Anpimelej

1 Yelunpa‑as tus tub Anpimelej txawm mus cuag nws niam cov neej tsa hauv lub moos Sekhees mas hais rau lawv thiab lawv cum sawvdaws tias,

2 thov nej mus hais tej lus no rau cov tibneeg Sekhees sawvdaws hnov hais tias, yuav cia Yelunpa‑as xya caum tus tub kav nej thiaj zoo los yuav cia ib tug kav xwb thiaj zoo? Thov nej nco tias kuv yog nej nqaij xeeb tawv hlav.

3 Mas nws niam cov neej tsa thiaj hais tej lus no rau cov tibneeg Sekhees mloog. Ces lawv txawm qaug siab kiag tuaj Anpimelej tog, rau qhov lawv hais tias, nws twb txheeb ze peb.

4 Lawv thiaj muab xya caum daim nyiaj hauv lub tsev dab Npa‑as Npelis pub rau Anpimelej. Nws coj mus ntiav cov tibneeg loj leeb tsis tsheej haj tuaj nws tog.

5 Nws txawm mus rau hauv nws txiv tsev hauv lub moos Aufas thiab tua nws cov kwvtij uas yog Yelunpa‑as xya caum tus tub rau saum tib daim lag zeb. Tsuas yog tshuav Yahthas uas yog Yelunpa‑as tus tub ntxawg xwb, vim nws mus khiav nkaum lawm.

6 Cov tibneeg Sekhees thiab cov tib neeg Npemilaus sawvdaws sau zog tuaj ua ke. Lawv mus tsa Anpimelej ua vajntxwv rau ntawm tus ncej zeb uas nyob ntawm ib sab tus ntoo qheb hauv Sekhees.

7 Thaum muaj tib neeg mus hais rau Yahthas paub mas nws kuj mus rau saum lub ncov roob Kelixis qw nrov nrov hais rau lawv tias, cov tibneeg Sekhees, nej cia li mloog kuv hais, xwv (יחוח)Yahweh thiaj yuav mloog nej lub suab.  8Muaj ib zaug cov ntoo tau mus tsa ib tug ntoo ua vajntxwv kav lawv.  Lawv hais rau tsob txiv aulib tias, koj cia li los ua vajntxwv kav peb.

9 Tiamsis tsob txiv aulib teb lawv tias, yuav cia kuv muab kuv cov roj uas siv rau tej timtswv thiab tibneeg tau meej mom tso tseg es mus yoj yuj yeev saum tej ntoo huvsi lov?

10 Mas cov ntoo ho hais rau tsob txiv cev tias, koj cia li los kav peb.

11 Tiamsis tsob txiv cev teb lawv tias, yuav cia kuv muab kuv cov txiv qab zib zoo tso tseg es mus yoj yuj yeev saum tej ntoo huvsi lov?

12 Cov ntoo ho hais rau tsob txiv hmab tias, koj cia li los kav peb.

13 Tiamsis tsob txiv hmab teb tias, yuav cia kuv muab kuv cov cawv txiv hmab uas ua rau tej tim tswv thiab tibneeg zoo siab tso tseg es mus yoj yuj yeev saum tej ntoo huvsi lov?

14 Cov ntoo sawvdaws ho hais rau tsob pos tias, koj cia li los kav peb.

15 Tsob pos hais rau cov ntoo ntawd tias, yog nej muaj siab yuav tsa kuv ua vajntxwv kav nej tiag tiag mas nej cia li los nyob hauv kuv tej qab ntxoov ntxoo.  Yog tsis ua li ntawd mas cia hluavtaws tawm hauv tsob pos los kub cov ntoo ciab hauv Lenpanoos huvsi pov tseg.

16 Qhov uas nej tsa Anpimelej ua vajntxwv ntawd, yog nej ua tuaj nruab siab thiab ua ncaj ncees tiag, thiab yog nej tau ua zoo rau Yelunpa‑as tsev neeg thiab ua rau nws kom tsim nyog li uas nws tau ua zoo cia lawd,

17 (rau qhov kuv txiv twb ua rog pab nej, tso nyog nws txojsia pab nej dim hauv cov Midees txhais tes.

18 Tiamsis hnub no nej sawv twv kuv txiv tsev neeg, nej tua kuv txiv xya caum leej tub rau saum tib daim lag zeb thiab nej tsa kuv txiv tus niam nkauj qhe tus tub Anpimelej ua vajntxwv kav cov tibneeg Sekhees, rau qhov yog nws txheeb ze nej), 

19 yog hnub no nej ua tuaj nruab siab thiab ua ncaj rau Yelunpa‑as thiab nws tsev neeg, kuj cia li zoo siab heev rau Anpimelej thiab cia nws zoo siab heev rau nej.

