 Thiab cov Xaidoos, cov Amalej thiab cov Ma‑oos tau quab yuam nej mas nej tau quaj thov kuv, ces kuv twb pab nej dim hauv lawv txhais tes.

13 Txawm yog li ntawd los nej tseem tso kuv tseg mus ua koom tu luag tej dab. Vim li no kuv yuav tsis pab nej dim dua li lawm.  

14 Cia li mus quaj thov tej dab uas nej xaiv los ntawd. Cia cov dab ntawd pab nej dim hauv nej tej kev txom nyem no.

15 Mas cov Ixayees hais rau (יחוח)Yahweh tias, peb tau ua txhaum lawm, thov koj ua rau peb raws li koj pom zoo. Peb thov koj pab peb dim hnub no xwb.

16 Ua li ntawd mas lawv thiaj muab lwm haiv neeg tej dab tso pov tseg los ua koom tu ()Yahweh. Mas (יחוח)Yahweh thiaj mob siab rau qhov uas cov Ixayees raug kev txom nyem lwj siab ntawd.

17 Cov Asmoos thiaj li raug sau ua tub rog thiab ua lub yeej ua rog rau hauv Kile‑as. Cov Ixayees kuj sau zog tuaj ua ke ua yeej rau ntawm Mixapas.

18 Cov tibneeg Kile‑as cov thawj hais tias, leejtwg ua thawj txeem mus ntaus cov Asmoos? Tus ntawd yuav tau ua cov tibneeg Kile‑as sawvdaws tus thawj.