Kide‑oos Ntes Tau Midees Ob Tug Vajntxwv

1 Cov Efa‑is txawm hais rau Kide‑oos tias, ua cas koj yuav ua siab deb rau peb? Thaum koj mus ntaus Midees ntawd koj tsis hu peb nrog koj mus thiab. Thiab lawv cem nws heev.

2 Mas nws hais rau lawv tias, tej uas kuv ua los lawd muab piv tsis tau rau tej uas nej ua. Tej nyuag tsuag txiv hmab uas Efa‑is xawb de tseem zoo dua tej txiv hmab uas Anpiyexaws de lawm los tsis yog?

3 (יחוח)Yahweh muab cov Midees ob tug thawj yog Aulej thiab Xeeb rau hauv nej txhais tes, ces kuv ua tau abtsi uas yuav muab piv tau rau nej? Thaum nws hais li no lawd, lawv lub siab chim thiaj li nqig lawm.

4 Kide‑oos thiab peb puas leej uas nrog nws kuj tuaj txog ntawm tus dej Yaladees thiab hla mus rau sab tid.  Txawm yog lawv tsaug leeg heev los lawv tseem caum qab mus.  

5 Kide‑oos txawm hais rau cov tibneeg Xukhaus tias, thov muab ncuav rau cov tib neeg uas nrog kuv ua ke no noj thiab, rau qhov lawv tsaug leeg heev thiab kuv tab tom caum ntes Xenpas thiab Xamunas uas yog cov Midees li vajntxwv.

6 Cov nom tswv hauv lub moos Xukhaus teb tias, Xenpas thiab Xamunas twb nyob hauv koj txhais tes lawm lov es peb yuav muab ncuav rau koj pab tub rog noj?  

7 Kide‑oos thiaj hais tias, yog li ntawd, thaum (יחוח)Yahweh muab Xenpas thiab Xamunas rau hauv kuv txhais tes lawm, kuv yuav muab pos kaus ntsaj pos kaus ntsim hauv tebchaws moj sab qhua los nplawm nej lub cev. 

8 Nws tawm qhov ntawd mus txog lub moos Penu‑ees thiab hais rau cov tibneeg qhov ntawd ib yam nkaus. Mas cov tibneeg Penu‑ ees teb nws ib yam li cov tibneeg hauv lub moos Xukhaus teb thiab.

9 Kide‑oos thiaj hais rau cov tibneeg Penu‑ees tias, thaum kuv rov qab los muaj kev noj qab nyob zoo, kuv yuav muab lub chaw tsom faj no tsoo pov tseg.

10 Thaum ntawd Xenpas thiab Xamunas nrog kaum tsib txhiab leej tub rog nyob hauv lub moos Khakhaus, lawv yog cov tub rog sab hnub tuaj huvsi uas khiav dim los, rau qhov cov uas tuav ntaj tuag tag lawm 120,000 leej.

11 Kide‑oos taug txoj kev uas cov tub lag tub luam taug, yog ntawm lub moos Naunpas thiab lub moos Yaunpehas sab hnub tuaj, mus ntaus cov tub rog ntawd rau thaum lawv tsis nco ceev faj zov kiag li.

12 Xenpas thiab Xamunas thiaj khiav, mas Kide‑oos caum ntes tau Xenpas thiab Xamu-nas uas yog cov Midees li vajntxwv, thiab ua rau tej tub rog ntshai ras zom zaws.

13 Thaum Yahas tus tub Kide‑oos mus ua rog rov qab los txog ntawm txojkev uas nce mus rau lub moos Heles,

14 nws ntes tau ib tug tub hluas uas nyob hauv lub moos Xukhaus thiab nug tus hluas ntawd. Tus hluas ntawd kuj sau cov nom tswv thiab cov kev txwj laug hauv Xukhaus tej npe, huvsi tau xya caum xya leej rau Kide‑oos.

15 Kide‑oos thiaj tuaj rau ntawm cov tibneeg hauv lub moos Xukhaus thiab hais tias, nej cia li saib Xenpas thiab Xamunas uas yav nram ntej nej thuam kuv hais tias, Xenpas thiab Xamunas nyob hauv koj txhais tes lawm lov es peb yuav muab ncuav rau koj cov tub rog uas tsaug leeg noj?

16 Kide‑oos kuj ntes cov kev txwj laug hauv lub moos thiab xuas pos kaus ntsaj pos kaus ntsim qhuab qhia cov tibneeg Xukhaus.

17 Thiab nws muab lub chaw tsom faj ntawm lub moos Penu‑ees rhuav pov tseg thiab muab cov txivneej hauv lub moos ntawd tua pov tseg.