20 Yog qhov uas nej ua li ntawd tsis ncaj mas cia hluavtaws tawm hauv Anpimelej los kub cov tibneeg Sekhees thiab cov tibneeg Npemilaus pov tseg. Thiab cia hluavtaws tawm hauv cov Sekhees thiab cov Npemilaus kub Anpimelej pov tseg.

21 Yahthas thiaj li khiav mus nyob rau ntawm Npe‑aws, vim yog ntshai nws tijlaug Anpimelej.

22 Anpimelej kav cov Ixayees tau peb xyoos.

23 (יחוח)Yahweh tshoov siab rau Anpimelej thiab cov tibneeg Sekhees kom tsis sib haum.  Cov Sekhees thiaj ntxeev siab rau Anpimelej,

24 thiaj ua pauj rau qhov uas lawv ua lim hiam rau Yelunpa‑as xya caum leej tub, thiab lub txim uas tua cov tibneeg ntawd poob rau Anpimelej uas tua lawv thiab poob rau cov tibneeg Sekhees uas cuab zog rau Anpimelej tua nws cov kwvtij pov tseg.

25 Cov Sekhees sawv twv Anpimelej thiab tso tibneeg mus zov kev saum lub ncov roob lwg txhua tus uas taug txojkev ntawd. Txawm muaj tibneeg mus hais rau Anpimelej paub.

26 Mas Enpes tus tub Ka‑as thiab nws cov kwvtij khiav mus nyob hauv lub moos Sekhees, mas cov tib neeg Sekhees tso siab rau nws.

27 Lawv mus de txiv hmab coj los tsuj tsuam kua thiab npaj noj haus rau hauv lawv lub tsev dab, lawv thiaj noj haus cem foom Anpimelej.

28 Mas Enpes tus tub Ka‑as thiaj hais tias, Anpimelej yog leejtwg thiab peb cov Sekhees ho yog leejtwg es yuav mus tu nws? Yelunpa‑as tus tub thiab Xenpus uas ua nws tus thawj twb tau ua haujlwm rau Sekhees txiv Hamaus los tsis yog?  Peb tseem yuav tu nws ua abtsi?  

29 Yog cia kuv kav cov tibneeg no mas kuv yuav muab Anpimelej rhuav tseg. Kuv yuav twv ntxhias Anpimelej tias, koj cia li tsav ntxiv tub rog thiab tawm tuaj.

30 Thaum tus tswv xeev Xenpus hauv lub moos Sekhees tau hnov tej lus uas Enpes tus tub Ka‑as hais nws chim heev.

31 Nws thiaj tso tibneeg xa xov mus rau Anpimelej hauv lub moos Alumas hais tias, saib maj, Enpes tus tub Ka‑as thiab nws cov kwvtij tuaj rau hauv lub moos Sekhees mas tshum cov tibneeg Sekhees sawv twv koj.

32 Mas koj thiab koj cov tibneeg cia li sawv tsees hmo ntuj mus zov tos tom teb. 

33 Mas tagkis thaum hnub pib tawm koj cia li sawv ntxov txeem plaws tuaj ntaus lub moos. Mas thaum Ka‑as thiab nws cov tub rog tawm tuaj tiv nej, koj cia li ntaus lawv raws li uas zoo sijhawm.

34 Anpimelej thiab cov tib neeg sawvdaws uas nrog nws thiaj li tuaj hmo ntuj, muab faib ua plaub pab zov ntaus lub moos Sekhees.

35 Thaum Enpes tus tub Ka‑as tawm mus sawv ntawm txojkev uas nkag rau hauv rooj loog, mas Anpimelej thiab nws cov tub rog txawm sawv tsees ntawm lub chaw zov tuaj.

36 Thaum Ka‑as pom cov tibneeg ntawd, nws hais rau Xenpus tias, saib maj, muaj tibneeg nqis pem roob tuaj.  Xenpus teb nws tias, koj pom lub roob tus duab zoo li tibneeg kaj.

37 Ka‑as rov hais dua tias, saib maj, muaj ib pab tub rog tab tom tawm tom plawv tuaj, thiab muaj ib pab tawm ntawm cov txiv neeb txiv yaig tus ntoo qheb tuaj thiab.