18 Kide‑oos hais rau Xenpas thiab Xamunas tias, cov tibneeg uas neb muab tua ntawm roob Thanpaus nev? Nkawv teb tias, koj zoo li cas, lawv txhua tus kuj zoo ib yam li ntawd, lawv zoo li vajntxwv tej tub.

19 Nws hais tias, lawv yog kuv cov kwvtij nrog kuv koom ib leeg niam.

Muaj (יחוח)Yahweh uas muaj txojsia nyob pom, yog neb tau tseg lawv txojsia kuv yuav tsis muab neb tua pov tseg.

20 Ces nws hais rau nws tus tub hlob Yethaws tias, cia li sawv tsees muab nkawv tua pov tseg.  Tiamsis tus tub ntawd tsis rho ntaj, vim yog nws ntshai rau qhov nws tseem hluas.

21 Ces Xenpas thiab Xamunas txawm hais tias, koj cia li sawv tsees tua wb los maj! Tus tibneeg laus thiaj muaj zog ua tau tus tibneeg laus li haujlwm los sav. Kide‑oos thiaj sawv tsees tua Xenpes thiab Xamunas pov tseg thiab daws tej npauj uas zoo li lub hli xiab ntawm nkawv tej ntxhuav los.  

22 Dhau ntawd cov Ixayees hais rau Kide‑oos tias, thov koj ua tus uas kav peb thiab koj tus tub thiab koj tus xeeb ntxwv kuj kav peb ntxiv mus, vim yog koj cawm tau peb dim hauv cov Midees txhais tes.

23 Kide‑oos teb lawv tias, kuv yuav tsis kav nej, thiab kuv tus tub yuav tsis kav nej. (יחוח)Yahweh yuav kav nej xwb.  

24 Thiab Kide‑oos hais rau lawv tias, kuv thov ib yam ntawm nej xwb.  Thov nej txhua tus muab tej qhws ntsej kub uas nej txeeb tau los ntawd rau kuv xwb. Cov Midees muaj qhws ntsej kub, vim lawv yog Yisama‑ees caj ces.

25 Lawv kuj teb nws tias, peb yeej zoo siab muab. Lawv txawm muab ntaub pua thiab txhua tus muab tej qhws ntsej uas txeeb tau los ntawd tso rau hauv. 

26 Cov qhws ntsej kub uas nws thov tau ntawd, nyhav ib txhiab xya pua sekhees, dua li ntawd tseem muaj tej npauj uas zoo li lub hli xiab thiab tej saw thiab tej tsoos tsho tsamxem uas Midees ob tug vajntxwv hnav thiab tej saw uas dai ntawm lawv tej ntxhuav caj qwb.  

27 Kide‑oos muab tej kub no ua ib lub efaus khaws cia rau hauv nws lub moos Aufas. Ces cov Ixayees sawv daws txawm mus pe hawm lub efaus ntawd mas lub efaus ntawd thiaj ua rooj hlua cuab Kide‑oos thiab nws caj ces.  

28 Cov Midees swb kiag cov Ixayees, tsa tsis tau taubhau dua li lawm.  Thiab lub tebchaws kuj so tsis ua rog tau plaub caug xyoo mus txog thaum tag Kide‑oos sim neej.

​

Kide‑oos Tag Sim Neej 

29 Yelunpa‑as uas yog Yahas tus tub kuj mus nyob hauv nws lub tsev.

30 Kide‑oos muaj xya caum tus tub uas yog nws roj nws ntshav xeeb, vim yog nws muaj pojniam coob.

31 Kide‑oos tus niam yau uas nyob hauv lub moos Sekhees kuj yug tau ib tug tub rau nws, nws tis npe hu ua Anpimelej.

32 Yahas tus tub Kide‑oos hnub nyoog laus heev lawm mam tuag. Lawv muab nws faus rau hauv nws txiv Yahas lub qhov ntxa hauv lub moos Aufas uas yog Anpiyexaws cum li moos.

33 Thaum Kide‑oos tuag lawd, cov Ixayees txawm tig hlo mus deev tej dab Npa‑as thiab lawv teev Npa‑as Npelis ua lawv Tus Tswv.  

34 Cov Ixayees tsis nco txog (יחוח)Yahweh uas yog lawv Tus Tswv uas cawm lawv dim hauv lawv cov yeeb ncuab txhais tes rau txhua fab lawm.

35 Lawv tsis hlub Yelunpa‑as tsev neeg uas yog Kide‑oos, tsis pauj Kide‑oos tej txiaj ntsig uas nws tau ua rau cov Ixayees.