38 Xenpus thiaj hais rau Ka‑as tias, koj lub qhov ncauj dua twg lawm? Koj twb hais tias, Anpimelej yog leejtwg es peb yuav tu nws? Cov tibneeg no twb yog cov uas koj saib tsis taus nev. Cia li tawm mus ua rog rau lawv.

39 Mas Ka‑as thiaj ua ntej coj cov tibneeg Sekhees mus nrog Anpimelej ua rog.

40 Anpimelej muab Ka‑as ntiab khiav mus thiab muaj tibneeg raug mob ntog coob kawg taug kev los txog ntua rooj loog.

41 Anpimelej kuj nyob hauv Alumas, mas Xenpus muab Ka‑as thiab nws cov kwvtij ntiab khiav mus, lawv thiaj nyob tsis tau hauv lub moos Sekhees lawm.

42 Hnub tom qab muaj tibneeg hais rau Anpimelej tias, cov tibneeg hauv moos tawm mus tom tej teb,

43 ces nws txawm muab nws cov tub rog faib ua peb pab zov tom tej teb.  Nws saib pom cov tibneeg tawm hauv lub moos tuaj ces nws txawm sawv tsees muab tua kiag tuag.

44 Anpimelej thiab pab tub rog uas nrog nws txawm txeem plaws mus nyob ntawm rooj loog, mas ob pab tub rog uas nyob ib cag kuj khiav mus tua cov uas nyob tom tej teb tuag tag huvsi.

45 Anpimelej tua lub moos ntawd ib hnub tsaus ntuj mas txeeb tau lub moos thiab tua cov pejxeem hauv lub moos ntawd tuag tag huvsi.  Nws muab lub moos tsoo puam tsuaj tag thiab w ntsev rau hauv lub moos.  

46 Thaum cov tibneeg uas nyob ntawm lub chaw faj seeb hauv Sekhees tau hnov tej xwm no, lawv khiav nkag rau hauv lub chaw ruaj khov uas yog tsev dab Eenpelis.  

47 Muaj tibneeg hais rau Anpimelej tias, cov tibneeg uas nyob ntawm lub chaw faj seeb hauv Sekhees tau sau zog ua ke.

48 Anpimelej thiaj coj nws cov tibneeg nce mus saum lub roob Xamoos, thiab Anpimelej coj taus mus txiav ib tsuag taws kwv rau saum xub pwg. Nws hais rau cov tibneeg uas nrog nws ua ke tias, nej pom kuv ua abtsi nej kav tsij ua li ntawd thiab.

49 Yog li ntawd cov tib neeg sawvdaws thiaj txiav taws kwv raws Anpimelej qab mus tib ua ib pawg rau ntawm lub chaw ruaj khov ntawd, mas lawv rauv taws hlawv lub chaw ruaj khov, ces cov tib neeg uas nyob hauv lub chaw faj seeb ntawm Sekhees kuj tuag tag, pojniam txivneej huvsi kwvlam ib txhiab leej.

50 Anpimelej txawm mus rau ntawm lub moos Thenpes, mus ua yeej vij lub moos thiab txeeb tau lub moos ntawd.

51 Tiamsis muaj ib lub chaw faj seeb ruaj khov hauv lub moos ntawd, mas cov pejxeem pojniam txivneej huvsi thiaj khiav mus nkag rau hauv lub chaw faj seeb kaw qhov rooj rau.  Lawv nce mus rau saum lub hauv chaw faj seeb.

52 Anpimelej thiaj tuaj txog thiab ua rog rau lub chaw faj seeb ntawd.  Nws mus ze lub qhov rooj yuav muab hluav taws hlawv.

53 Mas muaj ib tug pojniam muab txhib zeb txiv tso los tsoo Anpimelej taubhau ua rau nws taubhau tawg rhe.

54 Nws thiaj qw ceev ceev rau tus hluas uas coj nws cuab yeej tias, rho kiag koj rab ntaj tua kuv, xwv luag thiaj tsis hais txog kuv tias yog ib tug pojniam tua tau kuv. Tus hluas ntawd thiaj li nkaug nws tshab plaws nws thiaj tuag.

55 Thaum cov Ixayees pom tias Anpimelej tuag lawm, lawv nyias taus nyias rov qab mus tsev.

56 Qhov no yog (יחוח)Yahweh ua pauj rau tej kev phem uas Anpimelej ua rau nws txiv uas yog nws tua nws xya caum leej kwvtij.

57 (יחוח)Yahweh muab tej kev phem uas cov tibneeg Sekhees ua no coj rov los poob rau saum cov Sekhees taubhau, thiab tej lus uas Yelunpa‑as tus tub Yahthas foom kuj poob raug lawv.